Warkum

Ut Wikipedy

Gean nei: navigaasje, sykje

Warkum


Flagge	Wapen

Gemeente

Súdwest Fryslân

Ynwennertal (2006)

4167

Webstee

Webstee Warkum

de himrik fan Warkumdd

De slûs by Warkum

Haadstrjitte

Warkum (Workum) is in stêd yn de gemeente Súdwest-Fryslân, mei 4167 ynwenners. Oant 2011 wie Warkum it haadplak fan de eardere gemeente Nijefurd,

Oant de gemeentlike weryndieling fan 1984 wie Warkum in selsstannige gemeente.

Ta Warkum heart ek de buorskip It Heidenskip.

De Sint-Werenfridustsjerke út 1877 is de roomske tsjerke fan Warkum.

[bewurkje seksje] Skiednis

De stêd is ûntstien oan de De Wimerts en oant yn de 19e ieu rikte de súdein oan de Sudersee ta, dêr't de Wimerts yn It Soal oergong, in soal tusken De Bank en it Warkumer Nijlân troch. Hoewol't Warkum net oan see lei, koe fia It Soal dochs de see berikt wurde. Yn it soal leit dan ek in slûs, in pear kilometer fan de seedyk ôf. By dy slûs stiet skipswerf De Hoop, dêr't al hûnderten jierren skippen boud en restaurearre wurde. Mar hjoeddedei lizze foar de kust de polders it Griene Strân en it Giele Strân, sadat Warkum no net mear oan see leit. De Wimerts is dimpt en it Soal is no in brede feart tusken Warkum en de Iselmar.

Ferskate soarten hannel en yndustry hawwe in rol spile yn 'e skiednis fan Warkum. Sa wienen der ielfiskers, dy't oant yn Londen ferkochten. Mar Warkum hie ek weverijen dy't sa'n grutte omset hienen yn Fryslân dat yn 1504 de Warkumer Jellen de standert foar gâns Fryslân waard. Mar ek wienen der yn Warkum in soad pottebakkers, dy't it bysûndere Warkumer Kerfsneedstienwurk ûntwikkele hawwe. En fansels wie en is der, in soad skipsbou in Warkum.

Warkum wie ek it berteplak fan Jopie Huisman en yn de stêd is sûnt 1986 it Jopie Huisman Museum festige.

De havenregistraasjekoade fan Warkum wurdt foarme troch de letters WK.

[bewurkje seksje] Wapen fan Warkum

It wapen fan Warkum is yn de lingte trochsnien. De rjochterhelte fan goud, beladen mei in heale swarte earn; en de linkerhelte swart, beladen mei 3 goude leeljes. It skyld is dekt mei in gouden kroan, de kroan hat fiif blêden.

It wapen is sûnt de 15e ieu bekend op stêdssegels. It earste segel út 1420 fertoant noch net it wapen, mar in Goatyske nis, wêryn Sint Geertruid, yn de rjochterhân in blom, yn de linker in palmtûke; oan beide kanten in knibbeljende muonts. In twadde segel út 1496 (Van den Bergh) of 1426 (ynfo gemeente Nijefurd) fertoant al wol it wapen mei de earn en de leeljes. Ek op alle folgjende segels en ôfbylden stiet it wapen sa oanjûn.

Wêr't it wapen wei komt is net bekend. De heale earn is in faak brûkte figuer yn persoanswapens yn Fryslân. It soe dus ôflaat wêze kine fan in grytman of stedsbestjoerder fan Warkum yn de 15e ieu. De leeljes soenen of út in persoanswapen, of fan de Mariaferearing ôflaat wêze kinne.

[bewurkje seksje] Eveneminten

Yn de hjerstfakânsje wurde jierliks de Fiskerijdagen, it Beurtfear en de Strontrace organisearre. Yn septimber is der de jierlikse Feekeuring, eventueel kombinearre mei in Gondelfeart op jûn.

[bewurkje seksje] It besjen wurdich

Krektas op mear plakken oan de eardere Sudersee hat ek Warkum in eigen soarte ierdewurk. It Warkumer ierdewurk is ienfâldich brún mei dekoraasjes yn ringelear-technyk.
De wynmûnen De Nijlannermole, De Snip en Ybema's Mole.