Joanne Dru

Joanne Dru
akteur
Joanne Dru yn 1960.
persoanlike bysûnderheden
echte namme	Joan Letitia LaCock
nasjonaliteit	Amerikaansk
berne	31 jannewaris 1922
berteplak	Logan (West-Firginia)
stoarn	10 septimber 1996
stjerplak	Los Angeles (Kalifornje)
etnisiteit	Ingelsk Nederlânsk Hugenoatsk
jierren aktyf	1946 – 1980
offisjele webside
Joanne Dru yn 'e IMDb

Joanne Dru (wiere namme: Joan Letitia LaCock; Logan (West-Firginia), 31 jannewaris 1922 – Los Angeles, 10 septimber 1996) wie in Amerikaansk aktrise dy't it hichtepunt fan har karriêre yn 'e twadde helte fan 'e 1940-er jierren en yn 'e 1950-er jierren belibbe. Se spile benammen yn films en tillefyzjesearjes. Dru krige bekendheid mei rollen yn films as Red River, She Wore a Yellow Ribbon, All the King's Men en Wagon Master.

Libben en karriêre

Komôf

Joanne Dru waard yn 1922 berne yn Logan yn 'e Amerikaanske steat West-Firginia as Joan Letitia LaCock. Hja wie foar it meastepart fan Ingelsk en Nederlânsk etnysk komôf. De efternamme 'LaCock' wie in beërf fan Hugenoatske (protestantske Frânske) foarâlden, dy't yn 'e santjinde iuw Frankryk ûntflechte wiene foar leauwensferfolging. Dru wie de âldere suster fan Peter Marshall, in akteur en sjonger dy't better bekend waard as de oarspronklike presintator fan 'e Amerikaanske tillefyzjekwis Hollywood Squares.

In publisiteitsfoto fan Joanne Dru út 1953.

Karriêre

Yn 1940 sette Dru mei achttjin jier nei New York, dêr't se earst wurk fûn as model en letter in lytse rol krige yn it toanielstik Hold On to Your Hats op Broadway. Doe't se mids 1940-er jierren nei Los Angeles ferfear, spile se dêr yn 't earstoan ek op it toaniel. Dêr waard se opmurken troch in talintescout fan 'e filmyndustry fan Hollywood. Har earste filmrol hie Dru yn 1946 yn 'e Abie's Irish Rose.

It hichtepunt fan har karriêre belibbe Dru yn 'e folgjende tsien jier, doe't se in protte yn films en tillefyzjesearjes te sjen wie. Se waard gauris cast yn westerns, lykas Red River (1948) fan regisseur Howard Hawk, en She Wore a Yellow Ribbon (1949) en Wagon Master (1950), beide fan John Ford. Dêrnjonken krige Dru in protte lof foar har aktearprestaasje yn 'e dramafilm All the King's Men út 1949, dy't de Oscar foar Bêste Film wûn. Se spile ek yn 'e film noir 711 Ocean Drive (1950), de dramafilm Thunder Bay (1953) en de komeedzjefilm 3 Ring Circus (1954). Yn 'e biografyske sportfilm The Pride of St. Louis (1952), fertolke se de rol fan Patricia Nash Dean, de frou fan honkballer Dizzy Dean, en yn it bibelske drama Day of Triumph (1954) spile se Marije Magdalena.

Har karriêre as filmaktrise sakke yn 'e twadde helte fan 'e 1950-er jierren wat yn, mar Dru wie yn dy snuorje nammenste mear op 'e tillefyzje te sjen. Dêr hie se fral gastrollen yn searjes, mar yn 1960–1961 spile se ien fan 'e haadrollen as Babs Hooten yn 'e komeedzjesearje Guestward Ho! fan tillefyzjenetwurk ABC. Nei't dy searje stopsetten wie, ferskynde Dru yn 'e rest fan 'e 1960-er jierren en de 1970-er jierren almar mear sporadysk op 'e tillefyzje en noch mar yn in pear films. Har lêste rol hie se yn 1980 yn 'e Italjaanske aksjekomeedzje Poliziotto Superpiù.

In byld út 'e tillefyzjesearje Guestward Ho! (1960). Babs (Joanne Dru) en har man Bill Hooten (Mark Miller) ûntdekke dat ien fan 'e hynders op harren fakânsjeranch leaver yn 'e lobby tahâldt as yn syn stâl.

Benammen foar har bydragen oan 'e tillefyzjeyndustry krige Joanne Dru yn 1960 in stjer op 'e Hollywood Walk of Fame.

Priveelibben

Joanne Dru troude fjouwer kear. De earste kear wie yn 1941 mei sjonger en akteur Dick Haynes. Dat houlik, dêr't Dru trije bern út krige, einige yn 1949 yn in skieding. Minder as in moanne letter wertroude Dru mei akteur John Ireland, har tsjinspiler út 'e film All the King's Men. Fan him skiede se yn 1957 sûnder bern krigen te hawwen. Ut har lêste beide houliken hie se likemin bern. Dy wiene mei in George Pierose fan 1963 oant syn ferstjerren yn 1972, en mei de ûntwerper fan ferdivedaasjeparken C.V. Wood fan 1972 oant syn ferstjerren yn 1992.

Op polityk mêd wie Dru in fûleindich oanhinger fan 'e Republikeinske Partij. Se stipe de Republikeinske presidintskandidaat Barry Goldwater by de Amerikaanske presidintsferkiezings fan 1964 en wie yn 1968 ien fan 'e nûge gasten by in cocktailparty om jild yn te sammeljen foar de politike kampanje fan Richard Nixon.

Ferstjerren

Joanne Dru ferstoar op 10 septimber 1996 yn Los Angeles yn 'e âlderdom fan 74 jier. De deadsoarsaak wie in oandwaning oan 'e luchtwegen dy't him ûntwikkele hie út lymfoedeem. Neffens har broer Peter Marshall wie dy oandwaning it gefolch fan 'e gemoterapy dy't Dru earder yn har libben krigen hie. Joanne Dru waard kremearre, wêrnei't har jiske útstruid waard oer de Stille Oseaan.

Filmografy

• 
  Joanne Dru mei Montgomery Clift yn Red River (1948).
• 
  Joanne Dru mei John Wayne yn She Wore a Yellow Ribbon (1949).
• 
  Joanne Dru mei Ben Johnson yn Wagon Master (1950).
• 
  Joanne Dru mei Robert Walker yn Vengeance Valley (1951).

Filmografy as aktrise
jier	titel	rol of funksje	opmerkings
films
1946	Abie's Rose Marie	Rosemary Murphy Levy
1948	Red River	Tess Millay
1949	She Wore a Yellow Ribbon	Olivia Dandridge
1949	All the King's Men	Anne Stanton
1950	Wagon Master	Denver
1950	711 Ocean Drive	Gail Mason
1951	Vengeance Valley	Jen Strobie
1951	Mr. Belvedere Rings the Bell	Harriet Tripp
1952	Return of the Texan	Ann Marshall
1952	The Pride of St. Louis	Patricia Nash Dean
1952	My Pal Gus	Lydia Marble
1953	Thunder Bay	Stella Rigaud
1953	Hannah Lee: An American Primitive	Hannah Lee / Hallie McLaird
1953	Forbidden	Christine
1954	Duffy of San Quentin	Anne Halsey
1954	Siege at Red River	Nora Curtis
1954	Southwest Passage	Lilly
1954	3 Ring Circus	Jill Brent
1954	Day of Triumph	Marije Magdalena
1955	The Dark Avenger	lady Joan Holland
1955	Sincerely Yours	Marion Moore
1955	Hell on Frisco Bay	Marcia Rollins
1957	Drango	Kate Calder
1958	The Light in the Forest	Milly Elder
1959	The Wild and the Innocent	Marcy Howard
1960	September Storm	Anne Traymore
1965	Sylvia	Jane Bronson Phillips
1980	Poliziotto Superpiù	Rosy LaBouche
tillefyzje
1951	Your Show of Shows	ûnbekend	gastrol; ôfl. 2.19
1951	Pulitzer Prize Playhouse	Christina Phelps	gastrol; ôfl. The Silver Cord
1953	Robert Montgomery Presents	ûnbekend	gastrol; ôfl. Betrayed
1953	Schlitz Playhouse of Stars	Dinny	gastrol; ôfl. Richard and the Lion
1953	The Revlon Mirror Theater	ûnbekend	gastrol; ôfl. Heads or Tails
1954	The Ford Television Theatre	dokter	gastrol; ôfl. Just What the Doctor Ordered
1954	Lux Video Theatre	Nancy	gastrol; ôfl. Call of the Wedding
1954	The Ford Television Theatre	Wendy	gastrol; ôfl. Yours for a Dream
1954	Lux Video Theatre	Polly	gastrol; ôfl. An Angel Went AWOL
1955	Four Star Playhouse	Delight	gastrol; ôfl. A Kiss for Mr. Lincoln
1955	The Star and the Story	Pat Lowry	gastrol; ôfl. Brief Affair
1955	The Ford Television Theatre	Myla Marshall	gastrol; ôfl. Celebrity
1955	Letter to Loretta	Alice	gastrol; ôfl. The Waiting Game
1955	Climax!	Marcia	gastrol; ôfl. The Darkest Hour
1955	The Ford Television Theatre	lady Mary Tighe	gastrol; ôfl. Passage to Yesterday
1956	Schlitz Playhouse of Stars	ûnbekend	gastrol; ôfl. The Gentle Stranger
1956	Jane Wyman Presents: The Fireside Theatre	Kittura	gastrol; ôfl. The Mirror
1956	Celebrity Playhouse	Kay Gordon	gastrol; ôfl. Shadow of a Thief
1956	Studio 57	Martha	gastrol; ôfl. The Palm Springs Incident
1956	Lux Video Theatre	Lane Bellamy	gastrol; ôfl. Flamingo Road
1956	Climax!	Nancy	gastrol; ôfl. Night Shriek
1957	Playhouse 90	Elizabeth Blackwell	gastrol; ôfl. The Blackwell Story
1957	Lux Video Theatre	Marianne	gastrol; ôfl. Paris Calling
1957	Wagon Train	Laura Collins	gastrol; ôfl. The Nels Stack Story
1957	Matinee Theater	ûnbekend	gastrol; ôfl. The Ransom of Sigmund Freud
1958	Studio One	Suzie Sherrell	gastrol; ôfl. The Brotherhood of the Bell
1958	General Electric Theater	Alice Giles	gastrol; ôfl. All I Survey
1958	Colgate Theatre	Marilyn Woods	gastrol; ôfl. Adventures of a Model
1958	The Red Skelton Show	Sally	gastrol; ôfl. Valentine Day's Double Date
1959	The David Niven Show	Ellen Baird	gastrol; ôfl. The Lady from Winnetka
1960	Goodyear Theatre en Alcoa Theatre	Kate Ballister	gastrol; ôfl. Capital Gains
1960–1961	Guestward Ho!	Babs Hooten	fêste rol; 38 ôfl.
1964	Burke's Law	Solange Kelly	gastrol; ôfl. Who Killed the Eleventh Best Dressed Woman in the World?
1965	The Long, Hot Summer	Martha Ross	gastrol; ôfl. Nor Hell a Fury
1967	The Green Hornet	Sabrina Bradley	gastrol; ôfl. Corpse of the Year, Part 1 en Part 2
1967	Bob Hope Presents: The Chrysler Theatre	Gina Sutton	gastrol; ôfl. To Sleep, Perchance to Scream
1970	The Governor & J.J.	Karen Bradshaw	weromkearende rol; ôfl. Bye, George en Twice in a Lifetime
1971	The Smith Family	Lisa Benton	gastrol; ôfl. Remember Lisa
1975	Marcus Welby, M.D.	Dorothy Brander	gastrol; ôfl. Dark Corridors
harkspullen
1952	Stars over Hollywood	ûnbekend
1953	Hollywood Star Playhouse	ûnbekend

Keppelings om utens

• (in) Folsleine filmografy fan Joanne Dru yn 'e Internet Movie Database (IMDb)
• (in) Filmografy fan Joanne Dru yn 'e TCM Movie Database (argivearre)
• (in) Wurk fan Joanne Dru yn 'e Internet Broadway Database (IBD)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Joanne Dru fan Wikimedia Commons.