Ant-Man and the Wasp

Ant-Man and the Wasp
film
(Filmposter yn 'e Ingelske Wikipedy)
makkers
regisseur	Peyton Reed
produsint	Kevin Feige Stephen Broussard
senario	Chris McKenna Erik Sommers Paul Rudd Andrew Barrer Gabriel Ferrari
basearre op	Ant-Man fan Stan Lee,    Larry Lieber en Jack Kirby
kamerarezjy	Dante Spinotti
muzyk	Christophe Beck
filmstudio	Marvel Studios
distribúsje	Walt Disney Studios    Motion Pictures
spilers
haadrollen	Paul Rudd Evangeline Lilly Michael Douglas
byrollen	Hannah John-Kamen Michael Peña Laurence Fishburne Michelle Pfeiffer Walter Goggins Randall Park
skaaimerken
lân/lannen	Feriene Steaten
premiêre	25 juny 2018
foarm	langspylfilm
sjenre	superheldefilm
taal	Ingelsk
spyltiid	118 minuten
budget en resultaten
budget	$130–195 miljoen
opbringst	$622,7 miljoen
filmsearje
filmsearje	Marvel Cinematic Universe
● foarich diel	Avengers: Infinity War
● folgjend diel	Captain Marvel

Ant-Man and the Wasp is in Amerikaanske superheldefilm út 2018 ûnder rezjy fan Peyton Reed, mei yn 'e haadrollen Paul Rudd, Evangeline Lilly en Michael Douglas. De titel betsjut letterlik "Eamelder-Man en de Meeps", in ferwizing nei de superhelden Scot Lang alias Ant-Man en Hope van Dyne alias The Wasp. De film is basearre op 'e strips fan útjouwerij Marvel Comics oer dat superheldepear, en is in ferfolch op Ant-Man út 2015. Ant-Man and the Wasp makket diel út fan 'e Marvel Cinematic Universe-filmsearje, en folget as sadanich op Avengers: Infinity War út 2018, wylst er sels foarôf giet oan Captain Marvel út 2019.

It ferhaal folget de troch omstannichheden faninoar ferfrjemde rekke minners Scott Lang en Hope van Dyne en Hope har sikkeneurige mar briljante heit dr. Hank Pym, wannear't se gearwurkje moatte om Hope har mem Janet te rêden, dy't al tritich jier fêstsit yn it Kwantumryk. Dêrby wurde se oan ien wei tsjinwurke troch de FBI, de op jild beluste krimineel Sonny Burch, en in mysterieus figuer dat troch fêste foarwerpen hinne rinne en rikke kin en "de Geast" neamd wurdt. Fan 'e filmkritisy krige Ant-Man and the Wasp oer it algemien positive resinsjes, en yn 'e bioskopen wie de film in grut kommersjeel súkses. In ferfolch, mei as titel Ant-Man and the Wasp: Quantumania, kaam yn 2023 yn 'e bioskopen.

Plot

Nei't Scott Lang (alias Ant-Man) de Wenenakkoarten brutsen hat mei syn help oan Captain America yn dy syn striid tsjin Iron Man yn Dútslân (sjoch: Captain America: Civil War), ferdwynt er in skoft yn it tichthûs en as er frijkomt, wurdt er noch foar in beskate perioade ûnder hûsarrest pleatst. Hy hat gjin kontakt mear mei syn grutte leafde Hope van Dyne, noch mei har heit, de sikkeneurige mar briljante wittenskipper Hank Pym, mei't er harren yn 'e swierrichheden brocht hat troch yn Dútslân harren technology te brûken. Twa jier nei dato binne Hope en Pym noch altyd op 'e flecht foar de FBI. Trije dagen foar't Lang syn hûsarrest ôfrint, slagget it Hope en Pym om op in geheime lokaasje yn harren laboratoarium koart in tagong ta it Kwantumryk te iepenjen. Se tinke nammentlik dat Janet van Dyne, de oarehelte fan Pym en de mem fan Hope, dêre noch altyd fêstsit nei't se harsels tritich jier earder, yn 1987, ta sub-atomêre grutte krompen hie om in kearnramp foar te kommen. Op it stuit dat de tagong iepengiet, hat Lang in tige libbensechte dream wêryn't er Janet van Dyne is. Hy nimt neitiid kontakt op mei Pym, dy't ornearret dat Lang syn bewustwêzen by syn eardere besyk oan it Kwantumryk (sjoch: Ant-Man) 'kwantumbetize' rekke is mei Janet harres.

Hope en Pym ûntfiere Lang en litte in fergrutte eamelder yn syn plak efter mei syn ankelbân om, sadat spesjaal agint Jimmy Woo fan 'e FBI, dy't it tafersjoch oer Lang hat, gjin ûnrie rûke sil. Om't se leauwe dat de dream dy't Lang hie in boadskip fan Janet is, en dêrmei bewiis dat sy noch libbet, sette se útein mei it ûntwerpen fan in stabile tagong ta it Kwantumryk om har te rêden. Dêrfoar hawwe se ferlet fan in apparaatûnderdiel dêr't se inkeld fia de swarte merk oan komme kinne fia de krimineel Sonny Burch. Dyselde beseft lykwols hoefolle jild oft er fertsjinje kin mei de ferkeap fan 'e technology út it laboratoarium fan Hank Pym. Dat wannear't er in moeting hat mei Hope, besiket er har te bestellen. Mar yn har persona fan The Wasp weeft Hope handich mei Burch en syn trewanten ôf. De swierrichheden boazje oan as Hope oanfallen wurdt troch in maskere persoan dy't út faze mei de fysike wurklikheid is, sadat hy/sy troch foarwerpen hinne rinne en rikke kin. Lang besiket Hope te helpen om dy "Geast" oermânsk te wurden, mar harren tsjinstanner ûntsnapt mei it krúsjale apparaatûnderdiel èn it laboratoarium fan Pym, dat er krompen hie ta de grutte fan in reiskoffer.

Tink derom: Yn de tekst hjirûnder wurdt de ôfrin fan de film beskreaun. As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Mei tsjinnichheid siket Pym help by syn fan him ferfrjemde âlde ûndersykspartner Bill Foster, dy't him, Hope en Lang op in idee bringt wêrmei't se it stellen laboratoarium opspoare kinne. Se fine dat werom yn 'e wente fan 'e Geast, dy't in jonge frou blykt te wêzen dy't Ava Starr hjit. Dan komt lykwols oan it ljocht dat it in falstrik is, mei't Foster en Ava gearwurkje en Lang, Hope en Pym finzen nimme. Ava har heit Elihas Starr wie in oare eardere meiwurker fan Pym, dy't troch him ûntslein waard en dêrnei op eigen manneboet mei syn eksperiminten trochgie. Dat pakte alhiel ferkeard út doe't ien eksperiment einige mei him en syn frou Catherine dea en harren dochterke oanhelle mei molekulêre ynstabiliteit, wat har út faze mei de fysike wurklikheid brocht en oanhâldende pine joech. Foster en Ava fertelle dat Ava noch mar in pear wiken te libjen hat en inkeld genêzen wurde kin mei de kwantumenerzjy dy't Janet van Dyne yn harsels opnommen hat yn har jierren yn it Kwantumryk. Se binne dêrom fan doel en sûch dy enerzjy út har. Mei't er derfan oertsûge is dat soks de dea fan Janet betsjutte soe, wegeret Pym mei te wurkjen oan dat plan. Ynstee ropt er de help yn fan in stikmannich eamelders dy't opblaasd binne ta de grutte fan hûnen, wat him, Hope en Lang by steat stelt om te ûntkommen mei it laboratoarium en it missende ûnderdiel.

Op in geheim plak blaze se it laboaratoariumgebou wer op ta syn wiere grutte, wêrnei't se in stabilere tagong nei it Kwantumryk iepenje. Sa slagget it harren om fia Lang op 'e nij kontakt te lizzen mei Janet, dy't harren kalibrearrings bysteld om 'e tagong folslein stabyl te meitsjen. Dêrnei jout se har eigen sekuere lokaasje troch, mar heakket dêr in warskôging oan ta dat se mar twa oeren hawwe om har te rêden foar't de ynherinte ynstabiliteit fan it Kwantumryk soks foar mear as in iuw ûnmooglik meitsje sil. Underwilens sit Lang syn maat Luis, mei wa't er in needlijend befeiligingsbedriuw runt, yn oer in presintaasje foar in wichtige kliïnt, dy't foar moarn op it programma stiet. Om it spul mei him trochnimme te kinnen, en om't er sels net út it laboratoarium wei kin, bringt Lang oan Luis de lokaasje fan it laboratoarium út. Luis en syn wurknimmers Dave en Kurt wurde fuort dêrnei oermastere troch Sonny Burch en syn trewanten, dy't Luis folpompe mei wierheidssearum, sadat er harren fertelt wêr't it laboratoarium is. Burch beslút dat it makliker is om 'e FBI it swiere wurk dwaan te litten en neitiid it laboratoarium efteroer drukke te litten troch de korrupte spesjaal agint Stoltz, dat hy skillet Woo op mei in anonime tip.

Luis warskôget Lang oer wat der bard is, wêrnei't Lang halje-trawalje nei hûs moat om foar te kommen dat Woo bewize kin dat hy syn hûsarrest ferbrutsen hat. It slagget Lang, mei help fan syn jonge dochterke Cassie, om Woo te fluch ôf te wêzen. Mar Hope en Pym wurde arrestearre troch de FBI, en harren yn beslach nommen kofferlaboratoarium wurdt troch Stoltz by de rest fan it yn beslach nommen bewiismateriaal wei helle om oan Burch te jaan. Ear't er dat lykwols dwaan kin, komt de Ava him oer it mad en pykt út mei it laboratoarium. Lang, dy't de skrik no flink te pakken hat, wifelet oft er syn hûsarrest wol op 'e nij doar te ferbrekken, mar dêrta oanfitere troch Cassie docht er it dochs. Hy brekt Hope en Pym út it pleatslike FBI-kantoar en trijeresom spoare se it laboratoarium op (dat Pym, nei de lêste kear dat it stellen waard, foarsjoen hat fan in tracker). Wylst Lang en Hope tegearre Ava ôfliede, giet Pym it Kwantumryk binnen om Janet te sykjen, dy't er lang om let libben oantreft.

Yn 'e normale wrâld wurde Lang, Hope en Luis ûnderwilens tenei kommen troch Burch en syn mannen, wat liedt ta in lange en spektakulêre efterfolging troch de strjitten fan San Francisco, dêr't ek Ava har wer yn mingt. Op 't langelêst wit Burch it laboratoarium yn 'e hannen te krijen en te ûntkommen op in fearboat, mar in reuseftige Lang swimt him efternei en nimt it gebou werom. Neitiid ferliest er it lykwols wer oan Ava, dy't it gebou yn 'e haven ta wiere grutte opblaast. Se giet it laboratoarium binnen en set útein mei it opsûgen fan 'e kwantumenerzjy fan Janet, ek al besiket Foster dat om 'e nocht tsjin te kearen. Hope en Lang kringe it laboratoarium binnen en stopje Ava, wêrnei't Pym en Janet beholden weromkeare kinne út it Kwantumryk. Neitiid jout Janet frijwillich in diel fan har kwantumenerzjy oan Ava, sadat har molekulêre tastân tydlik stabilisearre wurdt. Lang keart op 'e nij krekt op 'e tiid werom nei hûs om Woo te fluch ôf te wêzen. De erchtinkende FBI-agint wit dat der wat net yn 'e heak is, mar hat gjin oare kar as om Lang syn hûsarrest formeel te beëinigjen, mei't de dêrfoar fêststelde perioade foarby is. Underwilens wurde Burch en syn mannen oppakt troch de FBI en dûke Ava en Foster tegearre ûnder. Lang en Hope ferfetsje harren romantyske relaasje ûnder oanmoediging fan Cassie.

Healwei de ôftiteling folget in sêne wêryn't Lang troch Pym, Janet en Hope nei it Kwantumryk stjoerd wurdt mei as doel om genôch kwantumenerzjy te rispjen om Ava foargoed te genêzen. Op it stuit dat se Lang weromhelje wolle, feroarje Pym, Janet en Hope ynienen yn stadich fuortdwarreljend stof (sjoch: Avengers: Infinity War), mei as gefolch dat Lang yn it Kwantumryk fêst komt te sitten.

Rolferdieling

Paul Rudd.

Evangeline Lilly.

Michael Douglas.

haadrollen

personaazje	akteur/aktrise
Scott Lang / Ant-Man	Paul Rudd
Hope van Dyne / The Wasp	Evangeline Lilly
dr. Hank Pym	Michael Douglas

byrollen

personaazje	akteur/aktrise
Ava Starr / Geast	Hannah John-Kamen
Luis	Michael Peña
Bill Foster	Laurence Fishburne
Janet van Dyne	Michelle Pfeiffer
Sonny Burch	Walter Goggins
FBI-agint Jimmy Woo	Randall Park
Cassie Lang	Abby Ryder Fortson
Kurt	David Dastmalchian
Dave	Tip "T.I." Harris
Maggie Lang Paxton	Judy Greer
Jim Paxton	Bobby Cannavale
Uzman	Divian Ladwa, trewant fan Burch
Anitolov	Goran Kostić, trewant fan Burch
Knox	Rob Archer, trewant fan Burch
korrupte FBI-agint Stoltz	Sean Kleier
Elihas Starr	Michael Cerveris
Catherine Starr	Riann Steele
man waans auto by fersin ferlytse wurdt	Stan Lee (cameo)
whalewatching-kaptein	Tim Heidecker
loaie ûnderwizer	Brian Huskey
de jonge Hope van Dyne	Madeleine McGraw
de jonge Ava Starr	RaeLynn Bratten

Produksje en distribúsje

Produksje

Ant-Man and the Wasp waard regissearre troch Peyton Reed, dy't ek de rezjy dien hie foar de earste Ant-Man-film. Hy wurke nei in senario fan Chris McKenna, Erik Sommers, Paul Rudd, Andrew Barrer en Gabriel Ferrari op basis fan 'e superheld Ant-Man fan striptekeners Stan Lee, Larry Lieber en Jack Kirby fan útjouwerij Marvel Comics. Reed fertelde yn 'e media hoe moai oft er it fûn om diskear in film oer Ant-Man fan it begjin ôf oan ûntwikkelje te kinnen. Hy stie derop om Hope van Dyne alias The Wasp op gelikense foet te behanneljen mei Scott Lang/Ant-Man. As produsinten wiene Kevin Feige en Stephen Broussard by it projekt belutsen foar de Marvel Studios. Foar de film wie in budget beskikber fan $130 miljoen (neffens Deadline Hollywood) oant $195 miljoen (neffens The Numbers). De kamerarezjy wie yn 'e hannen fan Dante Spinotti, en de filmmuzyk waard fersoarge troch Christophe Beck.

Opnamen foar Ant-Man and the Wasp op lokaasje op Lombard Street yn San Francisco.

Opnamen

De opnamen foar Ant-Man and the Wasp setten op 1 augustus 2017 útein en duorren oant en mei 19 novimber fan dat jier. Dêrby waard gebrûk makke fan 'e mei opset sin misliedende wurktitel Cherry Blue om foar te kommen dat de filmsets ûnder de foet rûn wurde soene troch entûsjaste fans. It meastepart fan 'e sênes waard filme yn it filmstudiokompleks fan 'e Pinewood Atlanta Studios (no de Trilith Studios) yn Fayetteville, in foarstêd fan Atlanta yn 'e Amerikaanske steat Georgia. Dêrnjonken waard in diel fan Ant-Man and the Wasp op lokaasje opnommen yn 'e binnenstêd fan Atlanta en yn 'e pleatslike Samuel M. Inman Middle School, en teffens op 'e Atlanta Motor Speedway, in motorsportsirkwy yn Hampton (Georgia). Oare lokaasjes dêr't filme waard, wiene Savannah (Georgia), San Francisco en Hawaï.

Postproduksje

De special effects dy't yn 'e postproduksje oan 'e film tafoege waarden, wiene produsearre troch û.o. Industrial Light & Magic (ILM) en Digital Domain. Guon fan 'e wichtichsten fan dy effekten wiene om Michael Douglas en Michelle Pfeiffer te ferjongjen foar de tritich jier earder spyljende prolooch fan 'e film en om dy ferjonging der normaal útsjen te litten.

Distribúsje

De distribúsje fan Ant-Man and the Wasp waard fersoarge troch Walt Disney Studios Motion Pictures, de distribúsjedifyzje fan The Walt Disney Company, dat de memme-ûndernimming fan 'e Marvel Studios is. De film gie op 25 juny 2018 yn it El Capitan Theatre yn Hollywood yn premiêre, en iepene dêrnei op 6 july yn 'e Amerikaanske bioskopen. It byhearrende soundtrackalbum ferskynde op dy lêste datum by platemaatskippijen Hollywood Records en Marvel Music. Ant-Man and the Wasp kaam op 2 oktober 2018 beskikber as digitale download en waard op 16 oktober fan dat jier útbrocht op dvd en blu-ray.

De Pinewood Atlanta Studios, dêr't it meastepart fan 'e opnamen foar Ant-Man and the Wasp plakfûn.

Untfangst

Fan 'e filmkritisy krige Ant-Man and the Wasp oer it algemien positive resinsjes. Sa joech Peter Travers fan it tydskrift Rolling Stone de film 3 fan 4 stjerren. Hy priizge it aktearjen fan haadrolspilers Paul Rudd en Evangeline Lilly. Datselde die Richard Roeper fan 'e Chicago Sun-Times, dy't ek in protte lof hie foar de lichthertige toan fan 'e film. Yn The Boston Globe fûn Ty Burr dat Ant-Man and the Wasp de perfekte "simmer-airconditioningfilm" wie. Wol tekene er dêrby oan dat der tefolle subplots yn sieten en te min Michelle Pfeiffer. Stephanie Zacharek skreaun yn it blêd Time dat it dreech wie om "aktyf in hekel te hawwen" oan dizze film, hoewol't se net ûnder de yndruk wie fan 'e gruttere, mei special effects oerladen sênes.

Neffens Manohla Dargis fan The New York Times wie de "flugge, opteine en lichthertige" toan fan 'e film in grutte ferbettering yn ferhâlding ta de earste film oer Ant-Man. Allyksa skreau Owen Gleiberman yn Variety dat Ant-Man and the Wasp in heger tempo en mear selsfertrouwen hie en grappiger en fernimstiger wie as de orizjinele film. Hy fûn ek dat it regisseur Peyton Reed slagge wie om syn nije film "genôch persoanlikheid" te jaan om 'e spyldoer fan twa oeren en syn hast ûnder tefolle special effects kapseizende klimaks te oerwinnen. Dêrby tekene er oan dat persoanlikheid "net alhiel itselde is as minsklikheid. Mar it liket der genôch op om foar in miniatuerferzje troch te gean."

Op 'e webside Rotten Tomatoes, dy't resinsjes sammelet, hat Ant-Man and the Wasp in heech goedkarringspersintaazje fan 87%, basearre op 446 ûnderskate resinsjes. De konsensuskrityk fan 'e webside, gearstald út al dy resinsjes, stelt: "As in lichtere, ljochtere superheldefilm dy't oandreaun wurdt troch it garisma dat Paul Rudd en Evangeline Lilly útstriele sûnder dat se der war foar hoege te dwaan, is Ant-Man and the Wasp in feroaring fan smaak dêr't yn it Marvel Cinematic Universe gâns ferlet fan wie." Op Metacritic, de wichtichste konkurrint fan Rotten Tomatoes, behellet Ant-Man and the Wasp in goedkarringspersintaazje fan 70%, basearre op 56 resinsjes.

Regisseur Peyton Reed.

Resultaat

Opbringst

Ant-Man and the Wasp brocht yn 'e bioskopen yn 'e Feriene Steaten en Kanada $216,6 miljoen op, en yn alle oare lannen en territoaria $406,0 miljoen. Wrâldwiid kaam de opbringst dêrmei út op $622,7 miljoen. Ofset tsjin it budget fan $130–195 miljoen betsjut dat in winst fan tusken de $427,7 miljoen en $492,7 miljoen, hoewol't dêr de marketingkosten noch wol ôf moatte. De webside Deadline Hollywood berekkene dat de film úteinlik in netto winst fan $100 miljoen draaide.

Ant-Man and the Wasp wie de op tsien nei meast opbringende film fan 2018, nei Avengers: Infinity War, Black Panther, Jurassic Park: Fallen Kingdom, Incredibles 2, Aquaman, Bohemian Rhapsody, Venom, Mission: Impossible – Fallout, Deadpool 2 en Fantastic Beasts: The Crimes of Grindelwald.

Prizen

Ant-Man and the Wasp waard nominearre foar de Screen Actors Guild Award foar bêste groep stuntlju yn in film en teffens foar de Teen Choice Awards foar favorite aksjefilm, favorite akteur yn in aksjefilm (Paul Rudd) en favorite aktrise yn in aksjefilm (Evangeline Lilly).

Keppelings om utens

• (in) Offisjele webside fan Ant-Man and the Wasp
• (in) Ynformaasje oer Ant-Man and the Wasp yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.