Griiskopljip

griiskopljip
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift wilstereftigen (Charadriiformes) famylje wilsterfûgels (Charadriidae) skaai ljippen (Vanellus)
soarte
Vanellus cinereus
Blyth, 1842
IUCN-status: net bedrige

De griiskopljip (Vanellus cinereus) in fûgel yn it skaai ljippen (Vanellus) út 'e famylje wilsterfûgels (Charadriidae).

Ferskining

Griiskopljipkes.

De griiskopljip is in 34-37 sm lange fûgel mei lange giele poaten en in giele snaffel mei in swarte punt. Lykas de namme al seit hat er in grize kop en nekke. De fûgel hat in donkergrize boarstbân en in wite búk, wylst de rêch brún is en de sturt wyt mei in swarte einbân. Yn 'e flecht kontrastearje de swarte haadslachpinnen mei de wite sekundêre slachpinnnen en brune boppewjukdekfearren. Hijkes en sijkes binne gelyk, mar it hijke is wat grutter as it sijke. Jonge fûgels binne griis, dêr't folwoeksen fûgels wyt binne, de boarstbân is minder dúdlik en oan 'e boppekant binne de fearpunten bleek.

Fersprieiding

De fûgel briedt yn noardeastlik en eastlik Sina (Binnen-Mongoalje, sintraal Mantsjoerije, Jiangsu en Fujian), oangrinzgjende dielen fan Ruslân en yn Japan. Winterdeis migrearret er nei Súd-Aazje fan Nepal, noardlik en noardeastlik Yndia en Bangladesj oant súd-sintraal Sina en noardlik Yndosina, somtiden fierder nei it suden.

Fryslân

Yn maaie 2019 waard in fûgel yn Noarwegen warnommen. In pear dagen letter waard nei alle gedachten deselde fûgel yn 'e omkriten fan Kristinehamn yn Värmlands län (Sweden) sjoen. Ein juny waard er ek yn 'e Warkumermar yn Fryslân sjoen.

Systematyk

Genetyske stúdzjes ha útwiisd dat de griiskoplip it meast besibbe is oan 'e Vanellus leucurus en de Vanellus gregarius. De fûgel wurdt as monotypysk behannele, wat sizze wol dat der gjin ferdieling yn ûndersoarten is.

Status

De soarte hat in grut ferspriedingsgebiet en de populaasje wurdt as stabyl beskôge. De Ynternasjonale Uny foar it Behâld fan 'e Natuer (IUCN) neamt de fûgel dêrom as net bedrige (Least Concern, ). De wrâldpopulaasje wurdt tusken 25.000 en 100.000 fûgels rûsd.

Boarnen, noaten en/as referinsjes:

BirdLife, oproppen 26 desimber 2025. Ebird, oproppen 26 desimber 2025. Avibase, oproppen 26 desimber 2025. Commons Wikimedia Commons  Ofbylden dy't by dit ûnderwerp hearre, binne te finen yn de kategory griiskopljip fan Wikimedia Commons.