Amerikaanske klikstirns

Amerikaanske klikstirns
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift wilstereftigen (Charadriiformes) famylje seefûgels (Laridae) skaai klikstirnzen (Thalasseus)
soarte
Thalasseus acuflavidus
Cabot, 1847
IUCN-status: gjin status
ferspriedingsgebiet
briedfûgel      stânfûgel      trekfûgel      net briedend      mooglik stanfûgel

De Amerikaanske klikstirns (Thalasseus acuflavidus, ek wol Sterna acuflavidus) is in fûgel yn it skaai klikstirnzen (Thalasseus).

Skaaimerken

Fûgels yn winterkleed.

Amerikaanske klikstirnzen ha in hiel soad fan 'e gewoane klikstirns en lykas dy fûgel ha se in swarte snaffel mei in giele punt, mar in ferskil is dat de snaffel steviger is. Amerikaanske klikstirnzen ferlieze boppedat earder harren briedkleed (in folslein swarte mûtse) en krije dus earder in wite foarholle. Juvenilen ha boppedat net it skobbige patroan fan 'e jonge gewoane klikstirns en binne effener griis, alhoewol't se betize wurde kinne mei de gewoane klikstirns yn it earste winterkleed.

Fersprieding

De soarte komt yn in grut gebiet foar oan kusten fan Virginia oant Frânsk-Guyana en Argentynje. De Amerikaanske klikstirns hat twa ûndersoarten:

• Thalasseus acuflavidus acuflavidus: fan eastlik Noard-Amearika oant de súdlike Kariben.
• Thalasseus acuflavidus eurygnathus: de eilannen by Fenezuëla en de Guyana's, noardlik en eastlik Súd-Amearika.

De ûndersoarte eurygnathus mei de giele snaffel.

De ûndersoarten fan 'e Amerikaanske klikstirns ferskille benammen yn snaffelkleur: de nominaatfûgels binne swart mei in giele punt fan wat fariabele omfang; dy fan T. a. eurygnathus is meast oant folslein giel.

Hâlden en dragen

De soarte is foar in part trekfûgel. De meast noardlike populaasjes ferlitte harren briedgebiet om súdliker te oerwinterjen. Hoe't de trekrûte's rinne is net bekend, mar oannommen wurdt dat se de kust folgje. Fûgels dy't oan 'e Súdamerikaanske kust fan 'e Stille Oseaan oerwinterje stekke oer fan 'e Kariben by de lâningte an Panama. Ringde fûgels fan 'e ûndersoarte T. a. acuflavidus binne yn Nederlân en it Feriene Keninkryk oantroffen.

Status

Fan 'e Amerikaanske klikstirns is gjin aparte IUCN-status om 't de fûgel troch de IUCN as ûndersoarte fan 'e gewoane klikstirns behannele wurdt. De klikstirns stiet as net bedrige op 'e Reade list. De grutste bedriging foar de soarte foarmet de fersteuring fan nêstkoloanjes troch minsken.

Boarnen, noaten en/as referinsjes:

Ebird. Avibase. Commons Wikimedia Commons  Ofbylden dy't by dit ûnderwerp hearre, binne te finen yn de kategory Thalasseus acuflavidus fan Wikimedia Commons.