Little Black Bear Earste Naasje
| Little Black Bear Earste Naasje | ||
| Ingelsk | Little Black Bear First Nation | |
| lânseigen | ᑲᐢᑭᑌᐤ ᒪᐢᑿ ᒪᐢᑯᓯᐢ (Kaskitêw- maskwa-maskosis) | |
| flagge | ||
| ||
| algemiene ynformaasje | ||
| lân |  Kanada
| |
| provinsje |  Saskatchewan
| |
| haadkertier | Goodeve (Saskatchewan) | |
| etnisiteit | Kry, Assiniboin | |
| ledetal | 450 (2006) | |
| oprjochting | 1874 | |
| status | erkend | |
| erkenning | Kanada
| |
| reservaat | ||
| reservaat | Little Black Bear Reservaat 84 Ferdrach Nû. 4 Reservaatgrûnen | |
| lokaasje | súdeastlik Saskatchewan | |
| oerflak | 68,8 km² | |
| ynwennertal | 160 (2006) | |
| offisjele webside | ||
| littleblackbear.org | ||
| kaart | ||
  Lokaasje yn Saskatchewan.
| ||
De Little Black Bear Earste Naasje (Ingelsk: Little Black Bear First Nation; Kry: ᑲᐢᑭᑌᐤ ᒪᐢᑿ ᒪᐢᑯᓯᐢ, Kaskitêw-maskwa-maskosis) is in Yndiaanske stamme-organisaasje yn Kanada, mei eigen reservaat yn it suden fan 'e provinsje Saskatchewan. De namme fan 'e stamme wurdt ek wol (yn 'e besitlike foarm) werjûn as Little Black Bears Earste Naasje (Little Black Bear's First Nation). ("Earste naasje" is in Kanadeeske oantsjutting foar in Yndianestam of -troep.) De Little Black Bear Earste Naasje bestiet as offisjele stamme-organisaasje sûnt 1874, en it haadkertier is fêstige yn Goodeve, yn Saskatchewan.
Demografy[bewurkje seksje | boarne bewurkje]
Neffens gegegevens út 2006 hie de Little Black Bear Earste Naasje doe 452 leden. Dat binne etnyske Kry (Cree) fan 'e Flakte-Kry-substamme, en út etnyske Assiniboin (Assiniboine), in folk dat nau besibbe is oan 'e Sû (Sioux). It is wat dreech om 'e stamme neffens etnyske linen op te spjalten mei't der mar frijwat yninoar omtroud is, mar rûchwei kin der in ferdieling makke wurde yn 250 Kry en 200 Assiniboin.
Reservaat[bewurkje seksje | boarne bewurkje]
De Little Black Bear Earste Naasje hat in eigen reservaat, te witten: it Little Black Bear Reservaat 84 (Little Black Bear 84 Reserve), yn 'e File Hills, 4 km súdwestlik fan Goodeve. It hat in oerflak fan 68,8 km², en fan 'e 450 stamleden wennen der yn 2006 158. Op it mêd fan foarsjennings binne yn it reservaat û.m. kantoaren fan 'e stamme-organisaasje, in seal foar gearkomsten en in swimbad. De stamme is fierders eigner fan perselen lân yn Balcarres, dêr't se kantoaren hawwe, en yn Fort Qu'Appelle, dat noch ûntwikkele wurde moat. Mei 34 oare stammen út súdlik Saskatchewan en Manitoba dielt de Little Black Bear Earste Naasje fierders it Ferdrach Nû. 4 Reservaatgrûnen Yndianereservaat 77 (Treaty No. 4 Reserve Grounds 77 Indian Reserve). De stamme is lid fan 'e Federaasje fan Yndiaanske Naasjes fan Saskatchewan, in yntertribaal gearwurkingsferbân.
Skiednis[bewurkje seksje | boarne bewurkje]
Op 15 septimber 1874 ûndertekene it Kry-opperhaad Keeskeehewmuscoomuskwa, in namme dy't oerset wurde kin as Lytse Swarte Bear (Ingelsk: Little Black Bear), it Ferdrach Nû. 4 mei Britske koloniale regear fan Kanada. Dêrnei sette er him mei syn mingde Kry-Assiniboin-troep nei wenjen yn it reservaat dat foar harren oprjochte wie. Lykas de measte Yndianen yn súdlik Saskatchewan leine de leden fan 'e Little Black Bear Earste Naasje harren yn it reservaat ta op 'e lânbou, wêrby't se foarútbuorken safolle as de beskikbere technology, it pleatslike klimaat en it regearingsbelied harren dat tastie.
Keppelings om utens[bewurkje seksje | boarne bewurkje]
| Boarnen, noaten en/as referinsjes: |