Alice Eve

Ut Wikipedy
Jump to navigation Jump to search
Alice Eve
Filmklapper.png akteur
Alice Eve, Men in Black 3, 2012 (crop).jpg
persoanlike bysûnderheden
echte namme Alice Sophia Eve
nasjonaliteit Flag of the United Kingdom.svg Britsk
berne 6 febrewaris 1982
berteplak Londen (Ingelân)
etnisiteit Flag of Ireland.svg Iersk
Flag of England.svg Ingelsk
Flag of Wales.svg Welsk
jierren aktyf 2004 – no
offisjele webside
www.aliceeve.net/

Alice Eve (folút: Alice Sophia Eve; Londen, 6 febrewaris 1982) is in Ingelsk film-, tillefyzje- en toanielaktrise. Hja is benammen bekend wurden mei har rol as doktor Carol Marcus yn 'e Star Trek-film Star Trek: Into Darkness.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Eve waard yn 1982 yn 'e Britske haadstêd Londen berne as de dochter fan 'e akteurs Trevor Eve en Sharon Maughan. Hja is fan mingd Iersk, Ingelsk en Welsk etnysk komôf. Eve genoat ûnderwiis oan efterinoar de Bedales School, de More House School en de Westminster School yn Londen. Neitiid brocht se in tuskenjier troch mei lessen oan it Beverly Hills Playhouse, in toanielskoalle yn Beverly Hills, wêrnei't se Ingelske taal- en letterkunde studearre oan it St. Catherine's College fan 'e Universiteit fan Oxford. Under har tiid yn Oxford wie Eve lid fan in studintetoanielselskip dat foarstellings op 'e planken brocht lykas The Importance of Being Ernest, Animal Crackers en Scenes from an Execution.

Aktearkarriêre[bewurkje seksje | boarne bewurkje]

Fan 2004 ôf sette Eve útein mei in profesjonele aktearkarriêre. Se spile foar de BBC yn 'e tillefyzjefilm Hawking en dramasearjes as The Rotters' Club en Agatha Christie's Poirot. Har debút op it wite doek makke se yn it filmdrama Stage Beauty (2004). Yn 2006 wie Eve te sjen yn 'e yn Yndia opnommen minysearje Losing Gemma, oer lju dy't as backpackers op fakânsje geane. Datselde jiers spile se ek yn twa filmkomeedzjes: Starter for 10 en Big Nothing. Foar dy lêste film moasten sy en har tsjinspiler Simon Pegg harrensels in Amerikaansk-Ingelsk aksint oanmjitte.

Op it toaniel wurke Eve mei oan twa stikken dy't regissearre waarden troch Trevor Nunn. Yn 2006 spile se de jonge Esme/Alice yn it stik Rock 'n' Roll, fan Tom Stoppard. Dat wie earst te sjen yn it Royal Court Theatre yn Londen, mar gie yn 2007 oersee nei Broadway. Foar har rol yn Rock 'n' Roll waard Eve nominearre foar in Whatsonstage.com Theatregoers' Choice Award yn 'e kategory bêste byrol fan in aktrise. En yn 2009 spile se Roxane yn in produksje fan Cyrano de Bergerac yn it Chichester Festival Theatre.

Yn 2010 hie Eve de froulike haadrol yn 'e Amerikaanske romantyske komeedzje She's Out of My League, wêryn't har echte âlden de rollen fan 'e âldelju fan har personaazje spilen. Datselde jiers fertolke Eve ek de rol fan Erin, it Ierske bernefamke fan Charlotte, yn 'e film Sex and the City 2. Yn 2011 hie se in weromkearende rol yn it achtste seizoen fan 'e searje Entourage. Fierders wie Eve dat jiers te sjen as Lara Tyler yn 'e romantyske komeedzje The Decoy Bride. Yn 2012 spile se de jongere ferzje út 1969 fan Agent O yn 'e science fictionkomeedzje Men in Black 3 (de âldere ferzje waard spile troch Emma Thompson).

Alice Eve yn 2010.

Eve har grutte trochbraak as aktrise kaam yn 2013, doe't se de rol fan doktor Carol Marcus fertolke yn 'e film Star Trek: Into Darkness, it twadde diel fan 'e nije filmrige fan 'e Star Trek-franchise. Datselde jiers wie Eve ek te sjen yn it romantyske drama Before We Go, mei Chris Evans, dy't behalven har tsjinspiler ek de regisseur fan 'e film wie. Yn 2014 wie se as produsinte belutsen by it meitsjen fan 'e film Death of a Farmer, wylst se harsels spile yn 'e komeedzjefilm Night at the Museum: Secret of the Tomb. Eve spile ek yn 'e skriller Criminal, út 2016, en fan desimber 2017 ôf yn 'e Netflix-rige Iron Fist. Fierders hat hja meiwurke oan ferskate fideoklips, wêrûnder dy fan it nûmer Queenie Eye fan Paul McCartney (2013), en fan it nûmer Hotel Ceiling fan 'e band Rixton (2015).

Priveelibben[bewurkje seksje | boarne bewurkje]

Eve hat heterogromy, in oandwaning dy't makket dat de irissen fan 'e beide eagen ferskillende kleuren hawwe. Yn har gefal is har loftereacht blau en har rjochtereach grien.

Eve hie lange tiid in relaasje mei dichter Adam O'Riordan, met wa't se yn har studintetiid yn Oxford yn 'e kunde kommen wie. Hja makken it yn 2012 út. Op 14 augustus 2014 makke Eve har ferloving bekend mei har freontsje fan 'e middelbere skoalle, bankier Alex Cowper-Smith, dy't se kennen leard hie op 'e Westminster School. Se trouden op 31 desimber 2014, mar harren houlik einige yn 2017 yn in skieding.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.