Afrikaanske dwerchiisfûgel

Afrikaanske dwerchiisfûgel
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift rôldereftigen (Coraciiformes) famylje iisfûgels (Alcedinidae) skaai Afrikaanske dwerchiisfûgels (Corythornis)
soarte
Ispidina picta
Boddaert, 1783
IUCN-status: net bedrige

De Afrikaanske dwerchiisfûgel (Ispidina picta, synonym: Ceyx pictum) is ien fan 'e twa fûgelsoarten yn it skaai Afrikaanske dwerchiisfûgels út de famylje iisfûgels (Alcedinidae).

Beskriuwing

It 12 sm lange en 9 oant 16 gram swiere fûgeltsje hat in donkerblauwe rêch en wjukken en in oranje boarst. De sturt en de slachpinnen binne swart. Op 'e swarte kroan sitte blauwe streekjes. Opfallend is it oranje gesicht mei in pears-lila plak op it wang. De fûgel hat in wite kiel en in wyt plakje yn 'e nekke. It each is donkerbrún en de snaffel en de poatsjes binne read. Jonge fûgels binne doffer.

Fersprieding

De soarte libbet yn it grutste part fan Afrika besuden de Sahara. Allinne yn dielen fan Súdwest-Afrika, de hoarn fan Afrika en Madagaskar komt de soarte net foar.

Der binne trije ûndersoarten:

• Ispidina picta picta: fan Senegal en Gambia oant Etioopje en súdlik oant Uganda.
• Ispidina picta ferrugina: fan Guinee-Bissau oant westlik Uganda en súdlik oant Angoala, Sambia en noardlik Tanzania.
• Ispidina picta natalensis: fan súdlik Angoala oant Sintraal-Tanzania en noardlik en eastlik Súd-Afrika.

Se libje yn 'e ûndergroei fan beammen en strewellen oant op hegere gebieten as de Malachytiisfûgel. It biotoop bestiet út ticht, grienbliuwend wâld, bosken by rivieren, sompen mei stikken bosk, plantaazjes en kultuerlânskippen mei genôch grien.

Hâlden en dragen

It iten bestiet út ynsekten, imerkes, libellen, wjirms en flinters en lytse wringedieren lykas kikkerts en gekko's. Nei de fangst slacht it fûgeltsje de proai op syn tûke dea om se dêrnei op te iten.

Fûgels dy't yn 'e drûge gebieten briede, trekke winterdeis nei fochtiger streken om 'e evener.

Status

Der binne gjin rûzings oer de grutte fan 'e populaasje. De soarte komt frij algemien foar, mar oannommen wurdt dat de soarte ôfnimt troch it ferlies fan biotoop. De IUCN klassifisearre de fûgel as net bedrige op 'e Reade list (LC, 2024).

Boarnen, noaten en referinsjes

Boarnen, noaten en/as referinsjes:

Birdlife Ebird Avibase Commons Wikimedia Commons  Ofbylden dy't by dit ûnderwerp hearre, binne te finen yn de kategory Afrikaanske dwerchiisfûgel fan Wikimedia Commons.