Gurbe Douwstra

Ut Wikipedy
Gean nei: navigaasje, sykje
Gurbe Douwstra

Gurbe Douwstra (Drachten, 17 febrewaris 1954) is in Fryske sjonger.

Douwstra is hikke en tein yn Drachten, dêr’t er op it Ychtus Kolleezje syn gymnasium-diploma helle. Hjirnei gie hy nei Grins. Nei syn tsjinsttiid waard hy sjoernalist foar de Ommelander Courant en kaam hy te wenjen yn Uthuzen. Nei in pear jier bedarre hy wer yn Drachten neidat Douwstra wurk krige by de Ljouwerter Krante. Begjin tachtiger jierren gie er oan de slach by Omrop Fryslân, hy wie dêr ferslachjouwer en letter muzykredakteur en presintator. Douwstra is noch altyd wurksum foar de Omrop, op it stuit presintearret hy it radio program 'Muzyk yn bedriuw' en 'Radio Froskepôle'.

Muzyk[bewurkje seksje | boarne bewurkje]

Op it Ychtus Kolleezje spile Douwstra al yn ferskate skoalbands. Hy stifte syn eigen band yn dy tiid, mei de namme Ltd. Dêrnei hat hy noch by in stik as wat groepen sitten, bygelyks Managisha, Zenith en fan 1979 oant 1982 by Maîtresse, dat dêrnei ophold te bestean.

Nei Maîtresse hat hy in skoftlang net mear mei de muzyk dwaande west, mar nei it skriuwen fan inkele lieten foar de trouwerij fan twa freonen begûn hy dochs wer. Hjir ûntstie de folkgroep Bêdbuks út en sûnt 1999 sjongt hy benammen solo. Stadich oan waard de rom fan Douwstra yn Fryslân grutter, yn 2001 hat dat laat ta it meitsjen fan syn earste kompakt skiif, Dizze Stoarm. Fan dizze skiif komt ûnder oare it ferneamde ferske Lit jim Gean Friezen. Fan 2005 is syn skiif Myn Eigen Paad, mei ûnder oare Cliffs of Moher. Sa stie er twa kear op de Fryske Music Night.

Douwstra is in sjonger/lietskriuwer, dy't syn ferskes bringt yn de styl fan de Fryske trûbadoers. Dat docht er dan ek meast yn it Frysk. Syn lietsjes fariearje fan mankelike harklietsjes oant fleurige ferskes oer de (eigen)aardige saken fan it libben. De fariaasje yn teksten is dêrby al like grut as yn de muzyk, fan bytiden hast sintimenteel oant gekjeiende koartswyl, mei in best stik selsspot, mar wol allegear rjocht út it hert.

De lêste jierren treedt er ek geregeld op mei syn kollega-trûbadoers Doede Veeman, Jaap Louwes en Piter Wilkens as ‘de fjouwer trûbadoers’. Mei-inoar hawwe se yn 2004 de skiif ‘Der Tuskenút’ útbrocht en yn 2007 ferskynde fan dit kwartet de twadde cd ‘De âlde púndyk by del’. Dit as opmaat fan in ‘ôfskiedstoernee’ yn de hjerst fan 2007.

Ferskate ferskes fan Douwstra hawwe yn it ferline de Fryske Top 100 helle. Under oare syn nûmer Lit jim gean Friezen behelle hege posysjes yn de list. Syn nûmer Cliffs of Moher stiet sûnt 2008 op it earste plak yn de list.

Diskografy[bewurkje seksje | boarne bewurkje]

  • Dizze Stoarm (2001)
  • Myn eigen paad (2005)
  • Thús (2010)

Keppeling om utens[bewurkje seksje | boarne bewurkje]