Mila Kunis

Ut Wikipedy
Gean nei: navigaasje, sykje
Mila Kunis
20120712 Mila Kunis @ Comic-con cropped.jpg
persoanlike bysûnderheden
echte namme Milena Markovna Kunis
nasjonaliteit Flag of Ukraine.svg Oekraynsk
Flag of the United States.svg Amerikaansk
berne 14 augustus 1983
berteplak Tsjernivtsi (Oekraïne)
etnisiteit Flag of Israel.svg Joadsk
jierren aktyf 1994 – no
prizen Saturn Award 2011
offisjele webside
gjint

Mila Kunis (folút: Milena Markovna Kunis; Oekraynsk: Милена Марківна Куніс, sekuere transliteraasje: Myljena Markivna Kunis; Russysk: Милена Марковна Кунис, sekuere transliteraasje: Miljena Markovna Kunis; Tsjernivtsi (Oekraïne),[1][2][3] 14 augustus 1983) is in Amerikaansk aktrise fan etnysk Joadsk komôf. Hja waard fan 1998 ôf bekend yn 'e rol fan Jackie Burkhart yn 'e komeedzjesearje That '70s Show. Ek is se as stimaktrise by de populêre animaasjesearje Family Guy belutsen, wêrby't se de teksten fan dochter Meg Griffin ynsprekt. Sûnt 2008 is se dêropta as filmaktrise aktyf, mei rollen yn û.m. Forgetting Sarah Marshall, Black Swan, Friends with Benefits en Ted.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Kunis waard yn 1983 berne yn in Joadsk gesin yn Tsjernivtsi, yn 'e Oekraïne (doe noch part fan 'e Sovjet-Uny), in stêd dy't yn 'e Karpaten leit, net fier benoarden de Roemeenske grins. Har heit Mark Kunis is in meganisiên, dy't no wurket as taksysjauffeur, en har mem Elvira is in natuerkundeleararesse dy't no in apteek runt. Kunis hat in âldere broer dy't fan Michael hjit en berne is yn 1976. Yn 1991, doe't se sân jier âld wie, emigrearre Kunis mei har âlden en broer nei de Feriene Steaten. De redens dêrfoar wiene dat har âldelju yn 'e Oekraïne op ekonomysk mêd gjin takomst seagen, en teffens spile it oanboazjende antysemitisme yn 'e eardere Sovjet-Uny in rol by dy beslissing.

Mila Kunis yn 2009.

It gesin sette him nei wenjen yn Los Angeles, yn 'e Amerikaanske steat Kalifornje. Kunis ûnderfûn troch de emigraasje in slimme kultuerskok, en hat yn fraachpetearen oanjûn dat se har net folle fan it earste jier yn 'e Feriene Steaten tebinnenbringe kin, útsein dat it in ellindige tiid foar har wie. Se begriep neat fan 'e Amerikaanske kultuer en ferstie gjin wurd Ingelsk, dat it fielde foar har krekt as wie se blyn en dôf wurden. Uteinlik learde se de taal lykwols en akklimatisearre se ta de kultuer. Se folge de middelbere skoalle yn Los Angeles, oant se trochbriek mei har rol yn That '70 Show. Dêrnei learde se foar it meastepart troch in priveelearaar dy't har op 'e set fan dy searje ûnderwiis joech.

Aktearkarriêre[bewurkje seksje | boarne bewurkje]

Doe't se njoggen jier wie, waard Kunis troch har heit ynskreaun foar aktearlessen. By har earste audysje, foar in Barbie-reklame, wie it daliks rekke en krige se de rol. Ferskate oare reklamespotsjes folgen. Har earste tillefyzjerol hie Kunis yn 1994, yn 'e soapsearje Days of Our Lives. Koarte tiid letter hie se in gastroltsje yn 'e searje Baywatch, en yn 1995 folge har earste filmrol, yn Make a Wish, Molly. Yn 1996 en 1997 hie se in lyts roltsje yn 'e searje 7th Heaven. Fierders hie se yn dy tiid in gastrol yn 'e plysjesearje Walker, Texas Ranger en rollen yn films as Piranha (1995), Santa with Muscles (1996), Honey, We Shrunk Ourselves (1997) en Gia (1998).

Yn 1998 waard Kunis cast yn 'e rol fan 'e kreaze mar ekstreem egoïstyske Jackie Burkhart, yn 'e komeedzjesearje That '70s Show, oer in groep ferfeelde tiners op it plattelân fan Wiskonsin yn 'e 1970-er jierren. Alle akteurs moasten teminsten achttjin jier wêze; Kunis, dy't fjirtjin wie, sei by har audysje dat se achttjin wurde soe (mar net wannear). Hoewol't de produsinten úteinlik útfigelearren wat se bedoelde, wiene se sa ûnder de yndruk fan har aktearprestaasje dat se har likegoed oannamen. That '70s Show wie tige súksesfol en rûn acht seizoenen lang, fan 1998 oant 2006. Foar Kunis en de oare jonge akteurs (Topher Grace, Ashton Kutcher, Danny Masterson, Laura Prepon en Wilmer Valderrama) foarme de searje de trochbraak. Kunis waard foar de rol fan Jackie Burkhart trije kear nominearre foar in Young Artist Award en fiif kear foar in Teen Choice Award.

Mila Kunis yn 2012.

Yn 1999 ferfong Kunis Lacey Chabert as stimaktrise yn 'e populêre tekenfilmrige Family Guy, fan Seth MacFarlane. Dy searje rint noch altyd en Kunis lient dêryn har stim oan it personaazje Meg, de dochter fan it gesin Griffin. Underwilens sette hja ek har wurk as filmaktrise fuort. Yn 2001 spile se yn Get Over It, mei Kirsten Dunst, en it jiers dêrop wie se te sjen yn 'e flopte horrorfilm American Psycho 2, mei William Shatner. Letter hie se ek rollen yn films as After Sex, Moving McAllister en Boot Camp, dy't alletrije útbrocht waarden yn 2007. As filmaktrise kaam Kunis har trochbraak yn 'e komeedzje Forgetting Sarah Marshall, yn 2008. Datselde jiers spile se in hiermoardneresse yn 'e aksjefilm Max Payne, mei Mark Walhberg. Hoewol't dy film in finansjeel súkses wie, fûnen de measte resinsinten dat Kunis dêryn miscast wie.

Better waard har rol yn 'e komeedzje Extract (2009) ûntfongen, wêryn't se Ben Affleck en Jason Bateman as tsjinspilers hie. Yn 2010 spile Kunis fierders mei Denzel Washington yn 'e aksjefilm The Book of Eli, dy't útinoar rinnende resinsjes krige. Foar har fertolking fan 'e rol fan balletdûnseresse Lily, de aartsrivale fan it haadpersonaazje (spile troch Natalie Portman), yn 'e film Black Swan (2010) krige Kunis lykwols in protte lof. Se wûn der in Saturn Award mei yn 'e kategory bêste byrol fan in aktrise, en teffens de Marcello Mastroianni Award op it Ynternasjonaal Filmfestival fan Feneesje. Fierders waard se nominearre foar û.m. in Golden Globe en twa Screen Actors Guild Awards. Foar dizze rol ûndergie Kunis in treningsprogramma dat û.m. in dieet fan 1.200 kaloryen deis en sân dagen yn 'e wike fjouwer oeren balletles omfieme. Under dy trening rûn se ferskate blessueres op, lykas in skuorde piis en in skouder út it potsje.

Yn 2011 spile Kunis mei Justin Timberlake yn 'e romantyske komeedzje Friends with Benefits, dy't in grut kommersjeel súkses waard. In jier letter wie se mei Mark Walhberg te sjen yn 'e komeedzje Ted, dy't skreaun wie troch Family Guy-skepper Seth MacFarlane. Dy film, oer in libbene teddybear en syn minsklike (no folwoeksen) eigner, waard goed ûntfongen troch de krisisy en wie ek in grut finansjeel súkses. Lettere films dêr't Kunis yn spile, wiene û.m. Oz the Great and Powerful (2013), Blood Ties (2013) en Third Person (2013), mei Liam Neeson en Olivia Wilde. Yn 2015 wie se te sjen yn 'e science fiction-rôlprint Jupiter Ascending, en yn 2016 spile se mei Kirsten Bell en Christina Applegate yn 'e komeedzje Bad Moms.

Mila Kunis yn 2008.

Priveelibben[bewurkje seksje | boarne bewurkje]

Kunis hat heterochromia iridum, in ôfwiking dy't in kleurferskil ynhâldt tusken de iris fan it lofter- en rjochtereach. Kunis har rjochtereach is griis/blau en har loftereach is ljochtbrún/grien. Yn 2011 makke se bekend dat se troch dizze ôfwiking in groanyske foarm fan 'e eachkrupsje iritis hat, dy't derfoar soarge hie dat se in pear moannen earder blyn wurden wie yn ien each. Underwilens hie se in operaasje ûndergien om it probleem te ferhelpen.

Yn novimber 2011 beselskippe Kunis sersjant Scott Moore nei in bal fan it Amerikaanske Korps Mariniers yn Greenville, nei't dy har fia in YouTube-filmke útfrege hie wylst er noch legere wie yn Afganistan. Fan 2002 oant begjin 2011 hie Kunis in relaasje mei kollega-akteur Macaulay Culkin, mei wa't se noch altyd befreone is. Yn april 2012 begûn se in nije relaasje mei hat Ashton Kutcher, dy't krekt as sysels bekend wurden is troch syn rol yn That '70s Show. Kunis en Kutcher ferloofden har yn febrewaris 2014, en trouden yn july 2015 yn Oak Glen. Yn oktober 2014 skonk Kunis it libben oan harren dochterke Wyatt Isabelle, en yn juny 2016 waard befêstige dat Kunis op 'e nij swier is.

Kunis is in oanhingster fan 'e Demokratyske Partij en hat har yn 2008 en 2012 ynset foar de ferkiezing fan Barack Obama ta presidint fan de Feriene Steaten. Se is in útsprutsen kritikaster fan 'e Republikeinske Partij en hat û.m. oanjûn dat se har misledige fielt troch de wize dy't Republikeinen foar de moade hawwe om oer froulju te praten. Fierders hat se it der likemin op stean dat de Republikeinen allegeduerigen Jezus Kristus oeral by helje.

Filmografy[bewurkje seksje | boarne bewurkje]

Film
jier titel rol oantekenings
1995 Make a Wish, Molly Melinda
1995 Piranha Susie Grogan tillefyzjefilm
1996 Santa with Muscles Sarah
1997 Honey, We Shrunk Ourselves Jill, gast op feest direct-to-DVD
1998 Gia Gia 11 jier
1998 Krippendorf's Tribe Abbey Tournquist
1998 Milo Martice net op ôftiteling
2001 Get Over It Basin
2002 American Psycho 2 Rachael direct-to-DVD
2004 Tony n' Tina's Wedding Tina
2005 Stewie Griffin: The Untold Story Meg Griffin (stim) direct-to-DVD
2007 After Sex Nikki
2007 Moving McAllister Michelle
2007 Boot Camp Sophie
2008 Forgetting Sarah Marshall Rachel Jansen
2008 Max Payne Mona Sax
2009 Tom Cool Little Boy Matson
2009 Extract Cindy
2010 The Book of Eli Solara
2010 Date Night Whippit
2010 Black Swan Lily
2011 Friends with Benefits Jamie Rellis
2012 Ted Lori Collins
2012 Tar Catherine
2013 Oz the Great and Powerful Theodora
2013 Blood Ties Natalie
2013 The Third Person Julia
2014 The Angriest Man in Brooklyn Sharon Gill
2014 Annie Andrea Calvin kameo
2015 Jupiter Ascending Jupiter Jones
2015 Hell & Back Deema (stim)
2016 Bad Moms Amy Mitchell
Tillefyzje
jier titel rol oantekenings
1994 Days of Our Lives Hope (as jong famke) flashback
1994–1995 Baywatch Annie / Bonnie ferskate ôfleverings
1995 The John Larroquette Show Lucy 1 ôflevering
1995 Hudson Street Devon 1 ôflevering
1996 Unhappily Ever After Chloe 1 ôflevering
1996–1997 Nick Freno: Licensed Teacher Anna-Maria Del Bono 5 ôfleverings
1996–1997 7th Heaven Ashley 4 ôfleverings
1997 Walker, Texas Ranger Pepper 1 ôflevering
1998 Pensacola: Wings of Gold Jessie Kerwood 1 ôflevering
1998–2006 That '70s Show Jackie Burkhart 200 ôfleverings
2000–no Family Guy Meg Griffin (stim) 182 ôfleverings
2002 Get Real Taylor Vaughn 2 ôfleverings
2002 MADtv Daisy 1 ôflevering
2004 Grounded for Life Lana 2 ôfleverings
2005–no Robot Chicken ferskaat (stim) 13 ôfleverings
2009 The Cleveland Show Meg Griffin (stim) 1 ôflevering
2011 Sesame Street harsels
2011 Good Vibes as harsels (stim) 1 ôflevering
2011 Night of the Hurricane Meg Griffin (stim)
Fideoklips
jier titel artyst
1999 In the Street Cheap Trick
2000 The Itch (Vitamin C song) Vitamin C
2001 Rock and Roll All Nite KISS
2001 Jaded Aerosmith
2003 The End Has No End The Strokes
2008 LA Girls Mams Taylor feat. Joel Madden
2012 Everybody Needs a Best Friend Norah Jones
Fideospultsjes
jier titel rol
2006 Saints Row Tanya Winters (stim)
2006 Family Guy Video Game Meg Griffin (stim)

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:
  1. Ukrainian Jews, Bible Discovered
  2. (Oekraynsk) Міла Куніс зіграє у трилері ”Чорний лебідь”, Gazeta.ua (August 13, 2009)
  3. 'EXTRACT' STAR MILA KUNIS ON HER RUSSIAN ROOTS, YouTube

Foar boarnen en oare literatuer, sjoch ûnder: References en Further reading, op dizze side.