Cassins túfearn

Cassins túfearn
taksonomy
ryk	dieren (Animalia)
stamme	rêchstringdieren (Chordata)
klasse	fûgels (Aves)
skift	haukeftigen (Accipitriformes)
famylje	haukfûgels (Accipitridae)
skaai	echte earnen (Aquila)
soarte
Aquila africana
	Cassin, 1865
	IUCN-status:

De Cassins túfearn (Aquila africana), ek Cassins toefearn of cassintúfearn, is in middelgrutte rôffûgel út de famylje fan 'e haukfûgels (Accipitridae) binnen it skift oer de haukeftigen (Accipitriformes). Dizze earn is ferneamd nei de Amerikaanske ornitolooch John Cassin (1813-1869).

Uterlik

De fûgel hat in kop-sturtlingte fan sawat 50 oant 61 sentimeter en in wjukspanne fan 103 oant 113 sm. Lykas by de measte oare rôffûgels binne ek by dizze soarte de wyfkes in slach grutter en swierder as de mantsjes.

De folwoeksen Cassins túfearn is in lytse earn mei koarte, rûne wjukken en in lange, rûne sturt. De boppekant fan it lichem is donkerbrún mei wite plakken. De sturt is brún en hat trije swarte balken mei in brede swarte subterminale bân (in tsjustere bân flak foar de útein fan 'e sturt). De poaten binne oant de teannen ta befearre en wyt mei swarte streken, wylst de bleate teannen ljochtgiel binne. De búk is folslein wyt, of wyt mei karakteristike swarte plakken op 'e siden fan it ûnderboarst. De snaffel is swart mei in ljochtgiele waakshûd en de fûgel hat opfallende gielbrune eagen.

It fearrekleed fan ûnfolwoeksen en jonge fûgels (juvenilen) wykt opfallend ôf fan dat fan 'e folwoeksen fûgels. Karakteristyk is de brune oant rossige kop mei in donkere team (lores) tusken it each en de snaffel en swarte streken op 'e kiel en it midden fan 'e krún. De búk is wyt en it boarst readbrún mei heal ferside swarte plakken, wylst de búk en flanken mei tichte swarte plakken markearre binne. De sturt is donkergriis mei in wite punt en donker ein en de donkerbrune wjukken ha wytpuntige sekundêre fearren.

Fersprieding en biotoop

Dizze earn hat in grut, mar faak fragmintearre ferspriedingsgebiet yn 'e tropyske dielen fan Afrika. Hy komt yn it tichte reinwâld foar fan West- en Sintraal-Afrika, fan Sierra Leöane nei it easten ta oant yn it meast westlike part fan Uganda en nei it suden ta oant noardlik Angoala. It is in typyske stânfûgel dy't it hiele jier troch yn syn eigen territoarium bliuwt en net oer grutte ôfstannen trekt.

Syn biotoop bestiet benammen út ûnfersteurde, tichte tropyske reinwâlden yn it leechlân. Hy hâldt him foaral op yn 'e kronen fan 'e hege beammen, mar wurdt ek wolris sjoen by de rânen fan 'e bosken en by dellingen fan rivieren. De fûgel mijt iepen savannes en grutskalich kapte gebieten folslein.

Ekology en hâlden en dragen

Oer de ekology fan Cassins túfearn is yn ferhâlding ta oare earnen noch net sa'n soad bekend bekend, om't er skou en ferburgen libbet yn 'e tichte tropyske wâlden.

It is in rappe jager dy't behindich manûvrearret fanút in útsjochpost of yn in flugge flecht krekt ûnder as troch de kroanen fan 'e beammen. Syn dieet bestiet foar in grut part út fûgels dy't yn 'e beammen libje en lytse sûchdieren, lykas ferskillende soarten iikhoarntsjes en oare lytse kjifdieren. Dêrnjonken jaget er ek op grutte hagedissen en ferskate soarten ynsekten.

It nêst wurdt boud fan tûken en ticht grien, hiel heech yn 'e kroan fan in grutte, dominante beam. It briedseizoen ferskilt tige per regio en is nau ferbûn mei de reintiid.

Status

Cassins túfearn wurdt troch de IUCN as net bedrige klassifisearre op 'e Reade list. Alhoewol't de totale wrâldpopulaasje troch it ferburgen libben fan 'e fûgel lestich te rûzjen is, wurdt oannommen dat it ferspriedingsgebiet grut genôch is om de soarte as net bedrige te beskôgjen. De oantallen rinne lykwols wol stadichoan tebek troch de grutskalige ûntbosking en habitatfragmintaasje yn ferskate dielen fan West- en Sintraal-Afrika.

Boarnen, noaten en referinsjes

Boarnen, noaten en/as referinsjes:

Wikimedia Commons

Ofbylden dy't by dit ûnderwerp hearre, binne te finen yn de kategory Cassins túfearn fan Wikimedia Commons.