Ely (bibelsk persoan)

Ely
Ely en de jonge Samuël (John Singleton Copley, 1780)
Persoanlike gegevens
folk	Israeliten (stamme fan Levy, ôfstammeling fan Itamar)
Famylje
bern	Chofny en Pinechas
Bibelske rol
perioade	11e iuw f.Kr.
bekend fan	hegepryster fan Sjilo en mentor fan Samuël
neamd yn	1 Samuël 1-4; 1 Keningen 2:27
religieuze tradysje	joadedom; kristendom

Ely (Hebriuwsk: עֵלִי) is in bibelsk persoan út it Alde Testamint. Hy wie de hegepryster fan 'e tabernakel yn Sjilo en ien fan 'e lêste rjochters fan Israel. Ely is foaral bekend as de mentor fan 'e profeet Samuël.

Libben en amt

Ely tsjinne fjirtich jier lang as rjochter oer it folk fan Israel. Syn wenplak wie Sjilo, dat yn dy tiid it religieuze sintrum fan it lân wie omdat de Arke fan it Ferbûn dêr stie. Ely spile in wichtige rol yn it ferhaal fan Hanna, dy't yn Sjilo om in bern bea. Ely seach har bidden en tocht earst dat hja dronken wie, mar doe't hja har ferhaal die, seinige er har. Ut dat gebed waard Samuël berne, dy't letter troch Hanna oan God wijd waard en troch Ely grutbrocht waard.

De fal fan syn hûs

Hoewol't Ely sels in from man wie, hie hy twa soannen, Chofny en Pinechas, dy't as prysters misbrûk makken fan harren macht. Hja stellen dielen fan 'e offers en misdroegen harren foar de froulju oer dy't by de tabernakel kamen. Ely bestrafte syn soannen wol, mar hy grypte net hurd genôch yn. Dêrom krige er fan in profeet te hearren dat syn skaai it prysterskip ferlieze soe. Letter krige ek de jonge Samuël in boadskip fan God oer it oardiel oer it hûs fan Ely.

De dea fan Ely

De profesije kaam út doe't der oarloch wie tsjin 'e Filistinen. De twa soannen fan Ely sneuvelen yn 'e striid en de Arke fan it Ferbûn waard troch de fijân rôve. Doe't in boade it nijs yn Sjilo brocht, foel de 98-jierrige Ely, dy't al blyn wie fan 'e stoel, briek syn nekke en stoar. Ely hie fjirtich jier rjochter oer Israel west. Syn pakesizzer Ikabod waard koart dêrnei berne, waans namme "de eare is fuort" betsjut, ferwizend nei it ferlies fan 'e Arke.

Boarnen, noaten en/as referinsjes:

It ferhaal fan Ely is te finen yn 'e earste fjouwer haadstikken fan 1 Samuël. Syn neiteam en it ferlies fan it prysterskip wurdt ek neamd yn 1 Keningen 2:27. Commons Wikimedia Commons  Ofbylden dy't by dit ûnderwerp hearre, binne te finen yn de kategory Ely fan Wikimedia Commons.