Gilles Quispel

Ut Wikipedy
Gean nei: navigaasje, sykje

Gilles Quispel (Rotterdam, 30 maaie 1916 - El Gouna, Egypte, 2 maart 2006) wie in Nederlânsk teolooch dy't ynternasjonale bekendheid krige hat as ûndersiker fan de klassike en kristlike gnosis.

Libben[bewurkje seksje | edit source]

De húshâlding Quispel ferfarde nei it plakje Kinderdijk dêr't de heit in smidderij hie. It die bliken dat Gilles te ûnhandich wie om hjiryn oan't wurk te gean, dêrom waard hy nei it gymnasium stjoerd. Hy studearre Klassike talen en teology yn Leien en Grins en promovearre yn Utert yn 1943 op in proefskrift oer Tertullianus' geskrift tsjin de gnostikus Marsion dy't om 144 n.Kr. libbe. Fan 1946 oant 1951 wie hy learaar Latyn oan it Leiensk Gymnasium. Dêrnei stapte er oer nei universiteit dêr't hy yn 1951 op 35-jierrige leeftyd te Utert beneamd waard ta heechlearaar tsjerkeskiednis. Hy wie tagelyk heechlearaar oan de universiteiten fan Leuven en Harvard yn de Feriene Steaten. Yn 1976 gie hy mei emeritaat.

Hy ferstoar hommels doe't er sawat 90-jier âld wie oan de gefolgen fan in longûntstekking tidens in ferbliuw yn Egypte.

Gnostyk[bewurkje seksje | edit source]

Sintraal yn it wurk fan Quispel stiet de gnostyk, in samling fan yn de 2e ieu út de konfrontaasje tusken kristendom en gnostisisme ûntstiene religieuze bewegingen. Neffens Guispel wurde dizze útienrinnende bewegingen fan de gnostyk skaaimerke troch it begjinsel fan de frije minsk en soenen se pleite hawwe foar in net-autoritêre en ûndogmatyske belibbing fan it jonge kristendom. Al op it Gymnasium hat er kunde krigen oan de gnostyske lear troch syn skoallelearaar P. Hendrikx dy't op de Aleksandrynske gnostikus Basilides promovearre wie.

Op 10 maaie 1952 kocht Gilles foar in bytsje jild de gnostyske Jung Kodeks dy't yn dizze tiid in protte wurdich is. De kodeks omfiemet ûnder oaren it saneamde Evangeelje fan de Wierheid. Letter soe ek út fierdere ûntdekking fan dizze Nag Hammady-geskriften it Evangeelje fan Tomas bekend wurde. Yn dat Tomasevangeelje stean alderlei útspraken fan Jezus Kristus] dêr't Quispel fan betinken wie dat dy ek werklik fan Jezus ôfkomstich west hawwe soenen. Hy publiseare dat Tomasevangeelje nei 1956. Yn 2005 die er in nije, diskear folslein publisearre publikaasje it ljocht sjen mei alderlei taljochtingen fan syn kant.

Nei syn emeritaat joech hy mei Roelof van den Broek de Corpus Hermeticum út en selsstannich de hermetyske Asclepius.

Wurken[bewurkje seksje | edit source]

Hy skreau diverske boeken oer gnostisisme, wêrûnder:

  • Valentinus de gnosticus en zijn Evangelie der waarheid, 145 siden, útjouwerij In de Pelikaan - Amsterdam, 2003, ISBN 90-71608-13-1
  • De hermetische Gnosis in de loop der eeuwen, 672 siden, útjouwerij In de Pelikaan - Amsterdam, 2003, ISBN 90-6732-284-9
  • It Evangeelje fan Tomas, út it Koptysk oersetten en taljochte, 380 siden, útjouwerij In de Pelikaan - Amsterdam, 2005, ISBN 90-71608-15-8
  • Gnosis. De derde component van de Europese cultuurtraditie (redaksje), 276 siden, útjouwerij St. de Rozekruis-Pers - Haarlim, 2005, ISBN 90-202-4206-7
  • De Keulse Mani Codex, tegearre mei J. van Oort, 248 siden, útjouwerij St. de Rozekruis-Pers- Haarlim, 2005, ISBN 90-71608-16-6

Keppeling om utens[bewurkje seksje | edit source]

Oerlijdensberjochten: