Damaskus
| Damaskus | ||
 |
||
| Damaskus Skyline Universiteit • Operagebou Four Seasons Hotel • Nasjonaal Museum• Omajjaden-moskee Azm Paleis • Maktab Anbar |
||
| Sifers | ||
| Ynwennertal | 1.711.000 (2009) | |
| Oerflak | 105 km² | |
| Befolkingstichtens | km² | |
| Stêdekloft | +77 km² | |
| Hichte | 680 m | |
| Polityk | ||
| Lân | Syrje | |
| Gûvernemint | Damaskus | |
| Boargemaster | Bishr Al Sabban (gûverneur) | |
| Oar | ||
| Tiidsône | EET (UTC+2) | |
| *Simmertiid | EEST (UTC+3) | |
| Koördinaten | ||
| Webside | Gûvernemint Damaskus | |
Damaskus (Arabysk: دمشق,Dimasjq of (Dimasjq) al-sham) is de haadstêd fan Syrje. It is ien fan de âldste steden op 'e wrâld en miskien wol de âldste. Der wenje om-ende-by 1,5 miljoen minsken (2005). Yn de folksmûle hiet de stêd Sjam.
De stêd leit yn in tige grutte en fruchtbere oaze en hat har bestien te tankjen oan de rivier Barada, dy't de oaze fan wetter foarsjocht. Troch har lizzing, oan de râne fan in skrok gebiet, wurdt Damaskus nei alle gedachten yn ferbân brocht mei de Hof fan Eden. Net allinnich it ferhaal oer it Paradys, mar ek in protte oare foarfallen út de Bibel soenen yn en rûnom Damaskus plak hawwe fûn. Hjir deade Kaïn syn broer Abel, waard Abraham berne en fûnen Maria en Jozef in skûlplak. De fuotstappen fan de profeet Mohammed binne yn de foarstêd fan Damaskus te sjen, Paulus waard hjir bekeard en it haad fan Jehannes de Doper waard yn dizze stêd fereare. Dat aureool fan hillichheid is altiten om Damaskus hingje bleaun, ek doe't de stêd har wichtige politike en religieuze posysje al lang ferlern hie.
Skiednis[bewurkje seksje]
De earste argeologyske fynsten dien yn Damaskus datearren fan om-ende-by 2500 f.Kr.. De earste fermelding fan Damaskus yn skriften datearret fan 1500 f.Kr.
Damaskus wie haadstêd fan in krêftich ryk fan Arameejers yn de 9e ieu f.Kr.. De Assyrjers ûnder Sargon II feroveren de stêd yn 732 f.Kr.. Letter gong de stêd oer nei it Nij-Babylonyske Rijk en noch wer letter nei it ryk fan de Achaemeniden yn Perzje. Yn 332 f.Kr. ferovere it leger fan Aleksander de Grutte de stêd en sûnt dy tiid bleau de stêd sân tûzen jier ûnder ynfloed fan Hellenistyske en Romeinske kulturen.
Yn 635 waard de stêd troch de Arabieren oermastere. Under de dynastie fan de Omajjaden waard Damaskus haadstêd fan it Arabyske Ryk fan 661 oant 750. Dat tiidrek jildt as de bloeitiid fan de stêd, dêr't ferskate grutte moskeeën yn boud waarden, dêr't de Omajjadenmoskee fierwei de wichtichste fan is. Yn 750 waarden de Omajjaden ferslein troch de Abbasiden en ferlear Damaskus har funksje as haadsted fan it ryk oan Bagdad.
Yn 1260 feroveren de Mammelukken de stêd.
Yn 1516 waard de stêd troch de Osmanen ferovere en makke diel út fan it Osmaanske Ryk, dêr't de stêd oant en mei de Earste Wrâldkriich by bliuwe soe. Yn de dy kriich naam Generaal Allenby de stêd yn mei it Britske leger en troch stipe fan Arabyske troepen. Nei de Twadde Wrâldkriich waard Syrje ûnôfhinklik en Damaskus de haadstêd fan dat lân.
Nijsgjirrichheden[bewurkje seksje]
Nijsgjirrichheden binne ûnder mear:
- de grêftombe fan Saladin
- it hûs fan Ananias - no in tsjerke
- de Grutte moskee fan Damaskus (ek wol Ommajjadenmoskee neamd)
- it grutte oantal fonteinen yn de stêd
