Bartramgriltsje

bartramgriltsje
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift wilstereftigen (Charadriiformes) famylje snipfûgels (Scolopacidae) skaai bartramgriltsjes (Bartramia)
soarte
Bartramia longicauda
Bechstein, 1812
IUCN-status:
ferspriedingsgebiet
briedgebiet      trekfûgel      wintergast

It bartramgriltsje of Bartrams griltsje (Bartramia longicauda) is in grutte Noard-Amerikaanske steltrinner binnen de famylje fan 'e snipfûgels (Scolopacidae). De soarte is nau besibbe oan 'e wylpen yn it skaai Numenius en wurdt as iennige soarte yn syn eigen skaai Bartramia pleatst.

Skaaimerken

In folwoeksen fûgel mjit tusken de 28 en 32 sintimeter en hat in wjukspanwiidte fan 50–55 sintimeter. De fûgel hat lange giele poaten, in lange hals en in lange sturt. De kop en de hals binne ljocht mei brune streken en de eachring is wyt. De rêch en de boppekant fan 'e wjukken binne donker en brún spikkele en de búk is wyt. De fûgel hat gjin dúdlik winterkleed.

Fersprieding

It bartramgriltsje is in lange-ôfstânstrekker dy't briedt yn sintraal Noard-Amearika en Alaska en oerwinteret yn Súd-Amearika. It is in seldsume gast yn West-Jeropa, mei in 50-tal waarnimmings yn Grut-Brittanje. De fûgel is ek sjoen yn Skandinaavje (útsein Yslân), yn Ierlân, Spanje, Frankryk, Portugal, Itaalje en Grikelân.

Ekology

It bartramgriltsje komt foar op iepen greidlân en fjild, en wurdt faak op stekken of tillefoanpeallen sjoen. Soms is de fûgel te finen yn lytse, losse kloften. Hy siket foaral iten op it each; it dieet bestiet út ynsekten, slakken, wjirms en oare lytse wringeleaze dieren. Wat minder yt er ek sied.

Brieden

Nêst.

De briedtiid falt tusken de iere en lette simmer. It nêst wurdt op 'e grûn boud yn ticht gers. It wyfke leit fjouwer aaien en de jongen wurde troch beide âlden fersoarge. Se kinne ôfliedingsmaneuvers útfiere om rôfdieren by it nêst en de piken wei te lokjen.

Status en bedrigings

De soarte hat in grut ferspriedingsgebiet en in grutte populaasje en der wurdt sels tocht dat it tal fûgels tanimt. Dêrfandinne kategorisearret de IUCN de soarte as net bedrige (Least Concern).

Namme

De wittenskiplike skaainamme Bartramia is ôflaat fan 'e Amerikaanske biolooch William Bartram.

Boarnen, noaten en/as referinsjes:

BirdLife, oproppen 1 july 2026 Birds of the World, oproppen 1 july 2026 eBird, oproppen 1 july 2026 Commons Wikimedia Commons  Ofbylden dy't by dit ûnderwerp hearre, binne te finen yn de kategory Bartramia longicauda fan Wikimedia Commons.