Fly

Nederlân om 800 hinne

It Fly is it wetter dat Flylân skiedt fan Skylge.

Skiednis

Sa om it jier 800 hinne wienen Flylan en Skylge grutter as tsjintwurich. Flylân striek har út oant foarby de hjoeddeiske Ofslútdyk, op it plak fan de Waart en it Breesân, en omfieme ek Eierlân, dat no in part fan Teksel is. It Fly (doetiids Fli of Flehi neamd) rûn troch oant de omkriten fan Starum en foarme de skieding tusken Flylân en de fêste wâl fan West-Fryslân oan de westkânt en Skylge en de fêste wâl fan de tsjintwurdige provinsje Fryslân oan de eastkânt.

It Fly hie in wichtige funksje. It wie in brede slinke, dy't de ferbining foarme tusken de Flevomar en de Noardsee, in goed-befarbere route fan de Flevomar ta de Noardsee. Yn de Lex Frisionum (Friezenwet) foarme it Fly ien fan de skiedslinen: yn guon gefallen wurde foar it gebiet tusken Fly en Swin oare tallen neamd as foar it gebiet tusken Fly en Lauwers.

Waad

Mei it breder wurden is it Fly feroare ta de Sudersee en mei it oanlizzen fan de Ofslútdyk is dy part fan de Iselmar wurden. Hjoed-de-dei rint it Fly noch oer It Waad, fan de Lorentzslûzen nei de Noardsee. It lêste part is de Flystream, dy't tusken De Richel en Flylân oan de iene kant en Skylge oan de oare kant troch nei see rint.