James Berardinelli

Ut Wikipedy
Springe nei navigaasje Springe nei sykjen
James Berardinelli
persoanlike bysûnderheden
echte namme James Berardinelli
nasjonaliteit Flag of the United States.svg Amerikaansk
berne 25 septimber 1967
berteplak New Brunswick (Nij-Jersey)
etnisiteit Flag of Italy.svg Italjaansk
wurkpaad
berop/amt filmkritikus
aktyf as auteur
jierren aktyf 1993 – no
offisjele webside
www.reelviews.net

James Berardinelli (New Brunswick (Nij-Jersey), 25 septimber 1967) is in Amerikaansk filmkritikus, publisist en romanskriuwer. Hy publisearret syn resinsjes op it ynternet op 'e webside ReelViews. Njonken twa boeken mei sammele kritiken fan op dvd útbrochte films hat er ek fjouwer fantasyromans publisearre.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Berardinelli waard yn 1967 berne yn New Brunswick yn 'e Amerikaanske steat Nij-Jersey. Hy is fan etnysk Italjaansk komôf, en brocht syn iere jonkheid troch yn Morristown (Nij-Jersey). Doe't er njoggen jier wie, ferhuzen syn âldelju mei him nei Cherry Hill (Nij-Jersey), dêr't er fuortset ûnderwiis folge oan 'e Cherry Hill High School East. Letter ferfear de famylje Berardinelli nei Piscataway (Nij-Jersey). Fan 1985 oant 1990 learde Berardinelli fierder oan 'e Universiteit fan Pennsylvania yn Philadelphia, dêr't er in bachelortitel yn 'e natuerwittenskippen en in mastergraad yn elektrotechnyk behelle.

Karriêre[bewurkje seksje | boarne bewurkje]

Nei't er ôfstudearre wie, fûn Berardinelli yn 1990 in baan by de Bellcore Company (no Telcordia Technologies). De folgjende fyftin jier wurke er dêr yn in ferskaat oan funksjes, wêrby't er behelle wie by de ûntwikkeling en produksje fan glêsfezelkeabels, fideosystemen en softwareprogramma's.

Yn syn frije tiid begûn Berardinelli fan 1993 ôf resinsjes fan films dy't er sjoen hie, te publisearjen fia Usenet. De earste film dêr't er oer skreau wie Scent of a Woman, út 1992. Mei de opkomst fan it ynternet yn 'e twadde helte fan 'e 1990-er jierren begûn Berardinelli syn eigen webside, ReelViews.net. Behalven syn filmresinsjes publisearret er dêr ek syn blôch ReelThoughts.

Yn 2001 krige Berardinelli bekendheid by in breder publyk doe't de foaroansteande filmkritikus Roger Ebert him oanpriizge as "de bêste fan 'e kritisy dy't fia it ynternet wurkje". Ebert skreau ek it foarwurd by Berardinelli syn boek ReelViews: The Ultimate Guide to the Best 1,000 Modern Movies on DVD and Video, út 2003, dat in sammeling fan syn eardere filmresinsjes wie. Anno 2016 is Berardinelli in lid fan 'e Broadcast Film Critics Association. Teffens is er in filmkritikus dy't goedkard is troch de webside Rotten Tomatoes (dy't filmresinsjes sammelet om ta in trochsneedbeoardieling fan films te kommen).

Yn septimber 2013 makke Berardinelli bekend dat er wurke oan in trilogy fan fantasyromans, mei as titel The Last Whisper of the Gods. It earste diel kaam út yn novimber 2015, it twadde yn jannewaris 2016 en it slot yn maart 2016. Yn 2017 ferskynde fan syn hân in fjirde roman, The Lingering Haze.

Priveelibben[bewurkje seksje | boarne bewurkje]

Berardinelli omskriuwt himsels op religieus mêd as in agnost en op polityk mêd as in libertariër. Hy wennet (anno 2016) yn Mount Laurel yn Nij-Jersey mei syn frou Sheryl, mei wa't er yn 'e kunde kommen is fia syn webside. Hja hawwe twa bern: in soan berne yn maaie 2010 en in dochter berne yn novimber 2019.

Wurk[bewurkje seksje | boarne bewurkje]

non-fiksje
  • 2003 – ReelViews: The Ultimate Guide to the Best 1,000 Modern Movies on DVD and Video
  • 2005 – ReelViews 2: The Ultimate Guide to the Best 1,000 Modern Movies on DVD and Video
fiksje
  • The Last Whisper of the Gods (trilogy)
    • 2015 – The Last Whisper of the Gods
    • 2016 – The Curse of the Gift
    • 2016 – The Shadow of the Otherverse
  • 2017 – The Lingering Haze

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.