Arabyske ielgoes

Arabyske ielgoes
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift ginteftigen (Suliformes) famylje ielgoesfûgels (Phalacrocoracidae) skaai ielguozzen (Phalacrocorax)
soarte
Phalacrocorax nigrogularis
Ogilvie-Grant & Forbes, 1899
IUCN-status:
ferspriedingsgebiet

De Arabyske ielgoes (Phalacrocorax nigrogularis) is in fûgel út 'e famylje fan 'e ielguozzen (Phalacrocoracidae). De wittenskiplike namme fan 'e soarte waard yn 1899 publisearre troch William Robert Ogilvie-Grant en Henry Ogg Forbes. It is in soarte dy't kwetsber wurden is troch habitatferlies en dy't foarkomt om 'e Perzyske Golf en besuden it Arabysk Skiereilân.

Skaaimerken

De fûgel is sa'n 80 sm lang en foar it meastepart swart fan kleur, mei in brûnskleurige glâns op 'e rêch en wjukken. De fûgel is wat lytser as de gewoane ielgoes (Phalacrocorax carbo), mar mist it wyt op 'e kop en it wite kinplak. Ek hat er in minder swiere snaffel.

Fersprieding en leefgebiet

De soarte komt foar oan 'e seekusten en op eilannen yn 'e Perzyske Golf. Der is in noardlike populaasje dy't briedt oan 'e kusten fan Bachrein, de Feriene Arabyske Emiraten, Saûdy-Araabje, Katar en mooglik ek noch yn Iran.

De súdlike populaasje briedt op eilannen oan 'e súdkust fan Oman, op Sokotra en lâns de kusten fan 'e Golf fan Aden.

Status

De grutte fan 'e populaasje waard yn 2010 troch BirdLife International rûsd op likernôch 220.000 folwoeksen yndividuen. De populaasje nimt ôf. Om't de fûgels op 'e grûn briede, binne se gefoelich foar fersteuring; by slimme fersteuring kinne se it nêst of sels in hiele koloanje foargoed ferlitte.

Yn 'e kustgebieten fine ferskate yndustriële en militêre ûntwikkelingen plak dy't foar fersteuring soargje. Dêrnjonken bestiet der gefaar foar fersmoarging troch oalje.

Om dy redenen stiet de soarte as kwetsber op 'e Reade List fan 'e IUCN.

Boarnen, noaten en/as referinsjes:

BirdLife, oproppen 21 augustus 2026. Birds of the World, oproppen 21 augustus 2026. eBird, oproppen 21 augustus 2026. Commons Wikimedia Commons  Ofbylden dy't by dit ûnderwerp hearre, binne te finen yn de kategory Arabiske ielgoes fan Wikimedia Commons.