Brúnkopmiuw

brúnkopmiuw
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift wilstereftigen (Charadriiformes) famylje seefûgels (Laridae) skaai kobben (Chroicocephalus)
soarte
Chroicocephalus brunnicephalus
Jerdon, 1840
IUCN-status:

De brúnkopmiuw (Chroicocephalus brunnicephalus) is in Aziatyske fûgel dy't briedt yn bercheftige gebieten. De fûgel heart ta de famylje fan 'e seefûgels (Laridae) binnen it skift fan 'e wilstereftigen (Charadriiformes).

Skaaimerken

De brúnkopmiuw liket in soad op 'e kob (C. ridibundus), mar is wat grutter (41–45 sintimeter), hat in bredere snaffel en rûnere wjukken. Folwoeksen fûgels hawwe in brede swarte râne op 'e wjukpunten en in wyt plak op 'e bûtenste slachpinnen. De ûnderkant fan 'e wjuk is donkerder as dy fan 'e kob. De iris is giel, wylst dy by de kob brún is. Yn briedkleed is de kap ljochter brún.

Ferskil winter- en simmerdracht brúnkopmiuw

• 
  Simmerdracht.
• 
  Winterdracht.

Fersprieding en taksonomy

De brúnkopmiuw briedt yn bercheftige kriten fan Súd- en Sintraal-Aazje, fan Turkestan yn it westen oant súdwestlik Gansu (Sina) yn it easten, en yn it suden yn 'e Pamir en Tibet. Winterdeis oerwinteret de brúnkopmiuw oan 'e kusten fan Yndia, noardlik Sry Lanka en Súdeast-Aazje, en yn lytse oantallen westlik fan Yndia oant op it Arabysk Skiereilân.

In hiel skoft waard it grutste part fan 'e kobben en miuwen yn it skaai Larus pleatst. Genetysk ûndersyk hat lykwols útwiisd dat de soarten yn Larus net allegear nau besibbe binne. Pons et al. (2005) ha dêrom útsteld om Larus op te dielen yn in tal lytsere skaaien, wêrby't de brúnkopmiuw yn Chroicocephalus set waard. In soad autoriteiten ha dat útstel opfolge.

Ekology

Brúnkopmiuw yn winterfearren mei proai.

De brúnkopmiuw briedt by grutte marren of yn omlizzende sompen op grutte hichten. Winterdeis wurdt de fûgel oantroffen yn kustkriten en by rivieren. It brieden begjint yn maaie, ek as de marren noch beferzen binne. De fûgels briede yn koloanjes fan fyftich oant mear as tûzen eksimplaren, faak tichteby wytstirnzen. Se lizze ien oant fjouwer aaien, mar meastentiids trije. Hoe lang de briedtiid krekt is, is ûnbekend. Winterdeis libbet de brúnkopmiuw fan fisk en garnalen; yn 'e briedtiid is it dieet fariearre en bestiet it ûnder oare út kjifdieren en wjirms.

Status en bedriging

De soarte hat in grut ferspriedingsgebiet en in grutte populaasje mei in stabile ûntwikkeling. Op grûn fan dizze kritearia kategorisearret de IUCN de soarte as net bedrige (Least Concern).

Boarnen, noaten en/as referinsjes:

BirdLife, oproppen 24 juny 2026. eBird, oproppen 24 juny 2026. Birds of the World, oproppen 24 juny 2026. Commons Wikimedia Commons  Ofbylden dy't by dit ûnderwerp hearre, binne te finen yn de kategory Chroicocephalus brunnicephalus fan Wikimedia Commons.