Lucy Lawless

Ut Wikipedy
Gean nei: navigaasje, sykje
Lucy Lawless yn San Diego, yn 2012.

Lucy Lawless, berne as: Lucille Frances Ryan (Auckland, 29 maart 1968), is in Nijseelânsk aktrise, sjongster en aktiviste fan Iersk komôf. Hja is benammentlik bekend wurden troch har fertolking fan 'e titelrol yn 'e fantasytillevyzjerige Xena: Warrior Princess, út 'e njoggentiger jierren. Letter hie se wichtige rollen as Sylon Nû. 3 yn 'e nije searje Battlestar Galactica, en as Lucretia yn 'e ûnderskate Spartacus-searjes. Se is fierders ek bekend fan har opkommen foar homorjochten en har krewearjen foar Greenpeace.

Libben[bewurkje seksje | edit source]

Jonkheid en oplieding[bewurkje seksje | edit source]

Lawless waard berne yn 'e wyk Mount Albert, yn 'e Nijseelânske metropoal Auckland, as de dochter fan Frank en Julie Ryan. Har mem wie in leararesse, en har heit wie in bankier en de boargemaster fan 'e dielgemeente Mount Albert. Se wie de fyfde fan sân bern, en hat fiif bruorren en ien suster. Hja is fan Iersk komôf; wylst se yn 2004 yn Ierlân wie foar opnamen, fertelde se yn in fraachpetear yn Ireland on Sunday dat har heite famylje út County Clare stammet, en dat har oerpake as feroardiele krimineel nei Nij-Seelân ta deportearre waard. Lawless spile al yn in musikal doe't se tsien jier wie, en begûn mei aktearjen op 'e middelbere skoalle, dy't se folge oan it roomske Marist College yn Auckland. Neitiid studearre se in jier bûtenlânske talen oan 'e Universiteit fan Auckland, en ek folge se trije jier in oplieding ta operasjongster en spile se de fioele. Letter studearre se noch in hoart jazzmuzyk, mar úteinlik briek se alle opliedings ôf.

Lucy Lawless yn 2010.

Aktearkarriêre[bewurkje seksje | edit source]

Oarspronklik hie se operasjongster wurde wollen, mar se wie net ree om har dêroan oer te jaan (mei't dat har frijwat beheinings oplizze soe), en sadwaande besleat se popsjongster te wurden. Mar ynstee waard se oannommen foar har earste aktearrollen yn Funny Business, in programma mei komyske sketches op 'e Nijseelânske tillevyzje. Neitiid die se in aktearoplieding yn it Kanadeeske Vancouver en wist se ferskate oare lytse roltsjes te bemachtigjen.

Yn 1994 spile se in opfallende mannehaatsjende liedster fan 'e amazônes yn 'e tillevyzjefilm Hercules and the Amazon Women, mei Kevin Sorbo. Doe't dy film (ien fan in fiiftal oer de Grykske held en healgod Herkules dat dat jiers makke waard) útrûn op 'e tillevyzjerige Hercules: The Legendary Journeys, waard Lawless dêryn noch ferskate kearen foar in gastrol frege. Yn 1995 spile se yn 'e ôflevering The Warrior Princess foar it earst de rol fan 'e swarthierrige selsrêdsume heldinne Xena, dy't har ynternasjonaal ferneamd meitsje soe. Dat wie sa'n súkses dat se úteinlik har eigen spin-off-searje krige: Xena: Warrior Princess, dy't rûn fan 1995 oant 2001.

Fan 2005 oant 2009 hie Lawless in weromkearende rol yn 'e nije tillevyzjesearje Battlestar Galactica, as de sjoernaliste D'Anna Biers, dy't letter in Sylon-ynfiltrante bliek te wêzen. Fierders hie se gastroltsjes yn searjes as Just Shoot Me!, The Bernie Mac Show, Two and a Half Men en CSI: Miami, en in weromkearende gastrol yn Parks and Recreation. Yn 2010 spile se Lucretia yn 'e searje Spartacus: Blood and Sand, en dy rol mocht se nochris opfiere yn 'e seisdielige minysearje Spartacus: Gods of the Arena (2011) en yn 'e searje Spartacus: Vengeance (2012). Foar har fertolking fan Lucretia wûn Lawless yn 2011 in Saturn Award yn 'e kategory bêste byrol fan in aktrise.

Sjongen en oare hantrekkens[bewurkje seksje | edit source]

Njonken har aktearwurk yn films en op tillevyzje liende Lawless ek har stim foar ferskate tekenfilmpersonaazjes, lykas Goldmoon yn Dragonlance: Dragons of Autumn Twilight en Wonder Woman yn Justice League: The New Frontier (beide út 2008), wylst se harsels spile yn 'e populêre tekenfilmsearje The Simpsons, yn in ôflevering út 1999. Fierders stie se ek ferskate kearen op 'e planken, ûnder mear yn it toanielstik De Fagina Monologen, fan Eve Ensler. Yn septimber 1997 stie se foar it earst op Broadway, yn 'e revival fan 'e musikal Grease, wêryn't se it "ferkearde fanke" Betty Rizzo spile, al hie se sels leaver de rol fan it "goede fanke" Sandy hawwe wold (yn in fraachpetear oppenearre se neitiid de miening dat se troch har rol as Xena typecast wie). Neitiid sette se har sjongkarriêre fuort troch yn 2006 mei te dwaan oan it tillevyzjeprogramma Celebrity Duets, wêrby't se op it twadde plak einige. Se makke har konsertdebút yn The Roxy, yn Hollywood, op 13 jannewaris 2007, foar in útferkochte seal.

Aktivisme[bewurkje seksje | edit source]

Mei har rol yn Xena: Warrior Princess krige Lawless in trouwe kliber fans, dêr't fanwegen de dûbelsinnige relaasje tusken Xena en har selskipsfrou Gabrielle (spile troch Renee O'Connor) in soad homo's en fral lesbiënnes ûnder wiene. Har status as lesbysk ikoan waard noch fuortsterke troch har iepentlike lesbyske leafdessênes yn Spartacus: Gods of the Arena. Hoewol't se sels heteroseksueel is, hat Lawless har sûnt likernôch 2000 opsmiten as in aktiviste foar homorjochten, benammen yn 'e Feriene Steaten en Nij-Seelân.

Lawless by in konsert yn The Roxy, yn Hollywood, yn jannewaris 2007.

Fierders is Lawless ek belutsen by de StarShip Foundation, in Nijseelânske goeddiedichheidsorganisaasje dy't him ynset foar sike bern, en is se (sûnt 2009) in "klimaatambassadeur" foar Greenpeace. By dy lêste organisaasje docht se ek mei oan aksjes, lykas yn febrewaris 2012, doe't se mei fiif oare Greenpeace-leden 77 oeren lang in oaljeboarringsskip by it Nijseelânske Port Taranaki besette. Neitiid waard se arrestearre en oanklage foar ynbraak, wêrmei't se 10 jier finzenisstraf riskearre. Yn febrewaris 2013 waarden sy en de oare aktivisten feroardiele ta in boete fan 651 Nijseelânske dollars en 120 oeren wurkstraf. De rjochter wiisde de skeaclaim fan 545.000 dollar, dy't easke waard troch Shell, de eigner fan it skip, fan 'e hân.

Priveelibben[bewurkje seksje | edit source]

Doe't se achttjin jier wie gie Lawless, krekt as in protte jonge Nijseelanners, op in oerseeske reis, wêrby't se troch Jeropa en Austraalje teach. Yn Austraalje mette se Garth Lawless, mei wa't se in relaasje krige. Yn 1987, op har njoggentjinde, rekke se swier, en yn 1988 troude se mei Lawless yn it Australyske Kalgoorlie. Neitiid ferfearen se nei Nij-Seelân, dêr't op 15 july fan dat jier harren dochter Daisy Lawless berne waard. It houlik rûn lykwols yn 1995 op in skieding út. Op 28 maart 1998 wertroude Lucy Lawless mei Robert G. Tapert, de baas fan Pacific Renaissance Pictures en de produsint fan Xena: Warrior Princess. Mei him is hja noch altiten troud en hat se twa soannen krigen, Julian Robert Bay Tapert (1999) en Judah Miro Tapert (2002), dy't beide berne waarden yn Auckland.

Yn 1996 krige Lawless in slim ûngemak doe't se in stikje opnaam foar it praatprogramma The Tonight Show with Jay Leno, wêrby't se op in hynder op it parkearterrein arrivearre. It hynder ferstapte him lykwols, en kneppele del mei har der noch op. Lawless briek har bekken, mar genies lokkigernôch wer folslein. Yn 2004 waard Lawless opnommen yn 'e New Zealand Order of Merit, wat in keninklike ûnderskieding is.

Filmografy[bewurkje seksje | edit source]

Films[bewurkje seksje | edit source]

jier titel rol opmerkings
1990 Within the Law Verity
A Bitter Song Nurse 1
1991 The End of the Golden Weather Joe's Girl
1992 The Rainbow Warrior Jane Redmond
1993 Typhon's People Mink Tertius
1994 Hercules and the Amazon Women Lysia tillevyzjefilm
1995 Peach Peach
1997 Hercules & Xena: Wizards of the Screen Xena
1998 Hercules and Xena - The Animated Movie: The Battle for Mount Olympus Xena
2000 Ginger Snaps nijslêzeresse op it ynterkomsysteem fan 'e skoalle
2002 Spider-Man punkfanke
2004 EuroTrip Madame Vandersexxx
2005 Boogeyman Mary Jensen
Locusts Maddy Rierdon tillevyzjefilm
Vampire Bats Maddy Rierdon tillevyzjefilm
2006 The Darkroom Cheryl
2007 Football Wives Tanya Austin tillevyzjefilm
2008 Dragonlance: Dragons of Autumn Twilight Goldmoon stim
Justice League: The New Frontier Wonder Woman stim
Bedtime Stories Aspen
2009 Bitch Slap mem-oerste
Angel of Death Vera

Tillevyzje[bewurkje seksje | edit source]

jier titel rol opmerkings
1989 Funny Business ûnderskate personaazjes Nijseelânske komyske sketch-show
1990 Shark in the Park ôfl. Double or Quits
1991 For the Love of Mike Helen ôfl. 1.06
1992 The Ray Bradbury Theatre Liddy Barton ôfl. 6.13 Fee Fie Foe Fum
1993 The Black Stallion Sarah McFee ôfl. 3.16 Riding the Volcano
1994 High Tide undercover-plysje ôfl. 1.08 Shanghied
1995 High Tide Sharon List ôfl. 1.17 Dead in the Water
Hercules: the Legendary Journeys Lyla ôfl. 1.06 As Darkness Falls;
ôfl. 2.05 Outcast
1995-1998 Hercules: the Legendary Journeys Xena 6 ôfl.
1995-2001 Xena: Warrior Princess Xena haadrol; alle ôfl.
1999 The Simpsons harsels ôfl. 11.04 Treehouse of Horror X (stim)
2001 Just Shoot Me! Stacy ôfl. 5.14 The Auction
The X Files Shannon McMahon ôfl. 9.01 Nothing Important Happened Today diel 1
ôfl. 9.02 Nothing Important Happened Today diel 2
2002 The Bernie Mac Show harsels ôfl. 2.1 Keep It on the Short Grass
2003 Tarzan Kathleen Clayton 7 ôfl.
2004 Less Than Perfect Tracy Fletcher ôfl. 3.04 Ignoring Lydia
2005 Two and a Half Men Pamela ôfl. 2.18 It was Mame, Mom
2005-2009 Battlestar Galactica D'Anna Biers/Nû. 3 16 ôfl.
2006 Veronica Mars agint Morris ôfl. 2.11 Donut Run
2007 Burn Notice Evelyn ôfl. 1.11 Drop Dead
Curb Your Enthusiasm harsels ôfl. 6.07 The TiVo Guy
2008 CSI: Miami Audrey Yates ôfl. 7.07 Cheating Death
2009 Flight of the Conchords Paula ôfl. 2.08 NewZealandTown
The L Word Marybeth Duffy ôfl. 6.01 Long Night's Journey Into Day
ôfl. 6.08 Last Word
2010 Spartacus: Blood and Sand Lucretia alle 13 ôfl. fan seizoen 1
2011 Spartacus: Gods of the Arena Lucretia alle 6 ôfl. fan 'e minysearje
No Ordinary Family Helen Burton/Mrs X 4 ôfl.
2012 Spartacus: Vengeance Lucretia alle 10 ôfl.
Parks and Recreation Diane weromkearende gastrol begjinnend yn ôfl. 5.03 (How a Bill becomes a Law)
2013 Top of the Lake Caroline

Diskografy[bewurkje seksje | edit source]

Albums
  • Come 2 Me
  • Come To Mama: Lucy Lawless In Concert: The Roxy Theater In Hollywood
Konsert-dvd's
  • Come To Mama: Lucy Lawless In Concert: The Roxy Theater In Hollywood
  • Gimme Some, Sugar: Lawless, NYC
  • Lucy Lawless Live In Chicago: Still Got The Blues
  • Lucy Lawless Live At The Roxy Theater: Ho Down
  • Lucy Lawless Live In Concert: "Welcome To The Pleasuredome"
Oare nûmers
  • Little Child op 'e cd Unexpected Dreams – Songs From the Stars
  • 4 All of Us mei Pauly Fuemana op 'e cd Pauly Fuemana (OMC)
  • Little Child op The Starship Christmas Album 2012, útjûn troch de StarShip Foundation

Keppelings om utens[bewurkje seksje | edit source]

Boarnen, noaten en referinsjes[bewurkje seksje | edit source]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.