Das Lied der Deutschen

Ut Wikipedy
Jump to navigation Jump to search

Das Lied der Deutschen (Frysk: It Liet fan de Dútsers), ek bekend as it Deutschlandlied (Dútslânliet), is sûnt 1922 it folksliet fan Dútslân. Fan 1952 ôf waard lykwols allinnich noch it tredde kûplet songen, en sûnt 1991 is offisjeel allinnich dit kûplet it folksliet.

Skiednis[bewurkje seksje | boarne bewurkje]

De troch Joseph Haydn komponearre melody waard yn earste ynstânsje foar Keizer Frâns II songen as de Kaiserhymne. Ek brûkte Haydn de melody foar it twadde part fan syn Kaiserquartett.

De tekst waard yn 1841 skreaun troch germanist en dichter August Heinrich Hoffmann von Fallersleben doe't er op fakânsje wie op it doetiidsk Britske Noardsee-eilân Helgolân. It Lied der Deutschen kin sjoen wurde as in protest tsjin de Frânske eask om de Ryn de grins fan Frankryk te meitsjen. Dochs komt it wurd Rhein net yn it liet foar.

Tidens it Dútske Keizerryk (1871-1918) wie der gjin offisjeel folksliet, mar by spesjale gelegenheden waard Heil dir im Siegerkranz songen op de melody fan it Ingelske folksliet God save the Queen. It Lied der Deutschen waard lykwols hieltyd populêrder, en tidens de Earste Wrâldkriich waard it ek faker songen om't Heil dir im Siegerkranz deselde melody hie as it folksliet fan de Ingelske fijân.

Folksliet sûnt 1922[bewurkje seksje | boarne bewurkje]

De sosjaaldemokratyske rykspresidint Friedrich Ebert besleat yn 1922 om it Lied der Deutschen it offisjele folksliet te meitsjen. De nasjonaalsosjalisten (1933-1945) lieten it folksliet bestean, mar songen allinnich it earste kûplet. Dêrop moast it earste kûplet fan it Horst Wessellied folgje, it liet fan de nasjonaalsosjalistyske partij NSDAP.