Hjalmar Söderberg

Hjalmar Söderberg
skriuwer
Hjalmar Söderberg as jongkeardel
persoanlike bysûnderheden
echte namme	Hjalmar Emil Fredrik Söderberg
nasjonaliteit	Sweedsk
berne	2 july 1869
berteplak	Stokholm
stoarn	14 oktober 1941 (72 jier)
stjerplak	Kopenhagen
wurk
taal	Sweedsk
sjenre	roman, toaniel, poëzy
bekendste   wurk(en)	Historietter, Martin Birck's ungdom, Doktor Glas, Gertrud, Hjärtats oro
jierren aktyf	1888–1941

Hjalmar Emil Fredrik Söderberg (2 july 1869 - 14 oktober 1941) wie in Sweedsk romanskriuwer, toanielskriuwer, dichter en sjoernalist.

Söderberg wie in soan fan in amtner. Hy studearre oan de Universiteit fan Uppsala, mar makke syn stúdzje net ôf om sjoernalist te wurden. Hy wijde him lykwols al gau hielendal oan de skriuwerij.

Yn syn wurk fynt men faak mankelike karakters en guonts dy't harren leafsten kwyt rekke binne. Doetiids Stockholm wurdt faak ryk útbyld. Söderberg wurdt o sa heechhâlden yn syn heitelân en wurdt somtiden de gelike fan August Strindberg neamd.

Fral tsjin de ein fan syn libben waard Söderberg in ynmoedich en striidber humanist, polityk belutsen (antyfaksistysk) en in protte dwaande mei religieuze fraachstikken. De kwaliteit fan syn lettere wurk hie lykwols te lijen fan syn alkoholgebrûk.

Syn bekendste wurk yn Nederlân is 'Dokter Glas'.

Priveelibben

Söderberg wie boaske oan Märta Abenius (1871-1932) fan 1899 oant 1917. Sy krigen trije bern: de lettere aktrise Dora Söderberg-Carlsten (1899), Tom Söderberg (1900) en Mikael Söderberg (1903). Fan 1917 ôf wie er yn Denemark troud mei Emelie Voss (1876-1957), mei wa't er ien bern krige: de lettere aktrise Betty Søderberg (1910).

Söderberg hie fierders in tal jierren, út en troch, in ferhâlding mei Maria von Platen (1871-1959), dy't syn skriuwerij beynfloede hawwe soe, bynamme syn toanielstik Gertrud út 1906.

List fan wurk (ûnfolslein)

• Förvillelser (1895)
• Oscar Levertin (1895)
• Historietter (1898) - "Anekdoates"
• Martin Bircks ungdom (1901) - "Martin Birck's jonkheid"
• Främlingarne (1903) - "De frjemdlingen"
• Doktor Glas (1905)
• Gertrud (1906) (toanielstik yn trije akten)
• Det mörknar över vägen (1907) - "It wurdt tsjuster op 'e wei"
• Valda sidor (1908) -
• Hjärtats oro (1909) - "Noeden fan it hert"
• Den allvarsamma leken (1912)
• Aftonstjärnan (1912)
• Den talangfulla draken (1913)
• Jahves eld (1918) - "It Fjoer fan Jahves"
• Jesus Barabbas. Ur löjtnant Jägerstams memoarer (1928)
• Resan till Rom (1929) - "Reis nei Rome"

Ferfilmingen

Ferskate wurken fan Söderberg waarden yn Sweden ferfilme, ûnder oaren Gertrud (1964), Doktor Glas (1968) en Den allvarsamma leken (1977).