Memory (film út 2022)

	Memory
	film
	(Filmposter yn 'e Ingelske Wikipedy)
	makkers
regisseur	Martin Campbell
produsint	Cathy Schulman; Moshe Diamant; Rupert Maconick; Michael Heimler; Arthur Sarkissian
senario	Dario Scardapane
basearre op	De Zaak Alzheimer ; fan Jef Geeraerts
kamerarezjy	David Tattersall
muzyk	Rupert Parkes
filmstudio	Black Bear Pictures; Welle Entertainment; Saville Productions
distribúsje	Briarcliff Entertainment en; Open Road Films (Fer. St.); STXfilms (ynternasjonaal)
	spilers
haadrollen	Liam Neeson; Guy Pearce
byrollen	Monica Bellucci; Taj Atwal; Harold Torres; Ray Stevenson
	skaaimerken
lân/lannen	Feriene Steaten
premiêre	29 april 2022
foarm	langspylfilm
sjenre	aksjeskriller
taal	Ingelsk (ek in bytsje Spaansk)
spyltiid	114 minuten
	budget en resultaten
budget	ûnbekend
opbringst	$14,0 miljoen

Memory is in Amerikaanske aksje skriller, misdiefilm en plysjefilm út 2022 ûnder rezjy fan Martin Campbell, mei yn 'e haadrollen Liam Neeson en Guy Pearce. De titel betsjut "Unthâld". De film waard basearre op 'e roman De Zaak Alzheimer fan 'e Flaamske auteur Jef Geeraerts. It ferhaal folget in hiermoardner dy't te lijen hat ûnder de begjinnende symptomen fan 'e sykte fan Alzheimer. Ear't er hielendal ophâldt mei funksjonearjen, beslút er op eigen manneboet noch wat rekkenings te fereffenjen. De plysjes dy't him op 'e hakken sitte, wurde pleage troch ambifalinte gefoelens, mei't de lju dy't út 'e wei romme wurde, skuldich binne oan it fasilitearjen fan twongen prostitúsje en seksuele slavernij fan minderjierrige famkes. Memory krige fan 'e filmkritisy oer it algemien negative resinsjes.

Plot

Alex Lewis is in Amerikaanske hiermoardner dy't yn Meksiko wennet en wurket. Hy rekket op jierren en syn funksjonearjen hat te lijen ûnder de iere symptomen fan 'e sykte fan Alzheimer. Dêr nimt er eksperimintele medisinen foar, mar hy is him derfan bewust dat dy syn oankommende folsleine demintens mar tydlik opkeare kinne. Lewis wol dêrom ophâlde mei syn wurk, om't er wol foar it ferstân hat dat it op in stuit misrinne moat. Syn freon Mauricio, dy as tuskenpersoan tusken him en syn kliïnten fungearret, wit lykwols neat fan 'e demintens en set Lewis ûnder druk om troch te gean. Sa kriget Lewis opdracht om nei syn berteplak El Paso te gean, krekt oer de grins yn Teksas, om dêr in pear lju út 'e wei te romjen.

Underwilens is Vincent Serra, in spesjaal agint fan 'e Amerikaanske federale resjerzje FBI, mei syn wurkpartner Linda Amistead en agint Hugo Marquez fan 'e Meksikaanske Federale Ministeriële Plysje (PFM) behelle yn in ûndersyk nei minderjierrige famkes dy't út Meksiko wei nei de Feriene Steaten smokkele wurde om dêr yn 'e prostitúsje te ferdwinen. Serra giet undercover as hoereklant om te besykjen en arrestearje "Papa" León, in Meksikaanske minskehanneler dy't syn eigen trettjinjierrige dochter Beatriz de hoer spylje lit. De wiere identiteit fan Serra komt lykwols oan it ljocht en León gizelet Beatriz en bedriget it fanke mei pistoal. Serra bespringt him en tegearre kneppelje se troch in rút en falle se twa ferdjippings nei ûnderen. Serra komt der frijwol ûnskansearre ôf, mei't er boppe-op León terjochte komt, mar de minskehanneler is dea.

Yn El Paso hat Alex Lewis in moeting mei abbekaat William Borden, dy't de opdrachtjouwer fan 'e moarden fertsjintwurdiget. Dyselde jout him foto's fan in man en in frou dy't dea moatte. Ek moat Lewis in trijetal USB-sticks fan 'e man weromkrije om dy fia Borden troch te spyljen nei de opdrachtjouwer. Wylst er yn El Paso is, besiket Lewis syn âldere broer Paul. Dyselde is ek oanhelle mei de sykte fan Alzheimer, mar hy hat it einstadium berikt: hy sit yn in fersoargingstehûs yn 'e rolstoel en kin sels net mear prate. Lewis sjocht oan syn broer wat himsels te wachtsjen stiet, en dêr hat er gjin nocht oan.

As slachtoffer fan twongen prostitúsje kin Beatriz León frijkomme en in ferbliuwsfergunning krije, mar dan moat se wol tsjûgje tsjin 'e kriminelen foar wa't har heit wurke. Beatriz, dy't wol wit dat dat har dea wurde soe, hâldt de kaken lykwols stiif opinoar. Hja wurdt dêrom ôffierd nei de Teksaanske Sintrale Ferwurkingsfasiliteit, dêr't yllegale ymmigranten yn in reuseftige loads yn grutte koaien fêstholden wurde. Serra syn baas, liedingjaand spesjaal agint Gerald Nussbaum, is lulk dat in djoer ûndersyk hielendal neat opsmiten hat. Hy lit Marquez witte dat dy wol wer nei hûs kin, mar dêr hat Marquez gjin boadskip oan. Nussbaum hat ek gjin each foar Beatriz, dy't foar him inkeld in yllegale ymmigrante is dy't weromstjoerd wurde moat nei Meksiko. Serra soarget der lykwols op eigen manneboet foar dat it fanke út 'e Ferwurkingsfasiliteit helle wurdt en yn in lytsskalich tehûs foar pleechsoarch pleatst wurdt.

Tink derom: Yn de tekst hjirûnder wurdt de ôfrin fan de film beskreaun.
As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

De man dy't Lewis fermoardzje moat, is in Ellis Van Camp. Lewis kringt syn hûs binnen, oerfalt Van Camp en twingt him om 'e USB-sticks oer te langjen. Dêrnei makket er him op in stille manear dea wylst er der sekuer foar soarget dat Van Camp syn teenage dochter Emma harren net sjocht of heart, sadat er it fanke net tenei hoecht te kommen. Wannear't it stoflik omskot fan Van Camp fûn wurdt, skillet syn widdo FBI-agint Gerald Nussbaum op, oan wa't se kunde hat. Hoewol't in simpele moard eins troch de pleatslike plysje útsocht heart te wurden, set Nussbaum Serra en Linda Amistead op 'e saak. Dêrtroch moatte sy op in neat te noflike wize gearwurkje mei resjersjeur Danny Mora fan it El Paso Police Department (EPPD), dy't fynt dat de FBI eins neat mei de moard te krijen hat en him mei syn eigen saken bemuoie moat.

Alex Lewis giet efter de frou oan dy't er fermoardzje moat, fan wa't er inkeld in pear foto's hat dy't út 'e fierte wei nommen binne en har fansiden sjen litte. Wannear't er te neare nacht har sliepkeamer binnenkringt, blykt it Beatriz León te wêzen. Lewis beseft dan foar it earst dat syn doelwyt in jong famke is. Dêr hat er net foar tekene, dat hy lit har gewurde en giet lulk fuort. Lewis beävensearret in moeting mei Borden, oan wa't er yn net mis te fersteane bewurdings dúdlik makket dat hy gjin bern fermoardet. Hy warskôget Borden ek dat dyselde der mar better foar soargje kin dat Beatriz yn libben bliuwt, om't Lewis oars efter Borden oan komme sil.

In jûn letter yn syn hotel rekket Lewis op bêd mei de callgirl Maya, dy't er yn 'e hotelbar rêden hat fan in dronken klant. Yn syn sliep hat er in nachtmerje wêryn't er Beatriz deasjit, en as er wekker wurdt, is er troch syn oankommende demintens earst alhiel yn betizing. Under it oanklaaien hat er de tillefyzje even oan, en dan sjocht er ta syn skok op it nijs dat der de ôfrûne nacht yn in tehûs foar pleechsoarch in famke fan trettjin deasketten is. It slachtoffer is identifisearre as Beatriz León, in slachtoffer fan minskehannel en in yllegale ymmigrante út Meksiko. Lewis is fuortendaliks benaud dat syn nachtmerje gjin dream wie, mar reäliteit, en dat er troch syn demintens fergetten wie dat er it famke net deadzje mocht. Mar Maya bewissiget him derfan dat hy de hiele nacht by har op bêd lein hat.

Dat betsjut dat Borden-en-dy in oare hiermoardner yn 'e tsjinst nommen hawwe, en as dat sa fluch bard is, kin dat allinnich Mauricio mar wêze. Sadwaande is Lewis op syn iepenst wannear't er de parkeargaraazje fan syn hotel yngiet. Oan 'e ûnderkant fan syn hierauto ûntdekt er in bom. Wannear't dúdlik wurdt dat er net ynstappe sil, iepenet Mauricio, dy't deunby yn in mûklaach leit, it fjoer. Dêrby deadet er Maya, dy't Lewis efternei kommen wie om him syn medisinen te bringen, dy't er yn 'e hotelkeamer fergetten wie. Lewis rekket dêrtroch sa breinroer, dat er al sjittend de posysje fan Mauricio bestoarmet en de man bewusteleas slacht. As Mauricio wer by besleur komt, sit er fêstbûn efter it stjoer fan Lewis syn hierauto. Lewis leit mei soarch it lyk fan Maya yn 'e kofferbak fan 'e auto en lit de boel dan ûntploffe.

Dy jûns, as Borden yn in sportskoalle foar in bereind rút op in rinbânapparaat oan it draven is, hâldt der bûtendoar in auto stil. Der stapt in man út dy't nei it rút fan 'e sportskoalle rint, in pistoal lûkt en dat op Borden rjochtet. Hast ear't de abbekaat foar it ferstân hat dat er yn libbensgefaar ferkeart, wurdt him al in kûgel troch de holle jage. Neitiid stapt Lewis, want hy is de dieder, wer yn en riidt kalmkes fuort. Serra en Amistead reitsje behelle yn it ûndersyk nei de moarden op Mauricio, Maya en Borden fanwegen it fermoeden dat de dieder wolris in hiermoardner wêze kin dy't wurket yn opdracht fan 'e Meksikaanske drugskartels. Se hâlde dêrom kontakt mei Marquez, dy't noch altyd yn El Paso omhinget en goed befreone rekke is mei Amistead, mei wa't er miskien wol in relaasje hat – dat is net alhiel dúdlik.

Nei de moard op Borden lûkt Lewis him werom yn 'e heal útbaarnde bakkerij dy't lang lyn fan syn heit wie. No is dat al desennia lang in leechsteand, yn ferfal rekke gebou, dat inkeld bewenne wurdt troch spinnen en stedsdowen. Hy hat in laptop bemachtige om te sjen wat der op 'e USB-sticks stiet dy't er Van Camp ûntnadere hat. Nû. 1 befettet de lûdsopname fan in tillefoanpetear fan Van Camp mei in ûnbekende frou. Van Camp besiket har earne mei te sjantearjen, mar sy seit dat er in grins oergien is en de gefolgen wol merke sil, wêrnei't se it petear beëiniget. Op nû. 2 stiet in rige foto's, út 'e fierte wei nommen mei in telelins, fan Beatriz León, dy't hiel dúdlik tsjin har wil meifierd wurdt troch har heit en in twadde, ûnbekende man. De lêste foto is dúdlik in publisiteitsfoto, dêr't deselde ûnbekende man op posearret mei in âldere frou: de bekende fêstgoedmagnate Davana Sealman. De lêste USB-stick befettet in filmke fan in befeiligingskamera, dêr't op te sjen is hoe't deselde ûnbekende man Beatriz ferkrêftet.

Serra en Amistead ûntdekke ûnderwilens dat de moarden op Ellis Van Camp en William Borden mei-inoar yn ferbân steane. Net allinnich binne de beide mannen mei itselde fjoerwapen ombrocht, mar der bestiet ek in konneksje tusken harren: Borden is in abbekaat dy't yn 'e tsjinst stiet fan Randy Sealman, de eigner en útbater fan 'e Teksaanske Sintrale Ferwurkingsfasiliteit, dêr't yllegale ymmigranten finzen holden wurde, en Van Camp is de oannimmer dy't dy fasiliteit foar Sealman boud hat. Dêrmei krije de moarden foar de FBI ynienen in folle hegere prioriteit, want Randy Sealman is de ienlingssoan fan 'e rike en machtige Davana Sealman. Serra fermoedet dat syn baas Nussbaum, resjersjeur Mora en in grut diel fan it EPPD korrupt binne en nei Sealman har pipen dûnsje. Hysels en Amistead en ek Marquez, dy't no inkeld noch yn ûnoffisjele hoedanichheid by de saak belutsen is, ynfiltrearje in grutskalich feest dat Randy Sealman dy jûns oan board fan syn lúkse jacht op 'e Rio Grande jout. Se fermoedzje dat Sealman it folgjende doelwyt fan 'e hiermoardner wêze sil en hoopje dyselde dêr op te heinen.

Mar Lewis is harren te fluch ôf, mei't er al oan board glûpt wie noch foar't it feest begûn. Wannear't Sealman him mei in minderjierrige prostituee weromlûkt yn in hut, wurdt er opwachte troch Lewis, dy't it fanke opslút yn 'e byhearrende badkeamer en Sealman troch de holle sjit. Wannear't er neitiid it jacht ferlit, wurdt er lykwols opmurken troch Serra, dy't mei Amistead en Marquez op 'e hakken de efterfolging ynset. Lewis ûntkomt yn in auto, mar hy wurdt yn 'e side rekke troch in kûgel ôffjurre troch Marquez. Hy stelt in oare auto om syn efterfolgers op 'e doele te bringen, mar set dy even oan 'e kant fan 'e wei om wat te bekommen. Hy falt yn 'e sliep en wurdt wekker makke as in motorplysje op syn rútsje tikket. Lykas altyd is er yn betizing as er wekker wurdt. De plysje sjocht syn pistoal en lûkt syn eigen. Dan nimme foar Lewis jierrenlange refleksen it oer en hy sjit de plysje dea. Dêr hat er neitiid gâns spyt fan, mar dan is it al net mear te ferhelpen.

Lewis lûkt him wer yn 'e âlde bakkerij werom, dêr't er syn eigen wûnen fersoarget, mar hy beseft dat syn Alzheimer oanboazet en dat er noch mar in bytsje tiid oer hat. Hy beslút dy tiid te brûken om Davana Sealman dea te meitsjen, dy't de frou yn it opnommen tillefoanpetear mei Van Camp is. Sy is it dy't opdracht jûn hat ta de moarden op Van Camp en Beatriz om har dierbere soan Randy te beskermjen. Lewis stjoert de USB-sticks mei de foto's en it filmke op nei Serra by wize fan útlis foar de moard op Randy Sealman. De USB-stick mei de opname fan it tillefoanpetear ferberget er. Marquez fynt út wêr't Lewis him ferskûlet, en de FBI docht in ynfal yn 'e bakkerij, mar de fûgel is flein. Underwilens ynfiltrearret Lewis it penthouse fan Davana Sealman, dat bewekke wurdt troch tsientallen korrupte plysjeminsken. Hy kringt ta har troch en soe har deasketten hawwe as er net by it yninoar setten fan syn pistoal it slachpintsje fergetten wie. Syn pistoal blykt dêrtroch op it moment suprème ûnbrûkber te wêzen en Lewis wurdt delslein troch resjersjeur Mora.

Neitiid wurdt Lewis op it plysjeburo oerenlang martele troch Mora, wylst foar eltsenien dúdlik is dat er ferlet hat fan medyske soarch. Mora wol fan him witte wêr't de trije USB-sticks binne dy't er Van Camp ûntnadere hat, sadat er dy yn opdracht fan Davana Sealman ferdwine litte kin. Mar Lewis kin him dat net fertelle ek al soed er it wolle, want hy is it fergetten. Lang om let, wannear't dúdlik wurdt dat de ûnderfreging sinleas is, wurdt Lewis dan dochs nei it sikehûs brocht, dêr't er besocht wurdt troch Serra, Amistead en Marquez. Hy seit tsjin harren dat er alles dien hat dat er kin om 'e dieders fan 'e moard op Beatriz León te bestraffen en dat sy it no mar oernimme moatte. Wannear't Serra tsjin him seit dat Davana Sealman frijwol ûnoantaastber is, fertelt Lewis him dat er bewiis hat dat Van Camp har sjantearre mei it feit dat har soan in ferkrêfter wie dy't it foarsjoen hie op jonge famkes dy't fêstsieten yn 'e Ferwurkingsfasiliteit foar yllegale ymmigranten. It giet om in opname fan in tillefoanpetear dat op 'e trêde USB-stick stie. Mar Lewis kin him net mear tebinnenbringe wat er dêrmei dien hat.

Underwilens sjantearret Davana Sealman har persoanlike dokter, Joseph Myers, om nei it sikehûs te gean en by Lewis in giftich middel te ynjektearjen. Myers is dêr gefoelich foar om't hy as goekunde fan har soan Randy ek mei de minderjierrige famkes omsloech dy't Randy út 'e ferwurkingsfasiliteit helle. Dat, Myers set, sij it mei tsjinnichheid, nei it sikehûs ta, dêr't er troch de bewekjende plysjes fuortendaliks trochlitten wurdt om't Davana Sealman al foarútskille hat. Wannear't er Lewis út 'e wei besiket te romjen, kriget Lewis, dy't jierrenlang sels hiermoardner west hat, oan 'e meneuvels fan 'e dokter foar it ferstân wat der geande is. Hy oermasteret Myers, nimt him yn gizeling en lit witte dat er inkeld mei Serra prate wol.

As Serra arrivearret by it sikehûs tilt it dêr op fan 'e skerpskutters fan it EPPD. Hy set syn auto foar de yngong del, wêrnei't Lewis en dokter Myers tegearre nei bûten komme, ferskûle ûnder in lekken. De plysje identifisearret Myers oan syn djoere skuon sjit de oare man dea, mar dan docht bliken dat Lewis mei Myers fan fuotark wiksele hat, en dat de plysje no by fersin de dokter deasketten hat. Lewis dûkt by Serra yn 'e auto. Hy seit dat er noch altyd net betinke kin wêr't er de trêde USB-stick litten hat. Wannear't Serra seit dat Davana Sealman dizze hiele saak bedobje sil, yn it Ingelsk bury, giet der by Lewis ynienen in ljocht op en seit er dat bury stavere wurde moat mei in e, as bery. Beseffend dat syn Alzheimer him byhelle hat en dat dit miskien wol it lêste heldere momint is dat er ea hawwe sil, beslút er dat er net einigje wol lykas syn broer. Hy stapt út 'e auto en lit himsels moedwillich deasjitte troch de korrupte plysjeskerpskutters, dy't him trochsingelje mei kûgels ek al foarmet er gjin inkeld gefaar mear.

Serra is poer oer de gong fan saken, mar hy kin der neat oan feroarje. Hy en Amistead wurde troch Nussbaum oerpleatst nei oare ôfdielings, wylst Marquez ûnder twang oer de grins set wurdt. Wylst se har buro's leechhelje, komt Serra op in idee. Hy en Amistead geane werom nei de âlde bakkerij, dêr't oan 'e gevel de letters B-E-R-Y hingje fan in âld neönboerd (de A en de K fan bakery binne der tuskenwei fallen). Yn ien fan 'e stikkene letters fynt Serra yndie de missende USB-stick werom. As er dêr lykwols mei nei Nussbaum en de pleatslike ofsier fan justysje giet, hâlde dy út dat it bewiis tsjin Davana Sealman te swak is sûnder it tsjûgenis fan Lewis. Mei oare wurden: de saak komt yn 'e dôfpot. Serra fettet dat net goed op en spuit raar guod. Nussbaum stjoert him mei ferlof om't er dúdlik mentale problemen hat.

Dy jûns nimt Amistead Serra mei nei in bar om "syn ferlof te fieren". Dat is oars neat foar har, en hy wol earst ek net, mar se hâldt oan en úteinlik jout er ta. Dyselde jûns sit Davana Sealman op it terras fan har filla fan in glês wyn te genietsjen as in maskere ynkringer har fan efteren oanfalt en de kiel trochsnijt. Yn 'e bar sille Serra en Amistead ôfrekkenje om op hûs oan, mar dan komt it nijs op 'e tillefyzje, dy't dêr oanstiet, dat Davana Sealman fermoarde is. De ferbjustere Serra telt ien en ien op en komt op twa út: hy freget Amistead: "Hasto my hjirhinne meisleept om my in aliby te ferskaffen?" Op in ferlitten plak oan 'e igge fan 'e Rio Grande smyt de moardner fan Davana Sealman it moardwapen yn 'e rivier. Dêrnei docht er syn bivakmûtse ôf om dy mei syn oare klean te ferbrânen: it is Hugo Marquez.

Rolferdieling

haadrollen

personaazje	akteur/aktrise
Alex Lewis	Liam Neeson
FBI-agint Vincent Serra	Guy Pearce

byrollen

personaazje	akteur/aktrise
Davana Sealman	Monica Bellucci
FBI-aginte Linda Amistead	Taj Atwal
PFM-agint Hugo Marquez	Harold Torres
EPPD-resjersjeur Danny Mora	Ray Stevenson
Beatriz León	Mia Sanchez
liedingjaand FBI-agint Gerald Nussbaum	Ray Fearon
William Borden	Daniel de Bourg
Randy Sealman	Josh Taylor
dokter Joseph Myers	Atanas Srebrev
Mauricio	Lee Boardman
Ellis Van Camp	Scot Williams
Wendy Van Camp	Rebecca Calder
Maryanne Borden	Natalie Anderson
Maya	Stelle Stocker
Papa León	Antonio Jaramillo
Emma Van Camp	Sofia Soltess
Marisol	Danay Velinova
dronkeman yn hotelbar	Louis Mandylor
himsels	CNN-nijslêzer Jake Tapper

Produksje en distribúsje

Produksje

Memory waard regissearre troch Martin Campbell nei in senario fan Dario Scardapane op basis fan 'e roman De Zaak Alzheimer fan 'e Flaamske auteur Jef Geeraerts út 1985. De film kin ek sjoen wurde as in Amerikaanske remake fan 'e Belgyske film De Zaak Alzheimer út 2003 fan regisseur Erik van Looy.

As produsinten wiene Cathy Schulman, Moshe Diamant, Rupert Maconick, Michael Heimler en Arthur Sarkissian by it projekt belutsen foar de filmstudio's Black Bear Pictures, Welle Entertainment en Saville Productions. Dêrmei wie Memory in ûnôfhinklike film. It is ûnbekend wat it budget foar de film wie. De kamerarezjy wie yn 'e hannen fan David Tattersall, en de filmmuzyk waard fersoarge troch Rupert Parkes.

Opnamen

De opnamen foar Memory fûnen fan april 2021 ôf folslein plak yn Bulgarije. Foar de measte sênes waard gebrûk makke fan 'e Nu Boyana Film Studios, in studiokompleks yn 'e Bulgaarske haadstêd Sofia.

Distribúsje

De distribúsje fan Memory waard yn 'e Feriene Steaten fersoarge troch Briarcliff Entertainment en Open Road Films, en ynternasjonaal troch STXfilms. De film gie op 29 april 2022 yn 'e Amerikaanske bioskopen yn premiêre. Hy kaam op 21 juny 2022 beskikber as digitale download en waard op 5 july fan dat jier útbrocht op dvd en blu-ray.

Untfangst

Fan 'e filmkritisy krige Memory oer it algemien negative resinsjes. De foaroansteande kritikus Richard Roeper fan 'e Chicago Sun-Times wie it dêr net mei iens. Hy parte de film 3 fan 4 stjerren ta en skreau dat Memory "fan in wat heger nivo [wie] as de trochsneed B-film". Ek fûn er dat "de 78-jierrige Campbell [hjirmei] sjen lit dat er noch altyd ferdomd goed in glêde en meislepende skriller regissearje kin."

Op 'e webside Rotten Tomatoes, dy't resinsjes sammelet, hat Memory in leech goedkarringspersintaazje fan 29%, basearre op 100 ûnderskate resinsjes. De konsensuskrityk fan 'e webside, gearstald út al dy resinsjes, stelt: "Mei't dizze film bleek ôfstekt njonken bettere aksje skrillers fan sawol akteur Liam Neeson as regisseur Martin Campbell, is Memory ien fan 'e maklikst te ferjitten prestaasjes fan harren oant no ta." Op Metacritic, de wichtichste konkurrint fan Rotten Tomatoes, behellet Memory in goedkarringspersintaazje fan 41%, basearre op 28 resinsjes.

Resultaat

Memory brocht yn 'e bioskopen yn 'e Feriene Steaten en Kanada $7,3 miljoen op, en yn alle oare lannen en territoaria $6,7 miljoen. Wrâldwiid kaam de opbringst dêrmei út op.$14,0 miljoen. Fanwegen de ûnbekende hichte fan it budget is net te sizzen oft de film yn 'e bioskopen winst of ferlies makke, mar in opbringst fan $14 miljoen is neffens de mjitstêven fan 'e Amerikaanske filmyndustry net heech.

Keppelings om utens

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.