Middelste wite reager

Middelste wite reager
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift pilekaaneftigen (Pelecaniformes) famylje reagerfûgels (Ardeidae) skaai reagers (Ardea)
soarte
Ardea intermedia
Wagler, 1829
IUCN-status: net bedrige
ferspriedingsgebiet
briedfûgel      stânfûgel      wintergast

De middelste wite reager (Ardea intermedia; synonimen: Egretta intermedia, Mesophoyx intermedia) is in fûgel út de famylje reagerfûgels (Ardeidae) .

Ferskining

De fûgel is 56 oant 72 sm lang en sit wat formaat oanbelanget tusken de lytse wite reager (55-65 sm) en de grutte wite reager (85-100 sm) yn. De spanwiidte fan 'e middelste wite reager is 105-115 sintimeter. Lykas syn sibben is de fûgel folslein wyt en hat er meast in relatyf tsjokke giele snaffel en swarte poaten. Yn 'e briedtiid is de snaffel readeftich oant swart. De soarte is folslein wyt en hat yn 'e briedtiid sierfearren op 'e rêch en it boarst.

De snaffel is swart by ûnfolwoeksen fûgels en giel bûten de briedtiid mei in swarte punt en swarte boppesnaffel.

Taksonomy

Earder waard de fûgel mei de wite plúmreager (Ardea plumifera) en de gielsnaffelreager (Ardea brachyrhyncha) mei de Ardea intermedia as ien soarte behannele. Sûnt 2014 wurde de trije troch BirdLife International en de IUCN as aparte soarten beskôge en sûnt 2023 ek troch de ynfloedrike IOC en eBird/Clements.

Ferskillen mei besibbe soarten

Kenmerk	Ardea intermedia	Ardea plumifera	Ardea brachyrhyncha
Fryske namme wittenskiplike namme	middelste wite reager	wite plúmreager	gielsnaffelreager
fersprieding	Súd- en Súdeast-Aazje	East-Aazje, Austraalje, Nij-Guineä	Afrika besuden de Sahara
trochsneed lingte	± 65–72 sm	± 68–76 sm	± 60–70 sm
snaffellingte en -foarm	Middellang, relatyf slank	Langer en slanker	Koarter en tsjokker
snaffelkleur (briedtiid)	giel oant oranje, bûten de briedtiid giel	read, bûten de briedtiid meast giel	giel, meastal minder fel
poatkleur	swart, bytiden mei gielige teannen	read, bûten de briedtiid swart	swart
briedplommen	beheind ûntwikkele	sterk ûntwikkele, lange sierfearren	minder útsprutsen
kop en hals	relatyf koart	langer en eleganter	koarter en kompakter
Typysk biotoop	sompen, rysfjilden, ûndjip swiet wetter	sompen, kustgebieten, rysfjilden	rivieren, marren, savannes mei wetter

Fersprieding

De middelste wite reager komt foar fan Yndia oant Japan en op 'e Grutte Sûnda-eilannen. It is in fûgel fan wiete gebieten, kustgebieten en sompen oant 1450 m boppe seenivo.

Status

It ferspriedingsgebiet fan 'e soarte is grut en dêrom allinnich al is de kâns op útstjerren lyts. De grutte fan 'e populaasje is net kwantifisearre, mar de oantallen fan 'e soarte rinne tebek, mar net hiel rap en sadwaande stiet de fûgel as net bedrige (Least Concern, 2020)op 'e Reade list fan 'e IUCN klassifisearre.

Boarnen, noaten en/as referinsjes:

Birds of the World, 6 febrewaris 2026. Ebird, 6 febrewaris 2026. BirdLife, 6 febrewaris 2026. Commons Wikimedia Commons  Ofbylden dy't by dit ûnderwerp hearre, binne te finen yn de kategory Middelse wite reager fan Wikimedia Commons.