Lolle Rondaan

Ut Wikipedy
Springe nei navigaasje Springe nei sykjen
Lolle Rondaan
Lolle Rondaan
Lolle Rondaan
persoanlike bysûnderheden
nasjonaliteit flagge fan Nederlân Nederlânsk
berne 3 jannewaris 1919
berteplak Menaam
stoarn 16 febrewaris 1944
stjerplak Amsterdam/Skiphol
etnisiteit Frysk
wurkpaad
berop/amt Weinmakker
reden
  bekendheid
Fersetsstrider

Lolle Rondaan (Menaam, 3 jannewaris 1919 - Amsterdam/Skiphol, 16 febrewaris 1944) wie in Frysk weinmakker dy't yn de Twadde Wrâldoarloch by it ferset tsjin de Dútske besetter aktyf wie.

Biografy[bewurkje seksje | boarne bewurkje]

Iepenbiere bekendmakking fan de ta de dea feroardieling fan û.o. Lolle Rondaan

Hy kaam út in grifformearde húshâlding en wie in soan fan Sijds Rondaan (1892) en Zwaantje Brouwer (Nijehaske, 1892). Hy wie net troud en wie weinmakker fan berop.

Fan 1942 ôf holp er Joadske ûnderdûkers yn Menameradiel; hy wenne doe yn Bitgum. Maitiid 1943 kaam er yn kontakt mei LO-man Rients Westra; foar him socht er ûnderdûkadressen en besoarge er distribúsjebonnen en (fâlske) persoansbewizen. Teffens brocht er Vrij Nederland en anty-Dútske pamfletten rûn en wie er belutsen by it stensiljen en it yn Noardwest-Fryslân fersprieden fan it yllegale blêd Voor God en den Koning.
Mids 1943 gie Rondaan by de KP-Seisbierrum laat fan Rients Bruinsma. Fan begjin augustus 1943 ôf wie er as KP’er belutsen by oerfallen yn Seisbierrum, Mullum en Weidum, wêrby't de kaartsystemen fan de pleatslike burohâlders fan de fiedselfoarsjenningsorganisaasje ferneatige waarden en Ausweise bút makke waarden. Under syn lieding waard yn de nacht fan 25 op 26 septimber 1943 de klús yn it gemeentehûs fan Sint-Anne iepenbrutsen en stimpels, 22 blanko persoansbewizen en it folsleine befolkingsregister yn sekken meinaam. Ynearsten ferstoppen Rondaan en syn broer Jan it register op har' sliepkeamer, mar letter waard de hiele brut yn in bakkersûne ferbaarnd.

Troch it ferrie fan provokateur Frans Michon waard Rondaan, mei noch fjouwer oare fersetslju, op 22 novimber 1943 yn Bitgum arrestearre troch de Sipo en oerbrocht nei it Hûs fan Bewar yn Grins, op 14 febrewaris 1944 ta de dea feroardield troch de rjochtbank (Polizeistandgericht) fan Assen en twa dagen letter deasketten yn in úthoeke fan fleanfjild Skiphol.

Rondaan waard beïerdige op it Earebegraafplak Bloemendaal yn Overveen. Op grêfstien stiet: 'Fallen yn 'e striid tsjin ûnrjocht en slaverij'.

Neitins[bewurkje seksje | boarne bewurkje]

  • Op 15 april 2015 is foar Rondaan in stroffelstien pleatst.
  • Tresoar hat ôfskiedsbrieven oan famylje en freonen fan Rondaan (en oaren fan de fersetsgroep Seisbierrum)[1].

Boarnen, noaten en referinsjes[boarne bewurkje]

Boarnen, noaten en/as referinsjes:
  1. Hoe het Sexbierummer verzet brak na verraad, Frysk Deiblêd, 7 febrewaris 2020