Jean-Adrien Guignet

	Jean-Adrien Guignet
	keunstner
	Selsportret, 1854 (Autun, musée Rolin)
	persoanlike bysûnderheden
nasjonaliteit	Frankryk
berne	21 jannewaris 1816
berteplak	Annecy
stoarn	19 maaie 1854 (38 jier)
stjerplak	Parys
	wurkpaad
bekendste ; wurk(en)	Sjoch galery
	offisjele webside
	Gjint

Jean-Adrien Guignet (21 jannewaris 1816 - 19 maaie 1854) wie in Frânske oriïntalistyske skilder.

Libben en wurk

Guignet waard grutbrocht yn Annecy dêr't syn men weikaam.

Fan 1832 oant 1839 studearre er skilderkeunst yn it atelier fan Merry-Joseph Blondel en al yn 1840 ferskynde er op de Paryske Salon mei ferskate wurken, wêrûnder inkelde mei in eastersk tintsje en Egyptyske sfear op bibelske motiven dêr't er it meast foar yn it sin brocht wurdt, lykas Mozes ûntmaskere oan it wetter fan de Nijl, Hagar yn de woestyn of Jozef dy't de dreamen fan syn bruorren útleit.

Hy die mei oan de Salon fan 1841 mei in oar wurk mei in Egyptysk tema, Cambyses en Psametic, wêryn't er de episoade útbylde fan de finzenskip fan Psametic III nei de ynname fan Memphis troch de Perzyske kening Cambyses II, dy't syn eigen dochter foargean liet mei in krûk as teken fan slavernij. It waard yn de Salon oankocht troch Louis Philippe d' Orléans en wurdt no útstald yn it Musée du Louvre.

Hy bleau geregeld eksposearjen yn de salons fan de jierren dêrnei, mei wurken lykas in episoade fan de De Weromtocht fan 'e Tsientûzen, presintearre yn 1843 en ek eigendom fan it Musée du Louvre, en Jozef dy't de dreamen fan de farao útleit, ien fan syn populêrste wurken, presintearre yn 1845 en eigendom fan it Musée des Beaux-Arts yn Rouen.

Nei de Salon fan 1848, de lêste dêr't er oan dielnaam, dêr't er ferskate lânskippen, in Flecht nei Egypte en in oaljeferveskilderij mei as tema Don Quichot dy't mâle dingen docht, presintearre, joech de hartoch fan Luynes him de opdracht om de ytkeamer fan syn kastiel yn Dampierre te dekorearjen, in taak dêr't er de lêste seis jier fan syn libben oan bestege en dy't er nea dienmakke.

As skilder waard er altyd karakterisearre troch in passy foar de eksoatyske en mysterieuze lânskippen dy't yn syn wurken werom te finen binne. Syn jongere broer, Jean-Baptiste Guignet, wie in skilder dy't him spesjaal talei op it skilderjen fan portretten.