Kazankatedraal (Sint-Petersburch)

	Kazankatedraal Казанский собор
	bouwurk
	lokaasje
lân	Ruslân
plak	Sint-Petersburch
adres	Nevski Prospekt
koördinaten	59° 56' N 30° 19' E
	bysûnderheden
type bouwurk	Katedraal
boujier	1801—1811
arsjitekt	Andrej Nikiforovitsj Voronchin
boustyl	Klassisisme
monumintale status	Monumint fan federaal belang
monumintnûmer	7810539000
	offisjele webside
	kazansky-spb.ru

De Katedraal fan Us Leaffrou fan Kazan of, yn 't koart, de Kazankathedraal (Russysk: Казанский собор) is in russysk-otterdokse tsjerke oan de Nevski Prospekt yn Sint-Petersburch.

De bou[bewurkje seksje | boarne bewurkje]

De katedraal waard tusken 1801 en 1811 yn opdracht fan tsaar Paul I boud en ferfong in tsjerke dy't wijd wie oan de berte fan de Hillige Jongfaam. It ûntwerp fan de katedraal wie ôfkomstich fan de arsjitekt Andrei Voronichin en is ynspirearre op de Romeinske Sint-Piter. Alhoewol't de Russysk-Otterdokse Tsjerke de plannen ôfkarde om in op in katolike basilyk ynspirearre tsjerke te bouwen yn de doedestiidske haadstêd fan Ruslân, hie it ûntwerp de stipe fan it hôf.

Karakteristyk oan de tsjerke is de 111 meter lange kolonnade mei 96 pylders, dy't yn in bôge it plein foar in part omklammet. De troch rôze pylders droegen tsjerke is binnen rûm, mar tsjuster en wurdt ferljochte troch grutte kroanluchters. De ûnbidich grutte brûnzen doarren binne ien fan de trije replika's fan de doopkapel fan de domtsjerke fan Florence. Oan de ikoanen hawwe de bêste russyske skilders út dy tiid wurke. De ikonostase bleau mar foar in diel bewarre.

Skiednis[bewurkje seksje | boarne bewurkje]

Nei't yn 1812 Napoleon Ruslân binnenfoel, socht maarskalk Michail Kûtûzov help by Us Leaffrou fan Kazan, oan wa't de tsjerke wijd wie. Doe't de oarloch oer wie moast de katedraal yn it foarste plak in monumint wurde ta oantinken fan de russyske oerwinning op Napoleon. Kûtûzov soe sels yn 1813 yn de katedraal byset wurde. Twa jier letter waarden de kaaien fan santjin stêden en acht fêstings út Jeropa oerbrocht en yn de sakristy fan de tsjerke ophongen. De twa bylden fan Kûtûzov en Barclay de Tolly foar de katedraal binnen in ûntwerp fan Boris Orlovski út 1837.

De earste politik demonstraasje fan Ruslân, de Kazan-demonstraasje, fûn yn 1876 foar de katedraal plak. Nei de Oktoberrevolúsje waard de katedraal ûnteigene en sletten foar de earetsjinst. Yn 1932 krige it in nije bestimming as in Museum fan de Skiednis fan Religy en Ateïsme. It duorre oant 1998 ear't it gebou wer brûkt waard dêr't it foar ornearre wie.

Yn 2002 waard de katedraal wer oan de Russysk-Otterdokse Tsjerke werom jûn.