Lilly Steinschneider
| Lilly Steinschneider | ||
.jpg) | ||
| Lilly Steinschneider yn 1912 | ||
| persoanlike bysûnderheden | ||
| nasjonaliteit |  Hongaarsk | |
| berne | 13 jannewaris 1891 | |
| berteplak | Bûdapest, Eastenryk-Hongarije | |
| stoarn | 28 maart 1975 (84 jier) | |
| stjerplak | Sjenêve | |
| wurkpaad | ||
| berop/amt | Fleander | |
| reden bekendheid | Earste Hongaarske froulike fleander | |
Lilly Helene Steinschneider-Wenckheim (13 jannewaris 1891 – 28 maart 1975), better bekend as Lilly Steinschneider, wie de earste Hongaarske frou dy't har kwalifisearre as piloat.
Libben en wurk
[bewurkje seksje | boarne bewurkje]Har âlden wiene Bernát Steinschneider en Irma Wohr. Doe't se 19 jier wie ferliet Lilly Steinschneider it âlderlik hûs om tsjin de winsken fan har âlden yn oplieding ta fleander te folgjen. Sy wie de twadde frou yn Eastenryk-Hongarije dy't har piloatelisinsje yn augustus 1912 krige ûnder Karl Illner yn Wiener Neustadt. Allinnich de Boheemske fleander Božena Laglerová hie dat foar har dien. Yn Hongarije krige se har piloatebrevet nûmer 4.
Steinschneider-Wenckheim fleach in Etrich Taube. Earder hie it allinnich meidien as "ballast" yn prestaasjeflechten - bygelyks mei Heinrich Bier, Joseph Sablatnig op in lange-ôfstânsflecht, en mei Hans Vollmöller yn in úthâldingsflecht - om't yn dy tiid passazjiers ferplicht wiene yn guon dissiplines.
Se soarge foar opskuor troch as frou mei te dwaan oan de loftshow fan 1913 op fleanfjild Aspern. Har motor gie stikken, en se waard twongen om in needlâning te meitsjen, dy't se mei lichte ferwûnings oerlibbe. Neist bewûndering hie se ek te krijen mei antysemityske en seksistyske fijannigens.
Lilly Steinschneider spile mei it idee om militêr piloat te wurden, mar froulju mochten net yn it leger. Mei it útbrekken fan 'e Earste Wrâldoarloch yn 1914 waard de boargerloftfeart stillein; sadwaande kaam der in ein oan har karriêre as piloate. Yn 1915 boaske se oan greve Johann Coudenhove-Kalergi en wenne se by him op it kastiel Ronsperg yn Bohemen. Ek nei de oarloch is se nea wer begûn mei fleanen. Yn 'e jierren 1920 en 1930 hold se in soad ta yn it bûtenlân troch en wie se komselden thús.
Yn 1927 waard harren dochter Maria-Electa berne. Doe't de Dútsktalige regio's fan Tsjechoslowakije yn 'e hjerst fan 1938 troch it Dútske Ryk beset waarden as gefolch fan it Ferdrach fan München, wie Lilly Coudenhove-Kalergi yn it bûtenlân. Sa ûntkaam de Joadske frou, doopt yn de Roomsk-Katolike Tsjerke, oan ferfolging troch de nazy's en oerlibbe se yn Itaalje. Nei de Twadde Wrâldoarloch gie it pear útmekoar en skiede lang om let yn 1960.[3]
Neitins
[bewurkje seksje | boarne bewurkje]De Lilly-Steinschneider-Gasse yn Wiener Neustadt yn Eastenryk waard nei har ferneamd.
De skriuwer Bernhard Setzwein beskriuwt har libben en houlik mei Johann Graf Coudenhove-Kalergi yn syn roman Der böhmische Samurai, publisearre yn 2017.[1]
Yn 2024 waard it libben fan Lilly Steinschneider ferfilme foar Universum History fan de ORF op orizjinele lokaasjes yn Wiener Neustadt. [2]
 | Ofbylden dy't by dit ûnderwerp hearre, binne te finen yn de kategory Lilly Steinschneider fan Wikimedia Commons. |
| Boarnen, noaten en/as referinsjes: |
|
Sjoch de:Lilly Steinschneider
|