Auck Peanstra

Ut Wikipedy
Jump to navigation Jump to search
Auck Peanstra
Livro preto.svg skriuwer
persoanlike bysûnderheden
echte namme Aukje Aaltje Hoogland-Peenstra
nasjonaliteit flagge fan Nederlân Nederlânsk
berne 2 novimber 1954
berteplak Ljouwert
stoarn 29 febrewaris 2016 (61 jier)
stjerplak Bitgummole
etnisiteit flagge fan Fryslân Frysk
wurk
taal Frysk
sjenre Roman, berneboek, koart ferhaal
prizen Sjoch tekst
offisjele webside
Hiemside


Rymposter 2007.

Auck Peanstra (skûlnamme fan Aukje Aaltje Hoogland-Peenstra) (Ljouwert, 2 novimber 1954 - Bitgummole, 29 febrewaris 2016) wie in Frysk skriuwster fan romans en berneboeken.

Biografy[bewurkje seksje | boarne bewurkje]

Yn Grou gie Peanstra nei de legere skoalle, dêrnei gie se nei de mulo. Doe't se dêr slagge wie, die se de oplieding ta beukerliedster en helle de L.U.-akte Frysk. Se wurke as skoaljuffer yn it basisûnderwiis, dat begûn yn Bitgummole dêr't se har ek te wenjen sette. Nei't se bern krigen hie, joech se har fêste baan op en wurke faak as ynfalkrêft. Nei in pear jier as faklearkrêft Frysk wurke te hawwen, wurke se yn dieltiid yn groep 2. Yn 2011 hat se it ûnderwiis oerjûn en sûnt lei sy har ta op it skriuwen en it jaan fan lêzings oer har wurk, op skoallen en by ferienings.

Skriuwe hat Peanstra eins altiten al dien, it begûn fral mei fersen dy't ûnder oare yn de Ljouwerter Krante publisearre waarden. Doe't de bern grutter waarden, krige se mear tiid om te skriuwen. Se skreau doe ferhalen foar bern en jongerein, yn 1991 debutearre se mei in ferhaal yn in sammelbondel foar bern, útjûn troch de Afûk. Yn 1993 ferskynde har earste boek: Melle moat in bril, by de Koperative Utjouwerij. Dêrnei folgen der hast alle jierren nije boeken foar bern en jongerein. Yn 1998 krige se de Simke Kloostermanpriis foar it boek Yn piama de dyk oer, yn 2001 en 2007 folgen twa nominaasje foar dy priis. Ek krige se trije kear de Sulveren Spjelde fan de Fryske Berneboekesjuery.

Auck Peanstra wie benammen bekend as skriuwster fan berneboeken, mar se skreau ek wolris foar folwoeksenen. Yn 2002 kaam har earste roman út, Elske din datter. Yn 2007 folge dêrop Sitebuorren, myn eigen paradys. It boek waard trije kear werprinte en it fertelt har oantinkens oan har jeugd yn Sytebuorren, dat leit op in eilân tusken Grou en Aldegea. Yn 2008 krige se foar dat boek de Rink van der Veldepriis. Yn 2011 kaam har tredde roman by de Afûk út: Skamte. It boek is fiksje mei autobiografyske eleminten

Njonken it proaza dat se skreau, wurke se as skriuwster ek mei oan de learmetoade Frysk foar it basisûnderwiis: Studio F. Fierder wie se ien fan de skriuwsters fan de Tomke-boekjes. Auck Peanstra en Riemkje Pitstra soargen tegearre foar de teksten fan de ferhaaltsjes foar de telefyzje en de byhearrende boekjes, dy't om in beskaat tema hinne skreaun wurde. Omrop Fryslân stjoert de bewurke ferhaaltsjes út. Ek skreau se - al of net yn de mande mei oaren - revueteksten. It iepenloftspul fan Dronryp hat twa stikken fan har hân opfierd: De stiennen ûlebuorden (1997) en Lidewij (1999). Se waard gauris frege as ferhaleferteller.

Auck Peanstra stoar yn de âldens fan 61 jier oan de gefolgen fan kanker. Hja wie troud mei Frâns Hoogland, mei wa't se twa bern hie, Doryn en Jan. By har ferstjerren hie se dêropta fjouwer beppesizzers.

Bibliografy[bewurkje seksje | boarne bewurkje]

Berneboeken[bewurkje seksje | boarne bewurkje]

  • 1993 : Melle moat in bril ha
  • 1995 : Fertelle fan Jelle
  • 1996 : Jan en Jeltsje
  • 1997 : Yn piama de dyk oer
  • 1998 : Lit net los Pier
  • 1998 : Kokkebynkes
  • 1999 : Smoesjes en fleanende fisken
  • 2000 : Tomke winterboek
  • 2000 : Kattekwea en bargebiten
  • 2000 : Keutels by de kofje
  • 2001 : By beppe yn't bedstee
  • 2002 : Frjemde kluchten
  • 2003 : Tomke, in pot fol ferhalen (mei Riemkje Pitstra)
  • 2004 : Skytmerakels
  • 2005 : By beppe yn 't bedstee (werprintinge)
  • 2005 : Alles foar in sint
  • 2005 : Keutels by de kofje (werprintinge)
  • 2005 : Kikkerts fange mei Tomke (mei Riemkje Pitstra)
  • 2006 : Kening Aap
  • 2006 : Jan en Jeltsje (bew. werprintinge)
  • 2006 : Tomke yn de bistetún (mei Riemkje Pitstra)
  • 2007 : Tomke en it kado
  • 2007 : Tomke en de krystkrânskes
  • 2007 : Yn piama de dyk oer (werprintinge)
  • 2007 : Geheim! (mei Riemkje Pitstra), en rymposter (mei Reinier Knol).
  • 2008 : Grapkemakkers
  • 2008 : Tomke nei it húske
  • 2008 : Tomke jierboek (mei Riemkje Pitstra, Geartsje Douma en Luuk Klazenga)
  • 2009 : It goud fan de Aboriginals (Traveliers rige)
  • 2009 : Krûpelhintsjes
  • 2010 : In geheime kat
  • 2010 : Tomke Ferkearsboek (mei Riemkje Pitstra)
  • 2011 : Tomke foarlêsferhaaltsjes (mei Riemkje Pitstra en Luuk Klazenga)
  • 2011 : Kantsje board op Kurasau (Traveliers rige)
  • 2013 : De boel op stelten (ferhalebondel)

Romans[bewurkje seksje | boarne bewurkje]

  • 2002 : Elske din datter
  • 2007 : Sitebuorren myn eigen paradys (3e pr. 2008)
  • 2011 : Skamte

Prizen[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:
  • Webstee Auck Peanstra
  • Skriuwersynformaasje by Sirkwy
  • Vries, Sietse de, Skriuwster Auck Peanstra wie tige produktyf, yn: de Ljouwerter Krante, 3 maart 2016 (rubryk In Memoriam).
  • ——, stjerberjocht Auck Peanstra [Aukje Aaltje Hoogland-Peenstra], yn: de Ljouwerter Krante, 3 maart 2016.