Oosterhout (gemeente)

Lân	Nederlân
Provinsje	Noard-Brabân
Haadplak	Oirschot
Oerflak	73,09 km²
• dêrfan lân	71,47 km²
• dêrfan wetter	1,62 km²
Ynwennertal	57.996 (1 jannewaris 2024)
Befolkingstichtens	811 ynw./km²
Ferkearsier(en)
Netnûmer(s)	0162 (Oosterhout, Oosteind en Den Hout), 0161 (Dorst en bûtengebieten), 076 (bûtengebieten)
Postkoade(s)	4849, 4900-4911
	www.oosterhout.nl

Oosterhout

Oosterhout is in gemeente yn 'e provinsje Noard-Brabân mei 57.996 (1 jannewaris 2024) ynwenners op in oerflak fan 73,09 km² (wêrfan 1,62 km² wetter). It haadplak is de stêd Oosterhout.

Skiednis

De gemeente Oosterhout waard yn 'e moderne foarm oprjochte yn it jier 1803, yn de tiid fan de Bataafske Republyk, doe’t de âlde feodale strukturen feroare waarden yn mear sintralisearre bestjoerlike ienheden. As plak hat Oosterhout lykwols in folle âldere skiednis.

Oosterhout makket diel út fan 'e Barony fan Breda en foarmet de noardlike grins dêrfan. De grinzen fan 'e gemeente Oosterhout binne yn 'e rin fan 'e tiid praktysk net feroare. Op 1 oktober 1964 waarden de doarpen Stuivezand en Hoogerheide, dy't tichteby Made lizze, tafoege oan de doetiidske gemeente Made en Drimmelen.

Plakken

Njonken de stêd Oosterhout falle ek de doarpen en buorskippen Den Hout, Dorst, Eind van den Hout, Groenendijk, Heikant, Heistraat, Hespelaar, Oosteind, Seters, Steenoven, Ter Aalst, Vijfhuizen en Vrachelen ûnder de gemeente.

It besjen wurdich

De Sint-Jânsbasilyk is in neogoatysk tsjerkegebou yn it sintrum fan Oosterhout.

Oan 'e râne fan it sintrum fan Oosterhout lizze yn in parkeftich gebiet fjouwer lytse slotsjes: Limburg, Brakestein, Beveren en Paterserf.

De Sint-Paulusabdij wie eartiids in benediktynske abdij, mar is hjoed-de-dei in kleaster fan 'e mienskip Chemin Neuf.^[2]

De Hillige Trijehoeke is in gebiet dêr't trije kleasters tichte byinoar lizze: it Sint-Catharinadal fan 'e Norbertinessen, de âldste noch besteande nonnekleastermienskip fan Nederlân, de earder neamde Sint-Paulusabdij en de Us-Leaffrouweabdij.

Museum

Museum Oud-Oosterhout

Natoer

De Vrachelse Heide is in grut bosk- en heidegebiet súdwestlik fan Oosterhout. It wie oarspronklik hielendal heide, mar yn 'e 19e iuw is it foar in part beplante mei dinnebeammen. It is eigendom fan Definsje.

Boskwachterij Dorst is in 1.117 ha grut boskgebiet tusken Rijen, Oosterhout, Teteringen en Dorst. It is eigendom fan Steatsboskbehear en is ûnderdiel fan it natuergebiet Barony fan Breda.

De Duiventoren is in natuergebiet súdeastlik fan Oosterhout. It terrein is fan Steatsboskbeheer. It waard yn it ferline brûkt troch it leger en dêrfandinne wurdt it ek Cadettenkamp neamd. De Duiventoren slút oan op de Boskwachterij Dorst.

Súd fan Oosterhout leit de Oosterheide, in 106 ha grut gebiet fan 'e feriening Natuermonuminten.