Gielsnaffelrôlder

Gielsnaffelrôlder
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift rôldereftigen (Coraciiformes) famylje rôlderfûgels (Coraciidae) skaai breedsnaffelrôlders (Eurystomus)
soarte
Eurystomus glaucurus
Müller, 1776
IUCN-status: net bedrige
ferspriedingsgebiet

De gielsnaffelrôlder (Eurystomus glaucurus) is in fûgel yn it skaai breedsnaffelrôlders (Eurystomus) út 'e famylje rôlderfûgels (Coraciidae).

Ferskining

De fûgel is 27 oant 29 sm lang en it mantsje weaget 94 oant 166 gram, it wyfke 84 oant 149 gram. De nominaat is op 'e kop, rêch en wjukdekfearren waarmbrún. De stút, boppesturtdekfearren en slachpinnen binne poarperblau. De fûgel hat in brede, opfallende heldergiele snaffel. Yn 'e flecht kontrastearje de helderblauwe wjukken en sturt mei de brune rêch.

Fersprieding

De soarte komt yn Afrika súdlik fan 'e Sahara foar en op Madagaskar. Der wurde fjouwer ûndersoarten erkend:

• E. g. eathiopicus: West-Etioopje en Sûdan
• E. g. afer: fan Senegal oant Sûdan, de kustlannen fan West-Afrika en it noarden fan Kongo-Kinsjasa.
• E. g. suahelicus: fan súdlik Somaalje oant sintraal Kongo-Kinsjasa, noardeastlik Sambia, Angoala, en KwaZulu-Natal.
• E. g. glaucurus: Madagaskar.

It leefgebiet bestiet út heal iepen gerslân mei beammen, oanplante bosk, agrarysk gebiet, parken yn bûtenwiken fan stêden en ek bercheftich gebiet mei bosk en strewellen oant likernôch 1600 m en yn East-Afrika oant 2500 m hichte.

Hâlden en dragen

Lykas oare rôlders wurdt er faak op in posysje heech yn in beam, in peal of op stroomtried sjoen. De fûgel is oerdeis meast ynaktyf, mar yn 'e lette middei jaget er op fleanende michammels en termiten, somtiden yn grutte groepen fan 100 of mear. De soarte drinkt lykas sweltsjes troch syn snaffel yn 'e flecht yn it wetter te dompeljen. It nêst sit yn in beamgat, wurdt net beklaaid en bestiet út twa oant trije aaien.

Status

De fûgel hat in grut ferspriedingsgebiet en is oer it generaal algemien. Der is gjin oanlieding om te tinken dat de oantallen tebekrinne. Dêrfandinne stiet de fûgel as net bedrige (Least Concern, 2024) op 'e Reade list fan 'e IUCN.

Boarnen, noaten en/as referinsjes:

BirdLife, oproppen 22 jannewaris 2026. Ebird, oproppen 22 jannewaris 2026. Avibase, oproppen 22 jannewaris 2026 Commons Wikimedia Commons  Ofbylden dy't by dit ûnderwerp hearre, binne te finen yn de kategory gielsnaffelrôlder fan Wikimedia Commons.