Germ Gerbrandy

Ut Wikipedy
Jump to navigation Jump to search
Germ Gerbrandy
High-contrast-accessories-text-editor.svg politikus
echte namme Gerben Gerbrandy
nasjonaliteit Flag of the Netherlands.svg Nederlânsk
bertedatum 27 july 1952
berteplak De Hommerts (Fryslân)
etnisiteit Frisian flag.svg Frysk
partij FNP
lid fan de Earste Keamer
foar de Unôfhinklike Senaatsfraksje (OSF)
amtsperioade 2019 – ....
foargonger Hindrik ten Hoeve
boargemaster fan Achtkarspelen
amtsperioade 20132019
foargonger Piet Adema (wnd)
opfolger Oebele Brouwer
gemeenteriedslid fan Súdwest-Fryslân
amtsperioade 20112013
wethâlder fan Wymbritseradiel
amtsperioade 19982011

Germ Gerbrandy (folút: Gerben Gerbrandy; De Hommerts, 27 july 1952) is in Frysk politikus en lid fan 'e FNP. Yn 2013 waard er de twadde FNP-boargemaster út 'e skiednis fan Fryslân. Yn 2019 kaam er foar de Unôfhinklike Senaatsfraksje yn 'e Earste Keamer.

Libben en karriêre[bewurkje seksje | boarne bewurkje]

Gerbrandy waard yn 1952 berne as boeresoan op De Hommerts. Foarôfgeande oan syn politike karriêre wurke er as learaar biology, natuerkunde en skiekunde. Yn dy hoedanichheid stie er foar de klasse yn Rozenburg (Súd-Hollân), Winterswyk, Drachten en Waskemar. Fierders arbeide er ek in jier lang yn in kibboets yn Israel.

Wethâlder Wymbritseradiel[bewurkje seksje | boarne bewurkje]

Yn 1998 waard Gerbrandy foar de FNP wethâlder yn 'e gemeente Wymbritseradiel, in funksje dy't er trettjin jier lang beklaaie soe, oant Wymbritseradiel op 1 jannewaris 2011 by in proses fan gemeentlike weryndieling opgie yn 'e nije fúzjegemeente Súdwest-Fryslân.

Boargemaster Achtkarspelen[bewurkje seksje | boarne bewurkje]

Neitiid kaam Gerbrandy foar de FNP yn 'e gemeenteried fan 'e nije gemeente, dêr't er syn sit behold oant er yn jannewaris 2013 beneamd waard ta boargemaster fan Achtkarspelen, as opfolger fan waarnimmend boargemaster Piet Adema. Dêrmei waard Gerbrandy nei Theunis Piersma de twadde FNP-boargemaster út 'e skiednis fan Fryslân. Yn jannewaris 2019 waard Gerbrandy as boargemaster fan Achtkarspelen opfolge troch Oebele Brouwer.

Senator[bewurkje seksje | boarne bewurkje]

Yn 2019 swaaide FNP-er Hindrik ten Hoeve ôf as senator foar de Unôfhinklike Senaatsfraksje (OSF), dy't yn 'e Earste Keamer fan de Steaten-Generaal de regionale politike partijen mei sitten yn 'e Provinsjale Steaten fertsjintwurdiget. It wie oarspronklik de bedoeling dat Ten Hoeve opfolge wurde soe troch Bernard Minderhoud, de listlûker fan 'e Lokale Partijen Zuid-Holland (LPZH), mar by de Provinsjale-Steateferkiezings fan 20 maart 2019 helle Minderhoud gjin sit yn 'e Provisjale Steaten fan Súd-Hollân. Dêrop waard by in gearkomste fan 'e lidpartijen fan 'e OSF, op 27 maart, besletten dat Germ Gerbrandy de opfolger fan Ten Hoeve wurde moast.[1] Ein jannewaris 2019 wie de Partij voor het Noorden út 'e OSF stapt om't Ten Hoeve foar de Mynbouwet stimd hie, dy't û.m. fierdere ierdgasboarrings yn Grinslân omfieme.[2] It spande der sadwaande noch om oft de OSF sûnder de stipe fan 'e Partij voor het Noorden wol in sit yn 'e Earste Keamer bemachtigje kinne soe, mar by de stimming troch de ûnderskate Provinsjale Steaten op 27 maaie die bliken dat it krekt slagge wie.[3]

Underskiedings[bewurkje seksje | boarne bewurkje]

Gerbrandy waard yn april 2019 ûnderskaat as Ridder yn de Oarder fan Oranje-Nassau.

Boarnen, noaten en referinsjes[boarne bewurkje]

Boarnen, noaten en/as referinsjes:
  1. ——, Germ Gerbrandy naa Eerste Kamer, yn: de Ljouwerter Krante, 28 maart 2019, s. 25.
  2. ——, Partij voor het Noorden breekt definitief met Onafhankelijke Senaatsfractie, RTV Noord, 25 jannewaris 2019.
  3. ——, OSF definitief Eerste Kamer in, Germ Gerbrandy senator, yn: de Ljouwerter Krante, 27 maaie 2019.

Foar boarnen en oare literatuer, sjoch ûnder: Bronnen, op dizze side.