Avezzano

Ut Wikipedy
Gean nei: navigaasje, sykje
Lokaasje fan Avezzano.

Avezzano is in stêd en comune yn de regio Abruzzo, provinsje L’Aquilla yn Itaalje. De stêd leit likernôch 80 kilometer eastlik fan Rome yn de midden fan it lân. Avezzano leit op 695 meter hicht en hat in ynwennertal fan 39.376 minsken.

Skiednis[bewurkje seksje | edit source]

Kastiel Orisini.

Der binne twa gongbere ferhalen oer wêr’t de namme fan it stedsje wei komt: fan “Ave Jane”, wat fan de Romeinske God Janus komt, en fan “Ad Vetianum”, wat “nei de Vetia famylje” betsjut, dy’t wennen yn it deunby leine Alba Fucens. De earste delsettings yn it gebiet begûnen mei it wurk oan it drainaazje systeem fan de Fuciner mar ûnder it bewâld fan Keizer Klaudius yn de earste ieu. Yn de 15e ieu stie Avezzano ûnder it bewâld fan de Orsini famylje, dy’t yn 1490 dêr in kastiel bouden.

Avezzano lei ea oan de iggen fan de Fuciner Mar, dat earder de grutste mar fan sintraal Itaalje wie, it waard drainearre yn de 19e ieu; nei it drainearjen fan it mar, ûntwikkele it gebiet him gau mei tank oan de fruchtbere grûn wêr’t goed op buorke wurde koe no’t it mar droech lei. It gebiet waard hast folslein ferneatige troch de nei alle gedachten swierste ierdskodding yn de skiednis fan Itaalje. De ierdskodding barde ier yn de moarn fan 13 jannewaris 1915, allinne Casa dei Palazzi en in part fan it Kastiel Orisini bleaunen oerein stean, mear dan 29.000 minsken ferstjerren. Yn maaie 1944 rekke de krek opboude stêd wer swier skansearre troch bombardeminten.

Hjoed de dei is Avezzano in moderne stêd mei in rjochtlinich strjitteplan en romme parken. It is in wichtich kommersjeel, yndustrieel en agrarysk sintrum foar it berchgebiet mei in tige ûntwikkele technyske sektor. Op koarte ôfstân fan de stêd stiet in park mei radioteleskopen fan it bedriuw Telespazio. It Amerikaanske bedriuw Micron Technology hat hjir ek in fêstiging.