La Palma

Ut Wikipedy
Gean nei: navigaasje, sykje
La Palma

La Palma is it meast noardwestlik lizzend eilân fan de Kanaryske Eilannen yn de Atlantyske Oseaan foar de kust fan Afrika. De haadstêd is Santa Cruz de La Palma.

Omskriuwing[bewurkje seksje | edit source]

La Palma hat in oerflakte fan 729 km² en is om-ende-by 42 by 24 kilometer. Yn 2005 wennen der 85.252 minsken.

It eilân heart by de Spaanske provinsje Santa Cruz de Tenerife. Krekt as Tenerife en Gran Canaria hat it eilân in fruchtbere wite side, en in droege side dêr't it meastepart fan it toerisme him ôfspilet.

De haadstêd Santa Cruz de la Palma hat 18.000 ynwenners en leit oan de eastside fan it eilân. Grutste stêd fan La Palma is Los Llanos de Aridane (± 20.000 ynwenners) en leit oan de westkant.

Skiednis[bewurkje seksje | edit source]

De earste bewenners fan La Palma wienen de Benahoariten (Spaansk: Benahoares) dêr't net wis fan is wêrfan sy wei kamen. Hja hienen in neolityske kultuer en wienen ferparte yn ferskillende stammen dy't laat waarden troch stamhaden. Hja neamden La Palma Benahoare. De wichtichste oerbliuwsels fan dizze kultuer binne grotwennings, rotstekeningen en mei stiennen plaveide paden troch de bergen.

Nei alle gedachten wienen de Kanaryske Eilannen al by de Foenysjers bekend en de Griken. De Genuaanse ûntdekkingsreizger Lancelotto Malocello berikte de eilannekloft yn 1312 en bleau der twa desennia oant er ferband waard nei in opstân fan de eardere bewenners.

Yn 1404 waard begûn mei de oermastering fan it eilân troch de Spanjerts. By wêr't no Santa Cruz leit sette sy foet oan wâl. Lykwols soe it oant 1493 duorje, nei in protte bluodderige fjildslaggen, foardat it ferset fan de earste bewenners brutsen wie. De namme fan de úteinlike oermasterder fan La Palma wie Alonso Fernández de Lugo. Troch him waard de lêste kening fan it eilân Tanausu ferslein mei help fan in list. Dizze kening hearste oer it gebiet dat bekend stie as Acero (Caldera de Taburiente). Tegearre mei Juan de Palma, in ta it Kristendom bekearde Guanche en besibbe mei Tanausu, organisearre de oermaster in fredespetear mei de kening. Nei dat Tanausu ynstimme hie om in ferdrach te sletten waard er yn in mûklaach lokke. Nei de Spaanske ferovering fan La Palma binne de earste bewenners stadich ferdwûn. Hja waarden fermoarde, ferkocht as slaven of gienen op yn de Spaanske befolking.

De folgjende twa ieuwen waarden de delsettingen op La Palma wolfarrend trochdat it eilân as hannelspost tsjinne op de rûte nei de Nije Wrâld.

Boarnen, noaten en referinsjes[bewurkje seksje | edit source]

Boarnen, noaten en/as referinsjes:
  • Siepko Wenning, Reisgids La Palma, Ontdek de verborgen schatten van La Palma, Los Llanos-2010.
Wikimedia Commons Dit materiaal is beskikber by Wikimedia Commons as La Palma en wurdt mooglik ek brûkt by oare Wiky-projekten.