Hypotetyske soarte

De Martinykara (Ara martinica).
(Yllustraasje fan Gerard Keulemans út 1907 op basis fan 'e beskriuwing fan Jacques Bouton út 'e 1630-er jierren.)

In hypotetyske soarte is in útstoarne soarte bist of plant dêr't fan oannommen wurdt dat dy bestien hat, mar wêrby't der gjin fysyk bewiis (mear) is fan dat bestean. Dat betsjut dat it bestean fan sa'n soarte berêst op in hypoteze. Sokke hypotetyske soarten hawwe gauris ta kontroverse laat, mei't der net selden biologen binne dy't twifelje oft se wol wier bestien hawwe. Wat it noch yngewikkelder makket, is dat men ornaris sprekt fan in soarte, mar dat it ek wol gean kin om in ûndersoarte fan in bekende soarte, mei't soks no net mear nei te gean is. Ek is noch mooglik dat it om in ferkearde identifikaasje giet fan in bekende soarte, bgl. wannear't dy yn it ferline koarte tiid as in troch de minske yntrodusearre eksoat op in plak foarkaam dêr't er eins net thúshearde.

Foarbylden fan hypotetyske soarten binne:

• sûchdieren:
  • de Andeswolf (Dasycyon hagenbecki); de langhalsseehûn (Phoca mutica); de Saharasjiraffe (Giraffa sahara); de Sineeske oaljefant (Elephas maximus rubridens); Sonnerats pipermûs (Diplomesodon sonnerati); de tsjilihûeke (Lama araucana);
• fûgels:
  • de bûnte gier (Sarcoramphus sacra); de Dominika-ara (Ara atwoodi); de fioletara (Anodorhynchus purpurascens); de Gûadelûpamazône (Amazona violacea); de Gûadelûpara (Ara guadeloupensis); de Gûadelûpparkyt (Psittacara labati); de Jamaikaanske reade ara (Ara gossei); de Madearafink (Goniaphea leucocephala); de Martinykamazône (Amazona martinicana); de Martinykara (Ara martinica); de Raiateaprotter (Aplonis? ulietensis); de readkopara (Ara erythrocephala); de Reünionmoerashin (Porphyrio caerulescens); Sushkins goes (Anser neglectus); de Tahityporsleinhin (Zapornia nigra); de washingtonearn of grutte see-earn (Haliaetus washingtoni);
• fisken:
  • de abyssale reinbôgekaaimansnoek (gjin wittenskiplike namme); de reuzedrakefisk (Bathysphaera intacta);
• planten:
  • de Laysanwaaierpalm (gjin wittenskiplike namme).

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.