Mare Tranquillitatis
De Mare Tranquillitatis (Latyn foar See fan de Rêst) is in grutte moannesee op it noardeastlike part fan de sichtbere kant fan de Moanne. De flakte bestiet út âlde basalt dy't ûntstien is troch fulkanyske útstreamingen miljarden jierren lyn. De Mare Tranquillitatis hat in oerflak fan likernôch 420.000 km² en is ien fan de bekendste moanneseën, benammen om't hjir yn 1969 de Apollo 11-misje lâne.
Geology
[bewurkje seksje | boarne bewurkje]De Mare Tranquillitatis leit yn in grut ynslachbekken dat him foarme hat yn de iere skiednis fan de Moanne. Letter waard it bekken folrûn mei floeibere lava, dy't nei ôfkôling de tsjustere basaltflakten foarme dy't fanôf de Ierde sichtber binne.
It basalt fan de Mare Tranquillitatis is relatyf ryk oan titanium yn ferliking mei dat fan in protte oare moanneseën. Dêrtroch hat it gebiet in karakteristike blaugrize kleur op kleurenfoto's fan de Moanne.
Apollo 11
[bewurkje seksje | boarne bewurkje]Op 20 july 1969 lâne de Apollo 11-moannelanner Eagle yn it súdwestlike part fan de Mare Tranquillitatis. De bemanning bestie út:
- Neil Armstrong, kommandant;
- Buzz Aldrin, piloat fan de moannelanner;
- Michael Collins, piloat fan de kommandomodule, dy't yn in baan om de Moanne bleau.
Nei de lâning spruts Armstrong de ferneamde wurden:
| “ | Houston, Tranquility Base here. The Eagle has landed. | ” |
De lâningsplak krige de namme Tranquility Base en wie it plak dêr't Armstrong as earste minske in foet op de Moanne sette.
Namme
[bewurkje seksje | boarne bewurkje]De namme Mare Tranquillitatis waard yn de 17e iuw yntrodusearre troch de Italjaanske astronoom Giovanni Battista Riccioli, dy't in protte fan de grutte moanneflakten Latynske nammen joech dy't ferwize nei minsklike gefoelens of waarsferskynsels.