Koromandeliisfûgel

Koromandeliisfûgel
	; Koromandeliisfûgel yn it Nasjonaal Park Sundarbans (Yndia)
taksonomy
ryk	dieren (Animalia)
stamme	rêchstringdieren (Chordata)
klasse	fûgels (Aves)
skift	rôldereftigen (Coraciiformes)
famylje	iisfûgels (Alcedinidae)
skaai	echte beamiisfûgels (Halcyon)
soarte
Halcyon coromanda
	Latham, 1790
	IUCN-status: net bedrige

De Koromandeliisfûgel of rôze iisfûgel (Halcyon coromanda) is in fûgel fan it skaai echte beamiisfûgels (Halcyon) út de famylje iisfûgels (Alcedinidae). De binomiale namme ferwiist nei de Koromandelkust yn Yndia.

Beskriuwing

De oant likernôch 25 sm lange readbrune iisfûgel hat in tige grutte, helderreade snaffel en poaten yn 'e selde kleur. It bealchje is readbrún oant okergiel mei op 'e sturt en wjukken faak pears of fiolet. Der is hast gjin seksuëel dimorfisme, alhoewol't guon boarnen skriuwe dat de mantsjes wat helderder kleuren ha.

Fersprieding

De soarte komt foar yn tichte bosken en reinwâlden en dêrfandinne wurdt de fûgel faker heart as sjoen. It ferspriedingsgebiet leit tusken Súd-Koreä en Japan yn it noarden oant de Filipinen en de Sûnda-eilannen yn it suden en Sina en Yndia yn it westen. It is in trekfûgel. Winterdeis trekke fûgels út it noardlike ferspriedingsgebiet oant Borneo ta. De readbrune iisfûgel is seldsum yn Japan, dêr't fûgeltsjelju foar de fûgel útrinne, wylst yn oare dielen de readbrune iisfûgel lokaal algemien is.

Gedrach

Lykas oare iisfûgels ite readbrune iisfûgels meast fisk, grutte ynsekten en skaaldieren. Se ite yn gebieten mei minder streamend wetter ek kikkerts en oare amfibyen.

Undersoarten

Fan 'e soarte binne de folgjende ûndersoarten bekend:

Undersoarten Koromandeliisfûgel
Wittenskiplike namme	Beskriuwer	Fersprieding	Karakteristyk
H. c. coromanda	Latham (1790)	Nepal, Sikkim, Bûtan, West-Bengalen, Bangladesj, Noard-Birma en Súdwest-Sina, eastlik oant Makau. Oerwinteret op it Maleizysk skiereilân, Sumatra en Java	Lila oant readbrún, sulverblauwe stút, reade snaffel en poaten.
H. c. major	Coenraad Jacob Temminck & Schlegel (1848)	Japan, Súd-Koreä en Noardeast-Sina, trekfûgel yn East-Sina, Taiwan, Rjûkjû-eilannen, Filipinen, Sulawesi en (selden) Borneo.	Underkant bleker as de nominaatfoarm en minder fiolet, dielen fan 'e stút blau en oant in smelle streek redusearre. Underkant learkleuriger en folle bleker as de nominaatfoarm. Snaffel smeller, langere wjukken.
H. c. mizorhina	Harry Church Oberholser (1915)	Andamanen, Súdwest-Birma	Boppekant readbrún mei ljochtfiolette glâns, ûnderkant donkerder as de nominaatfoarm, boarst mei bleek fiolet. Langere snaffel.
H. c. bangsi	Harry Church Oberholser (1915)	Rjûkjû-eilannen, East-Taiwan. Oerwinteret op 'e Filipinen súdlik fan 'e Talaud-eilannen.	Boppekant folle donkerder en fioletter. Underkant donkerder en djippere snaffelbasis as de nominaatfoarm. Lange wjukken.
H. c. minor	Coenraad Jacob Temminck & Schlegel (1848)	Fan it Maleizyske skiereilân oant Singapoer, Riau-eilannen, Sumatra, Mentawai-eilannen, Bangka en Belitun, West-Java en Borneo.	Boppekant donkerder, ûnderfant folle donkerder as nominaatfoarm, kastanjekleuren. Kroan, mantel en boarst glânzgjend mei fiolette swym. Stút hat in grutter wyt plak. Koarte wjukken.
H. c. linae	Hubbard & Du Pont (1974)	Palawan en Tawi-Tawi (Súdwest-Filipinen)	Lykas de H. c. minor, mar in wat donkerder boppe- en ûnderpart. Mantel en boarst hast donkerpears.
H. c. claudiae	Hubbard & Du Pont (1974)	Tawi-Tawi (súdlike Sulu-arsjipel)
H. c. rufa	Wallace (1863)	Sulawesi en in pear by de kust lizzende eilannen.	Lykas H.c. minor, mar minder donker. Stút bleek blau skimerjend. Lange wjukken, lange snaffel en koarte sturt.
H. c. pelingensis	Neumann (1939)	Op it eilân Peleng (Banggai-eilannen, Yndoneezje).	Lykas H.c. rufa, mei in sulverkleurige stút.
H. c. sulana	Mees (1970)	Sûla-eilannen eastlik fan Peleng	Lykas de nominaatfoarm, mar mear fiolet en lange wjukken en in lange snaffel.

Status

De wrâldpopulaasje fan 'e Koromandeliisfûgel is net kwantifisearre, mar de soarte is yn in grut part fan it ferspriedingsgebiet seldsum. Oannommen wurdt dat de soarte yn oantallen tebekrint troch biotoopferlies. Ek wurde der fûgels sammele om se te preparearjen. De soarte wurdt troch de IUCN as net bedrige klassifisearre (2016).

Keppeling om utens

Boarnen, noaten en referinsjes

Boarnen, noaten en/as referinsjes:

Sjoch foar boarnen en/of referinsjes op en:Ruddy kingfisher en de:Feuerliest (ûndersoarten)

Wikimedia Commons

Ofbylden dy't by dit ûnderwerp hearre, binne te finen yn de kategory Koromandeliisfûgel fan Wikimedia Commons.