Guardians of the Galaxy Vol. 3

Guardians of the Galaxy Vol. 3
film
(Filmposter yn 'e Ingelske Wikipedy)
makkers
regisseur	James Gunn
produsint	Kevin Feige
senario	James Gunn
basearre op	Guardians of the Galaxy fan    Dan Abnett en Andy Lanning
kamerarezjy	Henry Braham
muzyk	John Murphy
filmstudio	Marvel Studios
distribúsje	Walt Disney Studios    Motion Pictures
spilers
haadrollen	Chris Pratt Zoe Saldaña Karen Gillan Bradley Cooper Dave Bautista Pom Klementieff Vin Diesel
byrollen	Chukwudi Iwuji Will Poulter Sean Gunn Linda Cardellini
skaaimerken
lân/lannen	Feriene Steaten
premiêre	22 april 2023
foarm	langspylfilm
sjenre	science fiction-superheldefilm
taal	Ingelsk
spyltiid	150 minuten
budget en resultaten
budget	$250 miljoen
opbringst	$845,6 miljoen
prizen	1 × Saturn Award
filmsearje
filmsearje	Marvel Cinematic Universe
● foarich diel	Antman and the    Wasp: Quantumania
● folgjend diel	The Marvels

Guardians of the Galaxy Vol. 3 ("Vol." is koart foar "Volume") is in Amerikaanske science fiction-superheldefilm út 2023 ûnder rezjy fan James Gunn. De haadrollen waarden fertolke troch Chris Pratt, Zoe Saldaña, Karen Gillan, Bradley Cooper, Dave Bautista, Pom Klementieff en Vin Diesel, mei Chukwudi Iwuji, Will Poulter, Sean Gunn en Linda Cardellini yn 'e wichtichste byrollen. De titel betsjut "Beskermers fan it Stjerrestelsel Diel 3". De film is basearre op it team fan superhelden mei deselde namme út 'e strips fan útjouwerij Marvel Comics.

De plot folget in groepke bûtenierdske kriminelen dy't de ûnwierskynlike beskermers fan it Stjerrestelsel wurden binne. De genetysk manipulearre waskbear Rocket rekket by in oanfal swierferwûne. Om syn libben te rêden, moatte syn freonen it opnimme tsjin syn makker, de megalomane Hege Evolúsjonêr. Underwilens pakt Peter Quill om mei rou om it ferlies fan syn grutte leafde Gamora, dy't noch wol libbet, mar inkeld yn in ferzje fan foàr it begjin fan harren relaasje.

Guardians of the Galaxy Vol. 3 krige oer it algemien positive resinsjes fan 'e filmkritisy en wie yn 'e bioskopen in grut kommersjeel súkses. De film waard nominearre foar in Oscar, in Golden Globe, in Grammy, in Screen Actors Guild Award, in BAFTA en sân Saturn Awards, en wûn ien Saturn. Guardians of the Galaxy Vol. 3 makket diel út fan 'e Marvel Cinematic Universe-filmsearje. De film folget dêryn op Antman and the Wasp: Quantumania en giet foarôf oan The Marvels, beide ek út 2023.

Plot

De Beskermers fan it Stjerrestelsel rjochtsje harren nije haadkertier yn te Knowhere, in planetoïde dy't eins de ôfhoude holle fan in lang lyn ferstoarne god is. Dêr wurde se oanfallen troch Adam Warlock, in suver ûnferslaanbere kriger dy't foar dat doel makke is troch Ayesha, de hegepreesteresse fan 'e Soevereinen. Mei dat bûtenierdske ras fan tsjeppe mar net al te yntelliginte goudhûdige humanoïden hawwe de Beskermers it alris earder oan 'e stôk hân (sjoch: Guardians of the Galaxy Vol. 2), mar diskear giet it Ayesha net om wraak. It docht nammentlik bliken dat de Soevereinen skepen binne troch in tige rike en dêrtroch machtige, mar boppe-al megalomane wittenskipper, dy't himsels de Hege Evolúsjonêr neame lit. Dyselde hat der lucht fan krigen dat de genetysk manipulearre waskbear Rocket, ien fan syn iere eksperiminten, diel útmakket fan 'e Beskermers. Hy beskôget Rocket as syn eigendom en wol him weromhawwe. Ayesha stjoert Adam Warlock, dy't se as har soan beskôget, op 'e Beskermers ôf om't de Hege Evolúsjonêr driget dat er oars de Soevereinen en harren beskaving ferneatigje sil, dêr't er neffens himsels as harren skepper elts rjocht ta hat.

By de oanfal rekket Rocket swierferwûne, mar ear't Adam de yn koma rekke waskbear ûntfiere kin, minge de oare Beskermers har yn 'e striid. Adam jout harren in wan bruien oant de cyborg Nebula har earm yn in baarnend swurd feroaret en him dêrmei speetst. Hy giet dêr net oan dea, mar it is wol genôch om him op 'e flecht te driuwen. De med-packs fan 'e Beskermers, dy't oars sels fatale wûnen genêze kinne, wurkje net op Rocket om't Orgocorp, de organisaasje fan 'e Hege Evolúsjonêr, in 'deademansknop' yn syn genetyske opmaak oanbrocht hat. Mei't Rocket noch sa'n 48 oeren te libjen hat, sette syn freonen Peter Quill, Nebula, Drax de Ferneatiger, Mantis en de yntelliginte rinnende beam Groot fuortendaliks koers nei it haadkertier fan Orgocorp om in genetyske programmearkoade te sykjen dy't de 'deademansknop' útskeakelje kin.

Wylst Rocket yn koma leit en stadichwei tichter nei de dea ta driuwkelet, belibbet er wer syn ierste oantinkens (en wurdt syn oarsprongsferhaal einlings bekendmakke). As in waskbearejong dat by in besyk fan 'e Hege Evolúsjonêr oan 'e Ierde fongen en meinommen waard, kaam er oan board fan in reuseftich romteskip, it Arête Laboratoarium. Dêr waarden hy en alle oare bisten min behannele en yn lytse, smoarge koaien yn it rom finzen holden. Rocket waard it slachtoffer fan sûnder ferdôving útfierde genetyske eksperiminten troch de Hege Evolúsjonêr sels en syn mei kompjûters yn harren hollen tariste assistinten Vim en Theel. It resultaat wie dat syn yntelliginsje gâns fergrutte rekke en hy in antropomorfysk bist waard, wat de Hege Evolúsjonêr oantsjutte as in humanimal (fan human, "minske" en animal, "bist"). Rocket waard ferteld dat de humanimals bedoeld wiene om de ideäle maatskippij te foarmjen op in planeet dy't de Hege Evolúsjonêr, ferwizend nei de oarsprong fan 'e bewenners, Tsjin-Ierde neamt.

Tink derom: Yn de tekst hjirûnder wurdt de ôfrin fan de film beskreaun. As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Quill-en-dy berikke it haadkertier fan Orgocorp, dêr't Quill syn grutte leafde Gamora har by harren jout. Dat docht se net út 'e goedens fan har hert, mar om't se dêrta betelle wurdt troch har pleechsuster Nebula. De komst fan Gamora jout frijwat rebûlje, want dit is net de ferzje fan har dy't fan Quill hold, dy't ommers fermoarde is troch har pleechheit, de sljochtsinnige god Thanos (sjoch: Avengers: Infinity War). Ynstee is it in eardere ferzje fan Gamora, dy't troch tiidreizgjen út it ferline yn 'e hjoeddeistige tiid yntrodusearre is en de relaasje mei Quill nea meimakke hat (sjoch: Avengers: Endgame). Quill besiket op wanhopige wize werom te krijen wat er ferlern hat, mar hy kin de foarfallen dy't makken dat Gamora fereale op him rekke, net neimeitsje. Mei de help fan Gamora, dy't no ien fan 'e hierlingen is dy't bekendsteane as de Teheisterders, kringe Quill en de oare Beskermers fan it Stjerrestelsel it haadkertier fan Orgocorp binnen. Mei in hiel soad swierrichheden witte se dêr de genetyske programmearring fan Rocket te bemachtigjen en wer fuort te kommen.

De stellen ynformaasje befettet in fideo fan wat Rocket oandien is, dêr't syn freonen mei ôfgriis nei sjogge. Mar se ûntdekke dat it diel fan 'e programmearring dêr't it harren om giet, krekt foar't se de ynformaasje stielen download en wiske is troch Theel, dy't dêrta troch de Hege Evolúsjonêr stjoerd wie. Om't se gjin tiid te ferliezen hawwe, folgje de Beskermers fuortendaliks it spoar fan Theel nei de Tsjin-Ierde. Gamora hat har der net foar opjûn om it tsjin 'e Hege Evolúsjonêr yn 'e kant te setten, dat sy stjoert in berjocht om har ôf te heljen nei wat se mient dat de Teheisterders binne mei de lokaasje fan it romteskip fan 'e Beskermers. It berjocht wurdt lykwols ûnderskept troch hegepreesteresse Ayesha, dy't noch altyd besiket de Soevereinen fan 'e ferneatiging te rêden troch as earste Rocket te finen en him oan 'e Hege Evolúsjonêr oer te dragen. Mei Adam Warlock set hja efter de Beskermers oan.

Rocket belibbet yn syn koma ûnderwilens wer de hechte freonskip dy't er mei trije oare antropomorfe eksperiminten fan 'e Hege Evolúsjonêr sleat: de otter Lylla, de knyn Floor en de walrus Teefs. Yn 'e abominabele omstannichheden wêryn't se yn it Arête Laboratoarium fêstholden waarden, hiene se lykwols wille mei-inoar. Ek makken se plannen foar de takomst, wannear't se einlings op 'e Tsjin-Ierde libje soene. Se namen nammen foar harsels oan, mei't de Hege Evolúsjonêr en syn trewanten harren inkeld in identiteitsnûmer jûn hiene. Eltse kear makke de komst fan dejingen dy't harren fêstholden in hommels ein oan 'e wille. De Hege Evolúsjonêr hie niget oan Rocket, mei't de waskbear de iennichste fan syn eksperiminten wie, dy't in ynstinktive yntelliginsje toande. Dêrmei loste Rocket in probleem op dat de kreaasje fan lettere, better ûntwikkele kloften humanimals behindere. De Hege Evolúsjonêr besaude him deroer dat Rocket dat koe, en wie tagelyk lulk dat Rocket yntelliginter wie as hysels.

Doe't Rocket op in kear blike liet dat er ferwachte mei syn freonen úteinlik nei de Tsjin-Ierde te gean, lake de Hege Evolúsjonêr him út en makke dúdlik dat de Tsjin-Ierde inkeld foar better slagge, heger ûnwikkele humanimals wie, en net foar sokke mislearre eksperiminten as Rocket en syn freonen. Hy joech oarders om 'e oare moarns Rocket syn harsens foar neiere stúdzje te 'rispjen' en syn freonen libben te ferbrânen. Rocket besocht dy nachts himsels en syn freonen te rêden troch te ûntsnappen, mar de Hege Evolúsjonêr wachte him op, skeat Lylla dea en bespotte Rocket syn fertriet om har. Yn razernij foel Rocket de Hege Evolúsjonêr oan en klaude syn gesicht stikken oant de man bewusteleas rekke. De befeiligingslju fan 'e Hege Evolúsjonêr iepenen it fjoer, mar Rocket skeat harren dea mei in bútmakke wapen, om dêrnei te ûntdekken dat Floor en Teefs deade wiene troch de skotten dy't himsels mist hiene. Ferdôve troch it ferlies fan al syn freonen wist Rocket de hangaar fan it Arête Laboratoarium te berikken, dêr't er in lyts romteskip stiel en ûntkaam.

Op 'e Tsjin-Ierde arrivearre, ûntdekke de Beskermers dêr in nuver wjerbyld fan 'e minsklike beskaving op 'e Ierde, mar dan mei antropomorfe bisten ynstee fan minsken. It is lykwols net de ideäle beskaving dy't de Hege Evolúsjonêr foar eagen stie, mei't earmoede, sykte, ferslaving en misdie der likefolle foarkomme as op 'e echte Ierde. Quill, Groot en Nebula reizgje yn 'e auto nei it Arête Laboratoarium, dat as in reuseftige piramide boppe de hiele antropomorfe beskaving fan 'e Tsjin-Ierde út tuorret. Dêr oankommen wurdt Nebula, dy't troch de befeiligingslju as in wapen kwalifisearre wurdt, bûtendoar holden, wylst Quill en Groot nei binnen geane foar in moeting mei de Hege Evolúsjonêr. Drax en Mantis soene eins by it romteskip bliuwe moatte, mar de eigenwize Drax lapet syn oarders oan syn lears en set mei Mantis efter Quill-en-dy oan.

Sa bliuwt Gamora allinnich oan board fan it skip fan 'e Beskermers efter mei Rocket. Mei't se no frij is om safolle om te gnuven yn 'e besittings fan 'e Beskermers as se mar wol (wat se ek docht), kriget se in nij respekt foar harren en sels in beskate empaty foar Quill syn ferlies fan 'e lettere ferzje fan harsels. Wannear't Adam Warlock ferskynt om Rocket te ûntfieren, giet Gamora de striid mei him oan. Sy kin him net ferslaan, mar de Hege Evolúsjonêr hat syn antropomorfe trewant War Pig stjoert om Rocket te ûntfieren, en de beide ûntfierders reitsje ûnderling slaande deilis. Dat gefjocht einiget mei de dea fan War Pig, mar tsjin dy tiid is Gamora al mei Rocket útnaaid.

Yn syn petear mei de (no mei in humanoïde masker tariste) Hege Evolúsjonêr beslacht Quill de "ideäle maatskippij" fan 'e Tsjin-Ierde mei de gek, en de Hege Evolúsjonêr moat tajaan dat it resultaat net is wat hy derfan ferwachte hie. Dêrom jout er opdracht om it Arête Laboratoarium út 'e Tsjin-Ierde los te meitsjen en de planeet te ferdylgjen. Wannear't de Hege Evolúsjonêr him ôfjout, meitsje Quill en Groot koart wurk fan 'e befeiligingslju om harren hinne, wêrnei't se Theel gripe en mei him út in stikkensketten finster springe. Groot foarmet syn tûken ta wjukken en sweeft mei Quill nei it planeetoerflak, dêr't se Theel brûke om harren hurde lâning te fersêftsjen. Neitiid snijt Quill de kompjûter út 'e holle fan it stoflik omskot fan Theel. Underwilens binne Nebula, en Drax en Mantis, dy't harren by har jûn hawwe, it Arête Laboratoarium binnenkrongen om Quill en Groot te rêden. Oan board fan it opstiigjende romteskip ûntdekke se de jongste eksperiminten fan 'e Hege Evolúsjonêr: in grutte kliber genetysk manipulearre humanoïde bern. Se wurde lykwols finzen nommen en djip yn it Arête Laboratoarium opsletten.

Op it planeetoerflak komme alle humanimals om en datselde lot treft, ta ôfgriis fan Adam Warlock, de hegepreesteresse Ayesha. Mei't er der mei de kop net goed mear by is, slagget it Gamora om Adam te oermasterjen en finzen te nimmen. Sy stiget op mei it romteskip fan 'e Beskermers en pikt Quill en Groot op. Nei't se de stjerrende Tsjin-Ierde efter harren litten hawwe, brûke se de koade út 'e hollekompjûter fan Theel om 'e 'deademansknop' yn 'e genetyske programmearring fan Rocket te ûntwapenjen. Op dat stuit hat Rocket in beneidea-ûnderfining, wêryn't er op in ljocht tagiet dêr't Lylla út te foarskyn komt. Sy fertelt him dat se mei harren freonen Teefs en Floor troch de loft oan it fleanen west hat yn in raket, krekt sa't se dêroer fantasearren doe't se noch fêstholden waarden yn 'e koaien yn it Arête Laboratoarium. Rocket, dy't himsels al dy jierren de skuld fan 'e dea fan syn freonen jûn hat, freget oft er meifleane mei, en Lylla seit dat dat fansels wêze moat, mar no noch net. Se krûpt him oan en flústeret him ta dat dit ferhaal altyd al om him draaid hat, ek al wist er it net. Dêrop wurdt Rocket weromskuord nei it lân fan 'e libbenen wannear't Quill, Gamora en Groot syn wûnen genêze mei in med-pack.

As se foar it ferstân krije dat Nebula, Drax en Mantis finzen sitte yn it Arête Laboratoarium, sette Quill, Rocket, Gamora en Groot de efterfolging yn. Quill ropt Kraglin op, dy't yn it haadkertier fan 'e Beskermers efterbleaun wie, om harren mei Knowhere te help te kommen. Wannear't Kraglin en de oare bewenners fan Knowhere mei in reuseftich kanon it fjoer iepenje op it Arête Laboratoarium, rekket dat slim skansearre. De Hege Evolúsjonêr stjoert al syn befeiligingslju en teffens in leger genetysk manipulearre wêzens op 'e Beskermers fan it Stjerrestelsel ôf. Hy wol noch altyd tsjin eltse priis Rocket bemachtigje om dy syn harsens ûntleedzje te kinnen, en wannear't syn assistinte Vim en it oare brêgepersoniel konkludearje dat er gek wurden is en harren tsjin him keare, deadet er harren allegearre.

Op Knowhere wurde de trewanten fan 'e Hege Evolúsjonêr deade troch Kraglin, dy't einlings en te'n lêsten begrypt hoe't er mei syn ferstân de pylk bestjoere moat dy't Yondu Udonta him neilitten hat (sjoch: Guardians of the Galaxy Vol. 2). De lêste ynfallers wurde plette troch de telekineze fan 'e yntelliginte Sovjet-romtehûn Cosmo. Oan board fan it Arête Laboratoarium besiket de Hege Evolúsjonêr Nebula, Drax en Mantis op te fuorjen oan trije reuseftige, meunsterlike abilisken, mar de telepatyske Mantis ûntdekt dat de wêzens, dy't eins inkeld akku's en batterijen ite, benauder binne fan harren as sy fan 'e abilisken. Se slút freonskip mei de wêzens, dy't har, Nebula en Drax helpe om út harren finzenis te brekken.

Quill, Rocket en de oare Beskermers en Gamora interje it Arête Laboratoarium en weve dêr ôf mei de lêste oerbleaune trewanten fan 'e Hege Evolúsjonêr. Se litte Kraglin Knowhere tsjin it gat yn 'e romp fan it Arêre Laboratoarium oan fleane, wêrnei't Cosmo mei har telekineze de planetoïde en it romteskip byinoar hâldt. Quill-en-dy meitsje kontakt mei Nebula, Drax en Mantis en rêde de humanoïde bern dy't de nijste eksperiminten fan 'e Hege Evolúsjonêr binne troch se nei Knowhere te lieden. Rocket, dy't as lêste fan 'e Beskermers it romteskip ferlitte sil, ûntdekt in rom mei bisten yn koaien, wêrûnder in kloft jonge waskbearen. Ear't er beslute kin wat er dwaan sil, wurdt er oanfallen troch de wraaksuchtige Hege Evolúsjonêr.

Rocket hat lykwols yn 'e tuskenlizzende jierren gâns byleard en lit net mear oer him rinne. Hy jout de Hege Evolúsjonêr in priuwke fan syn eigen medisyn, en dan binne de oare Beskermers fan it Stjerrestelsel der ynienen ek, dy't murken hawwe dat Rocket efterbleaun wie. Mei-inoar jouwe se de Hege Evolúsjonêr in wan bruien sa't er noch nea hân hat, dat einiget wannear't Gamora him oan har swurd riuwt. Rocket kiest der foar om it libben fan syn fijân te sparjen. Hy stiet der lykwols op om alle bisten dy't yn it Arête Laboratoarium fêsholden wurde, te rêden en oer te bringen nei Knowhere. Quill is de lêste dy't it skip ferlitte moat, en dat rêdt er hàst, mar net alhiel. Wannear't Cosmo it bewustwêzen ferliest en Knowhere en it Arête Laboratoarium útinoar driuwe, bliuwt Quill stykjen yn 'e úttynjende iepen romte dêrtuskenyn. Hy wurdt lykwols rêden troch Adam Warlock. (Dyselde wie earder ûntsnapt en hie him wer tsjin 'e beskermers keard, mar wie ta syn ferbjustering fan 'e ferneatiging fan it Arête Laboratoarium rêden troch Groot.)

Neitiid beslút Quill om 'e Beskermers foarearst te ferlitten en beneamt er Rocket ta harren nije lieder. Hy keart foar it earst yn tritich jier werom nei de Ierde, dêr't er as bern wei ûntfierd waard troch Yondu Udonta en de Teheisterders. Dêr spoart er syn pake Jason op, no in âldman fan 'e njoggentich, dy't him fuortendaliks werom ken. Quill syn healsuster Mantis begjint in reis om harsels te ûntdekken en set ôf mei har nije freonen, de trije abilisken. Gamora jout har wer by de Teheisterders, dêr't se ûnthelle wurdt as in ferlerne freondinne. Nebula bliuwt op Knowhere, dêr't se in maatskippij opbouwe wol sa't sy dy sels as bern nea kennen hat. Drax bliuwt dêr ek, mar om 'e befrijde bern út it Arête Laboratoarium grut te bringen, want, sa seit Nebula, it is no dúdlik wurden dat Drax net yn 'e widze lein is om in ferneatiger te wurden, mar om heit te wêzen.

Rolferdieling

Chris Pratt.

Zoe Saldaña.

Karen Gillan.

Bradley Cooper.

Dave Bautista.

Pom Klementieff.

haadrollen

personaazje	akteur/aktrise
Peter Quill / Star-Lord	Chris Pratt
Gamora	Zoe Saldaña
Nebula	Karen Gillan
Rocket	Bradley Cooper (stim)
Drax de Ferneatiger	Dave Bautista
Mantis	Pom Klementieff
Groot	Vin Diesel (stim)

byrollen

personaazje	akteur/aktrise
de Hege Evolúsjonêr	Chukwudi Iwuji
Adam Warlock	Will Poulter
Kragin Obfonteri	Sean Gunn
Lylla	Linda Cardellini (stim)
Ayesha, hegepreesteresse fan 'e Soevereinen	Elizabeth Debicki
Cosmo	Maria Bakalova (stim) Slate (fysyk)
master Karja	Nathan Fillion
Ura	Daniela Melchior
recorder Vim	Miriam Shor
recorder Theel	Nico Santos
Teefs	Asim Chaudhry (stim)
Floor	Mikaela Hoover (stim)
Stakar Ogord	Sylvester Stallone (cameo)
Martinex	Michael Rosenbaum
Howard the Duck	Seth Green (stimcameo)
de heelder	Christopher Fairbank (cameo)
Steemie	Stephen Blackehart
Bzermikitokolok	Rhett Miller
Jason Quill	Gregg Henry
Yondu Udonta	Michael Rooker (cameo)
Mainframe	Tara Strong (stim)
Krugarr	Jared Gore (motion-capture)
administrateur Kwol	Jennifer Holland
Phyla	Kai Zen
War Pig	Judy Greer (stim)
Behemoth	Reinaldo Faberlie
Blurp	Dee Bradley Baker (stim)
humanimal oktopus drugsdealer	Dane DiLiegro
Gridlemop	Lloyd Kaufman (cameo)
Phlektik	Pete Davidson (cameo)
in Teheisterder	Molly C. Quinn (cameo)
Lambshank	Sean Gunn (stimcameo)

Produksje en distribúsje

Foarskiednis

Al yn 2014, doe't Guardians of the Galaxy (de earste film) krekt yn 'e bioskoop draaide, sei regisseur James Gunn yn in fraachpetear mei IndieWire dat er net inkeld al it "basisferhaal" foar Guardians of the Galaxy Vol. 2 klear hie, mar dêrnjonken ek al mei ideeën omboarte foar Guardians of the Galaxy Vol. 3. In trêde film oer de Guardians of the Galaxy út 'e strips fan Marvel Comics waard offisjeel oankundige yn 2016, in jier foar't Guardians of the Galaxy Vol. 2 útkaam.

Regisseur James Gunn.

Gunn, waans bydragen fan krúsjaal belang wiene foar it grutte krityske en kommersjele súkses fan 'e beide earste Guardians of the Galaxy-films, waard yn july 2018 lykwols ûntslein troch Disney, de memme-ûndernimming fan 'e Marvel Studios, doe't inkele kontroversjele grappen boppe wetter kamen oer ferkrêfting, pedofily, AIDS, de Holokaust, bestialiteiten en de terreuroanslaggen fan 9/11, dy't er earder op Twitter makke hie. Gunn krige stipe fan fan in protte fans en ek fan alle wichtige leden fan 'e cast fan 'e beide eardere Guardians of the Galaxy-films. Chris Pratt, Zoe Saldaña, Bradley Cooper, Karen Gillan, Dave Bautista, Vin Diesel, Pom Klementieff, Michael Rooker en Sean Gunn makken yn in mienskiplike ferklearring bekend dat se skokt wiene troch it "abrupte ûntslach" fan Gunn en rôpen Disney op om 'e regisseur wer oan te nimmen. It tydskrift Variety die lykwols ferslach dat Disney dêr net oan woe om't de grappen dêr't it om gie "ûnakseptabel [wiene] yn it tiidrek fan #MeToo en net rymden mei it famyljefreonlike imago fan [de studio]".

In fearnsjier letter, yn oktober 2018, waard Gunn oannommen troch de konkurrearjende filmstudio Warner Bros. om in film yn 'e DC Extended Universe-rige te meitsjen. Dat waard úteinlik The Suicide Squad (2021). Dy ûntwikkeling kaam foar Disney blykber as in ûnoangename ferrassing, want ien dei letter stie de studio by Gunn op 'e stoepe om te freegjen oft er dochs net Guardians of the Galaxy Vol. 3 regissearje koe. Gunn antwurde dat dat wol koe, mar dat er no earst foar Warner Bros. oan it wurk moast. Dêrop stelde Disney de produksje fan Guardians of the Galaxy Vol. 3 út oant hy wer frij wie.

Produksje

Guardians of the Galaxy Vol. 3 waard sadwaande dochs regissearre troch James Gunn nei in senario dat er sels skreaun hie. Dat skript draaide om it oarsprongsferhaal fan it personaazje Rocket, mei wa't Gunn sei dat er himsels by útstek identifisearre. As produsint wie Kevin Feige by it projekt belutsen foar de Marvel Studios. Foar de film wie in budget beskikber fan $250 miljoen. De kamerarezjy wie yn 'e hannen fan Henry Braham, en de filmmuzyk waard fersoarge troch John Murphy.

Yn 'e Trilith Studios by Atlanta waard fan Guardians of the Galaxy, Vol. 3 foar it grutste part filme.

Opnamen

De opnamen foar Guardians of the Galaxy Vol. 3 setten op 8 novimber 2021 útein en duorren oant en mei 6 maaie 2022. It grutste part fan 'e film en alle binnendoarsênes waarden opnommen yn 'e Trilith Studios yn Fayetteville, in foarstêd fan Atlanta yn 'e Amerikaanske steat Georgia. Beskate sênes waarden op lokaasje filme, û.o. yn Atlanta en yn 'e Britske haadstêd Londen, wêrby't de mei opset sin misliedende wurktitel Hot Christmas brûkt waard om foar te kommen dat fans fan 'e Guardians of the Galaxy-films de set ûnder de foet rinne soene.

Distribúsje

De distribúsje fan Guardians of the Galaxy Vol. 3 waard fersoarge troch Walt Disney Studios Motion Pictures, de distribúsjedifyzje fan The Walt Disney Company, dat de memme-ûndernimming fan 'e Marvel Studios is. De film gie op 22 april 2023 yn it ferdivedaasjepark Disneyland Paris yn premiêre. In nasjonale Amerikaanske premiêre folge op 27 april yn it Dolby Theatre yn Hollywood, wêrnei't de film op 5 maaie iepene yn 'e Amerikaanske bioskopen. It byhearrende soundtrackalbum ferskynde op 3 maaie 2023 by platemaatskippij Hollywood Records. Guardians of the Galaxy Vol. 3 kaam op 7 july 2023 beskikber as digitale download en waard op 1 augustus fan dat jier útbrocht op dvd en blu-ray.

Untfangst

Fan 'e filmkritisy krige Guardians of the Galaxy Vol. 3 oer it algemien positive resinsjes. Sa fûn Clarisse Loughrey fan 'e Britske krante The Independent it "de bêste Marvel-film yn jierren", in miening dêr't Alex Abad-Santos fan 'e webside Vox en Jackson Weaver fan it Kanadeeske CBC News har by oansleaten. Peter Bradshaw, dy't foar de Britske krante The Guardian skreau, en Nicholas Barber fan 'e webside fan 'e BBC, fûnen Guardians of the Galaxy Vol. 3 mei in spyldoer fan 150 minuten te lang. Neffens Barber waard de film rêden fan 'e ûndergong trochdat it regisseur James Gunn tastien wie om syn emoasjes de frije rin te litten.

Op 'e Amerikaanske radiostjoerder NPR joech Glen Weldon Guardians of the Galaxy Vol. 3 in negative resinsje, wêryn't er benammen krityk utere op 'e oanpak fan bistemishanneling yn 'e film. Yn The New York Times neamde Maya Phillips it in "sombere, fisueel ôfwearzige, twa en in heal oere duorjende Dierebeskermingsnachtmerje fan in film, [dy't] nei alle gedachten inkeld ynteressant wêze sil foar fans dy't de filmsearje kompleet hawwe wolle." En Michael Phillips fan 'e Chicago Tribune oardiele dat it "de leechste, aaklikste MCU-film oant no ta" wie. Mar Bisterjochte-organisaasje PETA rôp Guardians of the Galaxy Vol. 3 om 'e ôfskildering fan bistemishanneling krekt út ta de bêste bisterjochtefilm fan it jier en kende oan regisseur James Gunn de Not a Number Award ta foar syn portrettearring fan fiviseksje.

Akteur Chukwudi Iwuji yn kostúm as de Hege Evolúsjonêr by promoasje fan Guardians of the Galaxy, Vol. 3 op 'e San Diego Comic-Con fan 2022.

Op 'e webside Rotten Tomatoes, dy't resinsjes sammelet, hat Guardians of the Galaxy Vol. 3 in heech goedkarringspersintaazje fan 82%, basearre op 404 ûnderskate resinsjes. De konsensuskrityk fan 'e webside, gearstald út al dy resinsjes, stelt: "As in galaktyske groepsknuffel, wêrby't it hert wat tefolle yn 'e knipe komt, is [dizze film] in leafdefol lêste earbetoan foar de skurfste famylje fan it Marvel Cinematic Universe." Op Metacritic, de wichtichste konkurrint fan Rotten Tomatoes, behellet Guardians of the Galaxy Vol. 3 in goedkarringspersintaazje fan 64%, basearre op 63 resinsjes.

Resultaat

Opbringst

Guardians of the Galaxy Vol. 3 brocht yn 'e bioskopen yn 'e Feriene Steaten en Kanada $359,0 miljoen op, en yn alle oare lannen en territoaria $486,6 miljoen. Wrâldwiid kaam de opbringst dêrmei út op $845,6 miljoen. Ofset tsjin it budget fan $250 miljoen betsjut dat in winst fan $595,6 miljoen, hoewol't dêr de marketingkosten noch wol ôf moatte. De webside Deadline Hollywood berekkene de skjinne winst foar Guardians of the Galaxy Vol. 3 op $124 miljoen.

Prizen

By de Oscars waard Guardians of the Galaxy Vol. 3 yn 2024 nominearre foar de priis yn 'e kategory bêste fisuele effekten. De film waard nominearre foar de BAFTA en de Critics' Choice Award yn deselde kategory, de Golden Globe foar bêste sinematyske en kommersjele prestaasje, de Grammy Award foar bêste kompilaasjesoundtrack foar fisuele media, de Screen Actors Guild Award foar bêste groep stuntlju en fierders foar 4 People's Choice Awards en 3 Nickelodeon Kids' Choice Awards.

By de Saturn Awards waard Guardians of the Galaxy Vol. 3 nominearre foar prizen yn 7 kategoryen, wêrûnder bêste regisseur, bêste akteur (Chris Pratt), bêste produksje-ûntwerp, bêste kostúmûntwerp, bêste fisazjy en bêste special effects. De film wûn de Saturn Award foar bêste superheldefilm. Guardians of the Galaxy Vol. 3 wûn ek de Annie Award foar bêste personaazje-animaasje yn in live-actionproduksje en de Variety Artisans Award op it Ynternasjonaal Filmfestival fan Santa Barbara.

Keppelings om utens

• (in) Offisjele webside fan Guardians of the Galaxy Vol. 3
• (in) Ynformaasje oer Guardians of the Galaxy Vol. 3 yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Guardians of the Galaxy Vol. 3 fan Wikimedia Commons.