Mangrovereager

mangrovereager
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift pilekaaneftigen (Pelecaniformes) famylje reagerfûgels (Ardeidae) skaai reiddompreagers (Butorides )
soarte
Butorides atricapilla
Afzelius, 1804
IUCN-status: gjin status
ferspriedingsgebiet

De mangrovereager (Butorides atricapilla) is in fûgel yn it skaai reiddompreagers (Butorides ) út 'e famylje reagerfûgels (Ardeidae). De fûgel komt yn tropyske gebieten fan Afrika oant de Salomonseilannen foar.

Ferskining

Mangrovereager yn Austraalje.

De 35 oant 48 sm lange fûgel is in frij lytse reager, weaget 130 oant 250 gram en hat in spanwiidte fan 52 oant 60 sm. In folwoeksen fûgel hat in griisblauwe rêch en wjukken en in wite ûnderkant, in swarte mûtse en in donkere streek fan 'e snaffel oant ûnder it each en koarte giele poaten. It fearrekleed is lykwols fariabel, sels binnen de ûndersoarten. Mantsjes en wyfkes ha itselde fearrekleed, mar de twa Australyske ûndersoarten B. a. macrorhyncha en B. a. stagnatilis wike ôf mei grize en readbrune foarmen. Jonge fûgels binne brune en ha streken oan 'e ûnderkant.

Taskonomy

De wittenskiplike namme fan 'e soarte waard yn 1804 as Ardea atricapilla torch de Sweed Adam Afzelius publisearre. Sûnt de ôfsplitsing fan 'e Butorides striata is neffens de prioriteitsregel fan 'e International Code of Zoological Nomenclature B. atricapilla de wittenskiplike namme foar de mangrovereager dy't yn Afrika en Australaazje foarkomt.

Fersprieding

De fûgel komt yn tropyske en subtropyske wiete gebieten foar yn in grut part fan Afrika oant yn Japan en súdlik oant op 'e Salomonseilanden en Austraalje. Fûgels dy't yn 'e tuskenbeide sône fan East-Aazje briede, trekke winterdeis nei it suden. De fûgels yn 'e tropen binne stânfûgels.

De fûgel hat in foarkar foar sompen mei in tichte begroeiïng lykas mangroves oan 'e kust en tichte sompebosken oan rivieren en marren. Fierder wurde se ek sjoen by kanalen, fivers, sâltflakten, op waad en koraalriffen en yn reid- en gerslân en rysfjilden.

De nominaat B. atricapilla atricapilla komt foar yn Afrika. Yn 'e rest fan it ferspriedingsgebiet komme 19 oare ûndersoarten foar.

• B. a. atricapilla: Subsaharaansk Afrika
• B. a. brevipes : Somaalje en de kusten fan 'e Reade See
• B. a. rutenbergi: Madagaskar en Reünion
• B. a. rhizophorae: de Komoaren
• B. a.. crawfordi: Aldabra en de Amiranten
• B. a. degens: de Seysjellen
• B. a. albolimbata: Chagos-arsjipel yn 'e Maldiven
• B. a. spodiogaster: Andamanen, Nikobaren en de eilannen by westlik Sumatra
• B. a. amurensis: súdeastlik Sibearje, noardeastlik Sina en Japan
• B. a. actophila: fan eastlik Sina oant noardlik Birma en noardlik Fjetnam
• B. a. javanica: fan Pakistan, Yndia, Sry Lanka oant Tailân, de Filipinen, de Grutte Sûnda-eilannen en Selebes
• B. a. steini: de Lytse Sûnda-eilannen
• B. a. moluccanum: fan 'e Molukken
• B. a. papuensis: noardwestlik Nij-Guineä
• B. a. idenburgi: noardlik Nij-Guineä
• B. a. flyensis: eastlik en súdeastlik Nij-Guineä
• B. a. macrorhyncha: eastlik en noardeastlik Austraalje en Nij-Kaledoanje
• B. a. stagnatilis: noardwestlik en noardlik Sintraal-Austraalje
• B. a. neef: Tahity
• B. a. solomonensis: fan Lavongai nei de Salomonseilannen en Fidzjy

Hâlden en dragen

Juvenyl yn Gana.

Se bouwe harren nêsten yn strûken of beammen of somtiden op 'e grûn, mar meast by wetter. In nêst bestiet út trije oant fiif aaien. It iten fan 'e mangrovereager bestiet út lytse fiskjes, kikkerts en ynsekten, dy't se fange troch ûnferweechlik te wachtsjen oant der in proai foarby komt.

Status

BirdLife International beskôget de Butorides-soarten als ien soarte en dêrom is de beöardieling fan syn bedrigingsstatus basearre op 'e populaasje as gehiel. It skaai hat in ûnbidich grut ferspriedingsgebiet en de kâns op útstjerren is lyts. De wrâldpopulaasje fan it skaai wurdt as stabyl beskôge en soe neffens in rûzing fan 2023 bestean út 173.000 oant 1.500.000 folwoeksen fûgels. It skaai stiet as net bedrige (Least Concern, 2022) op 'e Reade list fan 'e IUCN.

Boarnen, noaten en/as referinsjes:

BirdLife, oproppen 2 febrewaris 2026. Ebird, oproppen 2 febrewaris 2026. Birds of the World, oproppen 2 febrewaris 2026. Commons Wikimedia Commons  Ofbylden dy't by dit ûnderwerp hearre, binne te finen yn de kategory Mangroverager fan Wikimedia Commons.