Lânglider

In lânglider (Ingelsk: landspeeder, letterlik: "lânhastiger") is in fiktyf ferfiermiddel út 'e Star Wars-franchise. It is in soarte fan auto sûnder tsjillen, dy't gebrûk makket fan anty-graviteitstechnology om in lyts eintsje (30 sm oant ¹/₂ m) boppe de grûn te sweven. Lângliders wurde yn 'e films en tillefyzjesearjes fan 'e Star Wars-franchise sawol foar boargerlike as militêre doelen brûkt. De lânglider waard yntrodusearre yn Star Wars: From the Adventures of Luke Skywalker, de ferboeking fan 'e earste Star Wars-film, dy't yn 1976 útkaam, in jier foàr de film.

Yn Star Wars: Episode IV – A New Hope (1977), it earste diel fan 'e oarspronklike Star Wars-filmtrilogy, hat haadpersoan Luke Skywalker in lânglider fan it type X-34, dy't er yn 'e delsetting Mos Eisley ferkeapet foar't er syn thúswrâld Tatooine ferlit om him by it Rebelleferbûn te jaan. De X-34, dat nei alle gedachten noch altyd it bekendste model lânglider is, wurdt produsearre troch de SoroSuub Korporaasje en kin twa persoanen ferfiere: in piloat en in passazjier. Efter de stuollen foar dy beiden befine har magnetyske klammen dêr't androïden en oare bagaazje mei fêstset wurde kin. Dit type lânglider hat gjin dak, mar wol in útskober foarrút. De X-34 hat in lingte fan 3.40 m. De maksimale faasje bedraacht 250 km/o, en de maksimale hichte boppe de grûn is 1 m.

Oare modellen lângliders dy't yn 'e filmsearje fan Star Wars brûkt wurde, binne:

De flitsglider (Ingelsk: flash speeder), in patrûljefiertúch mei in lingte fan 4.50 m, dat yn Star Wars: Episode I – The Phantom Menace (1999) yn gebrûk is by de Nabooaanske kriichsmacht.
De Gian-glider (Ingelsk: Gian speeder), in swierder type lânglider fan 'e Nabooaanske kriichsmacht, ek út The Phantom Menace, dat bedoeld is om ynset te wurden yn gefjochtssitewaasjes. Dit model is tarist mei bepânsering en in twatal plofferkanonnen oan 'e sydkanten. Der passe in piloat, in kanonnier en twa passazjiers yn.
de M-68, in populêr model foar it meidwaan oan strjitraces mei in topfaasje fan 225 km/o; sa'nent wurdt yn Solo: A Star Wars Story (2018) kaapt troch Han Solo en Qi'ra om te ûntkommen oan 'e binde de Wite Wjirmen.
de A-A4B Truckglider, in model lânglider bedoeld foar transport fan grutte ladings guod (in soarte fan swevende frachtwein). Sa'n lânglider komt ek foar by de efterfolging yn Solo: A Star Wars Story.

De sniegliders (snowspeeders), dy't de rebellen yn Star Wars: Episode V – The Empire Strikes Back (1980) ynsette by de ferdigening fan harren basis op 'e iisplaneet Hoth tsjin 'e AT-AT's fan 'e Keizerlike stoarmtroepers, binne eins oanpaste lângliders.

Sjoch ek[bewurkje seksje | boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: Bibliography en References, op dizze side.